Read Car_Nicobarese Isayā 60 Bible Online

Isayā 60 - Car_Nicobarese bible

Isayā 60

¹Choholre, hayāngöre; tön yih an ngam hanātö meh, meutlö inrē ngam kanôlò ngam Mā Tēv nö i kui meh.

²Yĕh meuk, pò ngam sinngūlö min nö kahultökui ngam tumlat, tökufëi sinngūlö inrē nö i kui yip tarik; choholre pöri min ngam Mā Tēv meh, ngaich meūkö min ngam kanôlò ò nö i kui meh.

³Ngaich yih min yip pumnāmö tarik nö im hanātö meh, yanāngökūö ngam maneutlö meh.

⁴Havīngömatre man môklökūöre, ngëicha: ṙòkhöre yin nö hamūlöre, yih yin nö in meh: ṙā-ang tömarôvat yip kūön meh kikōnyö min nö yih, fulka min inrē yip kikānö kūön meh nö el kël.

⁵Ngaich me-eṅ min meuk tö-ayānga inrē, kiröngö ṙanāmölōn min me-eṅ ellōn re; pò nup kanôlò ngam mai min nö kū-ötö in meh, yih min inrē nup kanôlò vē pumnāmö tarik nö in meh.

⁶Nyatngö man min tö ṙôken nup ūṅt, nup tö-ayal ūṅt aṅ Mītiā, Efāh inrē; ṙòkhöre nup min nö yih nö ṙā-ang Sīpā. Kumtö humlum nup min tötahūsa inrē,ngaich ahangnyö nöinyö ngam Mā Tēv min.

⁷Hamūlöre min nup töṙeūla töhĕng mihëṅṙö aṅ Kētar nö in meh, nup kūön sīṅp inrē aṅ Nēpayòt nö meukṙen meh min: yih min anū-ö nö el ngam tahāklö meh nö töhō-ovö, ngaich chū-ö min hapōilö ngam tövai patī re.

⁸Achīö aich vē tö sā vaneūtö röön taṙul, sā pumpa inrē nö i lökhöt kuföt inkūp cha?

⁹Pò nup kun panam min nö hökken chu, urĕh inrē nup chōng aṅ Tarsis, nö kumtö yip kikōnyö kūön meh nö ṙā-ang tömarôvat, kum cha nup rupīö humlum cha inrē, nö i mine-eny ngam Mā Tēv ngam Tēv yīö, im Töhĕng Töhet inrē aṅ in Israĕl, pò ò nö hapōilen meh.

¹⁰Katöplö kinlonglö meh yip min aṅ tahëng meukṙen meh min inrē yip rācha: pò chu fōho meh i lanīnöre, aṙē-ĕlōn pöri tö meh i miṙēlōnre,

¹¹Urāngen nup min inkūp meh nö luvë-akkūö; hö-ö nup min nö öpikūö tö sakāmö hatööm inrē; hòṅ yip tarik min nö kumtö kanôlò vē pumnāmö tarik nö yih nö in meh, nö hol re tö yip rācha cha nö ṙākö röön nö kiröönngöre.

¹²Pò öp töt lamök la-en chu min pumnāmö tarik, pūlngö inrē nö öt kôlò; hôṅ, hatngö yip min cha-a pumnāmö tarik.

¹³Yih öp min kanôlò Lëpanön nö in meh, nup sītör chōn, pāin, holre tö nup kasòng chōn inrē; nö havailö ngam chūök el ngam töhet chūök chu, ngaich chū-ö min havailö ngam chūökröön re öich vī-i e.

¹⁴Ngaich yih min nö in meh yip kikōnyö kūön yip mahakihten meh nö tumṙeūtöre nö sōnngöre nö in meh; ṙòkhöre min inrē yip tömināch tö meh nö sōnngöre nö i röön meh; Elpanam ngam Mā Tēv ngö ṙô yip min nö havëken meh, ngam Sīyôn aṅ im Töhĕng Töhet in Israĕl.

¹⁵Ngaich me-eṅ sin töṙā-ayö tö surīkiyö inrē nö öt hĕng tak lamök umuh, vīlen meh chin min örheūheu kiröngö lanöökö, ṙanāmölōn i tum samyeūheu.

¹⁶Pōḵ aṅteh yip pumnāmö tarik man min, pōḵ teh yip rācha man min; ngaich akahalōn min me-eṅ tö chu Mā Tēv Mahayööken meh, Ṙamānyen meh inrē, Töhĕng tak aṅ in Yāköp Tömihôiṅ:

¹⁷Kumtö humlum chin min ṙënngen mās, kumtö rupīö chin min ṙënngen vët, mās ṙënngen chōn, vët ṙënngen ihong: ngaich chū-ö min vītö lanāmö in meh in yip mameukken meh, lanöökö inrē in yip yöngṙen meh la-evṙen.

¹⁸Öt ōtre hināngö min chanökhuṙen nö im panam meh, inhatngö hēk tinṙōlhanga nö ellōn ngam panam meh; Inyööken pöri min ṙô meh tö minë kinlonglö meh, nöinyö inrē minë inkūp meh.

¹⁹Öt ngöhören min ngam tavūöi nö hanātö mat meh tö sakāmö; öt rēhĕn ngam yanāngö mat ngam chingëṅt min nö hātö tī tö meh tö hatööm: ngam Mā Tēv meh pöri min nö in meh nö töng örheūheu nö hanātö, ngam Tēv meh inrē min nö lanöökö meh.

²⁰Öt meutti min ngam tavūöi, öt rēhĕn ngam chingëṅt nö heūlngöre; pò ngam Mā Tēv min nö in meh nö örheūheu nö hanātö, keuheūten min nup sakāmö miṙīvlōn meh.

²¹Ṙòkhöre min inrē yip tarik meh nö tölöök, amīnu yip min tö ngam panam nö örheūheu; ngam maneuinylö ngam taneūich chu, vahī në kuntī chu, hòṅ chu hapōilöngö.

²²Öp manā-angkūö tökūöṅnö min vītöre nö yöngkūö minyöngö tarik, öp tökūöṅnö inrē tökalēḵ nö pumnāmö tarik; chū-ö chin Mā Tēv; kumeuiten e chin min ip hē e.