Read Car_Nicobarese Isayā 58 Bible Online

Isayā 58 - Car_Nicobarese bible

Isayā 58

¹Pōitô hū-a, un aṙēlôre, sā ṙô römpĕt hachônglö ṙôre; ve-enynang yip tarik chu tö öt lanöökö cha, yip aṅ patī Yāköp inrē tö nup tökööl cha.

²Söntenre cha-a nö kaheuk sakāmö nö chöhö chu, kuchīkölōn inrē nö hòṅ akahakūö tö në talöökö chu: nö sā cha öre nö pumnāmö tarik nö tölöökö la-en, töt ṙamāngö ngam chöngö ngam Tēv cha inrē, havëkö töchip cha-a inkaha fālen nö in chu, kuchīken cha-a nö hòṅ ṙūötöre nö im Tēv,

³Kūöyòh öi īhö ahik, ṙô cha, ngaich me-eṅ öt meuk? Kūöyòh öi īhö hayāichngöre, ngaich rö-ö me-eṅ akahngen e? Yĕh meuk, ip sakāmö meh ahik ngaich me-eṅ chöh kumchikṙenre, ngaich hakihten yip töla-evṙen nö in meh.

⁴Yĕh meuk, ahik yin öi höng lamā-alkūöre, kilöönö höö inrē, kisōlö höö öi aṅtī tö tötlöök uktī re: rö-ö an ngam inhīkö tö yīö i ngih sakāmö nö vīten ap ṙô yīö min nö hāngö nö lātulöng.

⁵Angū-ö öng inhīkö atöllö chu, nö sakāmö tarik nö hayāichngöre? Sinôntökūöre önguh nö sā tafūyu, ngam inṙĕhtö sāk inrē tö ngam pinṙōngö tisum nö elkatòh ò? Inhīkö öng angū-ö tö ṙô yīö, sakāmö inrē hòng nö töhō-ovö tö ngam Mā Tēv?

⁶Röh öng ngih inhīkö atöllö chu? Linuhnyö inlök öt lanöökö, linuhnyö nup uk nyanëk tö ngam kaneun, ṙināḵlö ngam töhakihtuṙen, linkölngö ngam kaneun inrē?

⁷Röh öng nö hē meh hòṅ hōlukūö nyā töp tö-aheuk, hē meh inrē kētö ap yāich tötpatī-ivö nö el patī meh? Hē meh inrē meuk tö lichôi ngaich kafānan ngaich uh öre me-eṅ hanyatngöre tö ngam alahare?

⁸Ngaich möl ngam ëāṅvö meh nö hūlökūö sā minlīlö peuheū, ka-euilö min inrē ngam inlinken meh nö meutlö: ngam lanöökö meh min inrē urēhĕkūö meh nö kiröönngöre, lā-unôich meh min ngam kanôlò ngam Mā Tēv nö aṅten meh.

⁹Ngaich sapṙô meh min ngam Mā Tēv, yē meh havëken ò; havë-a min me-eṅ, ngaich ngö ṙô min anga-aṅ, Ihih chīni, Yē meh kēngö ngam kaneun nö ṙā-ang elṙôngö yīö, ngam sin-ôkömat, ngam kinakkö tötlöök inrē;

¹⁰Ngaich yē meh luvë-enykūö ellōn re im tö-aheuk öm hatööḵngenlōn öp tökihngen, ngaich min öp ëāṅvö meh nö hūkūö nö el sinngūlö, ngaich ngam sinngūlö meh min nö sā tö kamlö tavūöi:

¹¹Ngaich ngam Mā Tēv min nö öt ṙākenre nö hachōkūö meh, hatööḵngen meh inrē tö nup lōn meh tölöök chehen, ngaich vī nup tangëḵ meh nö ngëḵ; ngaich me-eṅ min inrē sā öp panô-òṅ töhamākö, sā öp mak töhëmlö, öp töng ötheumköre aṅ.

¹²Ngaich min minë töhötṙeh hanāngen tötaṙöli nö mānlöngö: ngaich me-eṅ min katöplö rööntö machööḵlö töṙōl köl chap; ngaich kaheūkö min me-eṅ vamītit tömëngö: mahavanlö nup talöökö elyöngö.

¹³Yē meh kānngöre tö ngam töhet sakāmö, i nup kumchiklōn meh inrē im töhet sakāmö chu, ngaich havëkö ngam töhet sakāmö nö ṙanāmölōn ineū-euṅ inrē nö töhet sakāmö ngam Mā Tēv; yē meh milēḵṙen tö e, öm öt hönglök taköököre, hēk chöh kumchikṙenre, hēk kahôkkö töng minônṙô:

¹⁴Ngaich me-eṅ min tökuchīkölōn im Mā Tēv, ngaich vīten meh chū-ö min sāttö elrākre i kui ngih tumlat; ha-aṅlen meh chū-ö min tö ngam amin ök yöng meh Yāköp pò e nö ṙô elvāng ngam Mā Tēv.