Read Car_Nicobarese Isayā 6 Bible Online

Isayā 6 - Car_Nicobarese bible

Isayā 6

¹Im samyeūheu ök rācha Usāya nö kapah meuk ngam Mā chū-ö nö el kantēra nö ūichhaka, lātulöng hatāilöng inrē, tööḵlö ël ngam töhet chūök tö kanôlò ò tö aṅ në töhĕng chuvi panam.

²Sökhak nö lātulöng tö ò yip seraf: nö kö tafūölö saneòk; nëtö innyatngö kūö anga-aṅ, ane inrē nëtö innyatngö kalröön, nëtö kinteū anga-aṅ inrē.

³Ngaich kö ṙô-òvö cha-a tö höö, nö ngö ṙô, Töhet, töhet, töhet an ngam Mā Tēv yip tömaṙôngö: tööḵlö an ngam panam tökanôlò ò.

⁴Ngaich nuk chūök röön tö kanëchkūö nö kē-ĕng re i ṙô ò öp hamū-a, ngaich ngam patī nö löpngö ël tö lul.

⁵Ngaich ngö ṙô chū-ö, Töt kôlò chin chū-ö! Pò chu öich tököölö fālen; pò chu öich tarik töthëtö minuh, ngaich iyöng ellōn vē tarik chū-ö töt hëtö minuh: pò në mat chu nö ngaich nö meuk ngam Rācha, ngam Mā Tēv yip tömaṙôngö.

⁶Ngaich hĕng tak ök aṅ i seraf kumteūtöre nö in chu, aṅhav eltī tök ihong töṙāch, ök tahôpnyö ò nö ṙā-ang ël ök tahāklö

⁷Suöhtö e anga-aṅ nö i minuh chu, nö ngö ṙô, Yĕh meuk ngaich man suöhtöre minuh tö e; ngaich öp kanöölö meh nö kē-ĕyö, ahëti nö ngaich öp tökööl meh.

⁸Ngaich chū-ö hang ṙô ngam Mā, nö ngö ṙô, Chiāp min tahīnngö chu, achīö min inrē kumröönngöre tahölṙô ih? Ngaich ngö ṙô chū-ö, Ihih chin chū-ö; tīnngen chu.

⁹Ngö ṙô ngaich anga-aṅ, Kuṙòh, ve-enynang vē tarik, Iṙūöhen yin hang, öt akaha elnang pöri; iṙūöhen yin meuk, öt akaha elmat pöri.

¹⁰Vītö tösangöö nö ellōn vē tarik, vīlö lumngan elnang cha inrē, tilupngö mat cha inrē; hòṅ minë mat cha nö öt meuk minë elnang cha inrē nö öt hang, hòn öt akaha ellōn cha-a, ngaich havantöre nö hēk, ngaich lööken.

¹¹Ngaich ngö ṙô chū-ö, Mā, i ṙôktören? Ngaich sap ṙô anga-aṅ nö ngö ṙô, Hanöng saha në elpanam nö piyāyi nö öt aṅhavkūö, öt aṅhavö inrē nup patī tö tarik, ngaich ngam panam inrē nö lëlngö nö keuheūtngöre,

¹²Ngam Mā Tēv inrē nö marôvat tī nö kēngö tarik, ngaich pōyen nup tö ṙā-ayö chūökö ellōn ngam panam.

¹³Ngaich yē e nö umuh nö ṙòngmö hĕng tit i tösöm in e, nyā-aṅyö min angū-ö nö hēk: sā öp tarpin sā ōk, öp töng ōtre yĕn pòrô nö sukngö re rōi, ngatī öp töhet kulöl nö aṅhav-in töp töhet alaha re.