Read Car_Nicobarese Isayā 57 Bible Online

Isayā 57 - Car_Nicobarese bible

Isayā 57

¹Öt kôlòṙen yip tölöök, ngaich öt hĕng tak mahaköpngö e nö ellōnre; kē-ĕyö yip tö kalē-ĕlōn nö im Tēv, öt hĕng tak tö-akahalōn tö ngam tölöök tarik nö kē-ĕyö nö ṙā-ang im tötlöök yamih.

²Kuhēthötre anga-aṅ ngaich nö im kumchikṙen; el chamam re cha-a ngaich nö heūheure, yip lamök i chanīpöre.

³Haröhtöre pöri yī-ö ihih yī-ö kūön vamīngen, kūön ma-asĕha mī-inyihköre kikānö inrē.

⁴Achiāpa minônngen yīö? Lā-al chīö öi pōiti elvāng vā-anykūöre öi kichalnyö litāk re. Röh öi yī-ö kūön tököölö fālen, öi kūön inchīlö.

⁵Yī-ö tö holtö yanālöre öi föng i nup ōk chōn, el katòh tö-ayālö rōi chōn, öi fëlngö kūön re el achāṙö el katòh linrākö nup ihong inrē?

⁶I nup töfaṙëcha alaha ihong el achāṙö nup minchööḵö yīö; anū-ö nup minchööḵö yīö; in u tī yī-ö ngaich röstö tö-ôkö tökētu, kumtö sāiny yī-ö inrē nö tökētu. Lām öich min ngaich tökūö në?

⁷Vītö chamanre me-eṅ latulöng i kui tömaṙô-òl kui rôngö, ngaich chuh in e me-eṅ kētö tökētu.

⁸Lā uk nup inkūp ngaich tö öp machööḵlö öp inkūp tī më-eṅ vītö minkahngö: pò meh chumlal el chamam re, öm ṙāngen chu, ngaich man yôklö ël e, ngaich man pōiti tī vī-i e; ngaich me-eṅ inrē kē taneūngenre öm in cha, hāngenlōn man töp chamam cha, ngaich man meuk töchumlal.

⁹Chuh in Mōlek man ngaich öm kumtö tavī-i ngaich ṙūölö ṙôken tötahūsa tavī-i me-eṅ; marô-òlkūö tī me-eṅ tīnngö ma-ahānga, uroh öm tīntö chamuh el chūök tökapah.

¹⁰Chei man ngaich törô-òlkūö talöökö, hö-ö pöri më-eṅ ngö ṙô, chanök alaha an; kôtökūö me-eṅ tö tufömngöre inlaha nö kumlēḵ meh ngaich hö-ö me-eṅ cheingö.

¹¹Achiāpa vanööṙö meh pinhë-eṅkūö meh inrē, töp löknyô meh minyôiny-aṅ ngaich rö-ö köpölōn tö chu öt fēken chu inrē ellōn re? Röh öich höng öt ṙô-òvö, öich marô-òten ngaich lökten meh öt pa-ekūö tö chu?

¹²Hôṅ, vënyö öp lanöökö meh chin la-en meh inrē, hö-ö pöri min anū-ö nö yöölen tī tö meh.

¹³Yē meh havë-a, hökngen nup insātēv hamūl meh nö ṙānyen meh! Heuingö nup min tökūö kuföt, kum umhômö nup min. Anga-aṅ pöri ngòh mahanyatlöre nö in chu amīnu min töng panam, ngaich hayōm ngam töhet rôngö chu min.

¹⁴Ngö min öp ṙô, Afônglö e, afônglö e, halēn ngam talöökö, kēngö nup inrahkūö nö ṙā-ang el talöökö më tarik chu.

¹⁵Tön ngö ṙô An ngam lātulöng ngam tömarô-òl chūök, ngam mī-iyöng im tötchnūhuvṙen, ngam tö minënyu tö ngam Töhet: Iyöng lātulöng chin Töhet chūökö inrē hol ò inrē öp tö haṙivlōn tö tökööl re, töyāichö ellōn inrē, mahā-aṅ ma-alaha öp yāich, ane inrē mahā-aṅ nômö öp töhaṙivlōn tö tökööl re.

¹⁶Pò chu sō örheūheu lā-alkūö, öt rēhĕn öich öt örheūheu min līn; pòn löknyö in chu ngam ma-alaha, chū-ö inrē vamī unhômö ngam nômö.

¹⁷Kūö ngam tökööl yinikhanga chin öich tainy, fōhan chin, hanyatngö kūöre ngaich tainy inrē; höng iṙūöhen pöri anga-aṅ nö heūlritre nö i talöökö ellōn re.

¹⁸Ngaich chin meuk nup talöökö ò, ngaich pöri min öich halīnken ò; hachōḵ an chin min ngaich reushen ò holtö inṙamlōn, vīlö ṙòng minë minuh nö in yip mahaṙivhen ò.

¹⁹Lanāmö, lanāmö, i tömarôvat i töröhta, ṙô ngam Mā Tēv; ngaich chū-ö min halinken ò.

²⁰Ngaich pöri ngam tötlöök nöng sā panāvö el mai; pò e nö ötkô nö heuhtöre, ngaich öp mak e nö payavlöng tī tö tilin mum inrē,

²¹Öt lanāmu in ngòh tötlöök, ṙô ngam Tēv chu.