Read Car_Nicobarese Isayā 59 Bible Online

Isayā 59 - Car_Nicobarese bible

Isayā 59

¹Yĕh meuk, öt cheūḵngöre rôta kël an ngam Mā Tēv, töp lökten e nö ötkô nö hayööken, hēk öt filngö elnang, töp lökten nö ötkô nö hang:

²Nup tökööl yīö pöri tököhngen tī tö hôi yīö tö ngam Tēv yī-ö inrē, hanyatngö kūö ò inrē nup tökööl yīö tö yīö, lökten an nö öt hang.

³Pò minë eltī meh nö chōich tökūö mahām, minë kuntī meh inrē tökūö öt lanöökö; ṙô-òvö mine minug inrē tö minyôiny-aṅ kakkö öt lanöökö inrē ngam litāk meh.

⁴Öt hĕng tak töchiplen nö i kinṙòkkö fālen, öt hĕng tak töt michūṙen nö chuh im chöngö: hayönglenre yin i töng kaṙū-aṙôre, ṙô-òv yin nö minyôiny-aṅ, halēn ellōn re yin tö tötlöök ngaich kēnyö öt lanöökö.

⁵Ruknyö kūö uhöö pēch yin, kupāt haveūngö kilrööngö yin inrē: ngaich kapah öp kamā uhöö u ngaich löknyö ël ngam tölakukköiny kūö nö ruknyi kūö öp pēch.

⁶Hö-ö nup haveūngö u nö kanfantenkūö min nö hilā, öt rēhĕn nö kafānöre min yip tarik tö nup kupāt cha. Öt lanöökö nup nö la-en cha, chanökhuṙen tī inrē nö eltī cha.

⁷Fal nup röön cha nö kū-ötö ngam tötlöök, ka-eūyen cha-a inrē nö kitaknyö mahām tötakhaṙa: lōn ötlanöökö nup lōn cha, inhatngö tinṙōlngö inrē nup el talöökö cha.

⁸Rö-ö yin nö akahakūö tö talöökö tölām, öt el talöökö cha inrē ngam kinṙôka cha inrē ngam kinṙôka tötmichūṙen: vī talöököre yin nö kuròk; ngaich yip töng lamök umuh nö öt akahakūö tö lanāmö.

⁹Lökten an ngam kinṙôka töt michūṙen nö marôvat tö hī, ngam lanöökö inrē nö ötkôlö nö in hī; ngëichkö hanātö ayī-ö, yĕh meuk, ngaich nöng sinngūlö; ngëichö töyang ayī-ö, ngaich pöri öi höng lök ël sinngūlö.

¹⁰Ṙēpkö kaha kinlōngö in sā tötmeuk, ṙēpa inrē sā töng ötmātu: kavē-ĕre in i ranònglö ngam tavūöi sā hē ranaklö ò; ngaich in cha ayī-ö yip tökalēḵ alaha öi höng sā tarik tökapah.

¹¹Ayôṙa ṙô in sā ṙô për, sā ṙô nyö-öṅ inrē öi haṙīvölōn ngëichkö inkaha fālen in, hö-övö pöri nö umuh; ngëichkö inyööken in, marôvat pöri angū-ö tö hī.

¹²Pòn ṙūölöre ṙôken në tanôichngen ih nö i kūö meh nö tökööl ih inrē nö hameuktöre nö lā-al ih; pò në tanôichngen ih nöng in ih, akahalōn in tö në kanöölöre:

¹³Mahngö ngam Mā Tēv in i në tanôichngenre, ngaich havööngökūöre i tinömörit ngam Tēv ih, kahôkkö inkihten in inhôngö chöngö inrē, löknyö ellōn nup minyôiny-aṅ ṙô nö chöhlöng löklö, ngaich kaknyuvö nö ṙô.

¹⁴Havööri kūö an ngam tötmichūṙen kinṙôka, sökhak inrē ngam lanöökö nö marôvat: pò ngam kanô-en nö fukngö nö el talöökö, ngaich ngam chaniplen nö ötkô nö kuhēthötre.

¹⁵Hôṅ, hāṅten an ngam kanô-en; ngaich anga-aṅ ngam kumröönngöre nö ṙā-ang im tötlöök nö vītöre nö pôḵ: Meūkö e ngaich ngam Mā Tēv, kunyāhalōn ngaich tö pòn öt kinṙôkavö töt michūṙen umuh.

¹⁶Meuk törö-övö anga-aṅ tarik, ngaich pingangkūö tö törö-övö vamë-elkui: ngaich ap kël ò nö kētö minhôiṅyö ò, öp lanöökö ò inrē nö haköpka nö in ò.

¹⁷Hayutlöre anga-aṅ tö lanöökö nö lanak elngòh ò, i kui ò inrē nö sapīöv ngam inyööken; hayutlöre anga-aṅ tö tökiröng inyut nö invahal vah, kahūmöre inrē tö kinṙum nö i tanānyöre.

¹⁸Sā nuk la-en cha ngatī tī min anga-aṅ nö kē-ĕti, lanīnö in yip lā-al ò inṙënhanga in yip tökunyāha elmat tö ò; kētö invahal min anga-aṅ nö i nup kun panam.

¹⁹Lökten cha min nö löktökūö lā sūng nö pa-ekūö tö minë-eny ngam Mā Tēv, löktökūö lā maneutlö ngam tavūöi öp kanôlò ò: pòn yih min anga-aṅ sā töpôpnyi töhëm mak töföönyuvö tö ngam kuföt ngam Mā Tēv.

²⁰Ngaich yih min anga-aṅ nö i Sīyôn nö sā ṙamānyö, nö in cha yip mahavööngökūöre in Yāköp tö öt lanöökö ṙô ngam Mā Tēv.

²¹In chu pöri, ngih ön kinlēḵngô chu in cha, Ṙô ngam Mā Tēv: öp töhet fanöinylö chu öp mī-ikui meh, nup ṙô chu inrē töchaphötvö nö elvāng meh tö chu, hö-ö min nö meutnyi nö ṙā-ang elvāng meh, ṙā-ang elvāng yip kūön meh hēk ṙā-ang elvāng yip kūön yip kūön meh, ṙô ngam Mā Tēv, löktökūö ngih hē höng örheūheu.