Read Car_Nicobarese Isayā 61 Bible Online

Isayā 61 - Car_Nicobarese bible

Isayā 61

¹I kui chu an ngam Töhet Fanöinylö ngam Mā Tēv, pò ngam Mā Tēv nö hacham kui chu öich kētö tölöök inhānga in yip töhakihtuṙen; tinngen chu an chömlö tölakūki ellōn, ahangkö ṙinānyö tökē-ĕ, linöpnyö kūö chūök insongngö tarik tö yip tönyëki ël e;

²Ahangkö ngam töhō-ov samyeūheu ngam Mā Tēv, ngam sakāmö invahalvah inrē aṅ im Mā Tēv; inṙamlōn yip töhaṙivlōn inrē;

³Kē-ĕkūö yip töhaṙivlōn inrē i Sīyôn tö neūmö ṙënngen tisum, tavī-i ṙanāmölōn inrē nö ṙënngen miṙivlōn, nöinyö inrē kinṙum nö ṙënngen tötkalē-en ellōn; hòṅ cha nö kaheūkö nö ōk chōn lanöökö, nö taheūichtö ngam Mā Tēv, hòṅ ò nö hapōilöngö.

⁴Mānlö ngam hötṙeh yip min töpiyāyi, katöplö ngam mu-urēhĕ pinyāingö yip min; vītit nup elpanam yip min töpiyāyi nup piyāingö töṙōlkölchap tarik.

⁵Sökhak yip aṅ tahëng min nö ha-aṅlö kiteūmö töhĕng mihëṅrö chehen meh aṅ tahëng min inrē yip kumköh el panô-òṅ meh kamrān vāin inrē.

⁶Kaheūkö pöri min yī-ö öi kūönṙô ngam Mā Tēv mameukṙen ngam Tēv hī yin min tö ṙô yip tarik; nyā-aṅvkūö yin min tö kanôlò pumnāmö tarik, eū-eu yin min i nup kanôlò cha.

⁷Nëtö minchööḵö yin min nö ṙënngen sumrōngkūö yīö, ṙāmölōn yin min inrē nö ṙënngen minṙēngö yīö; lökten yin min im panam re öi nëtö amin: öt chanūhuvṙen ṙanāmölōn min yī-ö.

⁸Pò ngam Mā Tēv nö hāngenlōn tö tötmichūṙen kinṙôka surīkhö unlāya chin tövaich inrē; kô-en chin min kē-ĕkūö cha tö invāhal in cha, vītö ngam tötchanūhuvṙen kinlēḵngô min chū-ö in cha.

⁹Akaha yip min mumātö cha nö i vē pumnāmö tarik, yip kūön cha inrē nö el ṙôngö vē tarik; akaha cha min nö ṙòkhöre yip mameūkö cha, tö cha nö tarik töhakôlöng ṙô tö ngam Mā Tēv.

¹⁰Pōyen ṙanāmölōn im Mā Tēv ṙamö ellōn chin min im Tēv chu; pò ò nö kafānö chu tö hilā inyööken, kahūmö chu an tö tökiröng inyut lanöökö sā ngam kikōnyö töhapīhö nö eūmlöre ngam kikānö inrē töhapīhö nö hanyöṅtlöre tö töpōiṙāi yanöṅtö.

¹¹Pòn sā ngam tumlat nö meunylö aṅkūö ngam panô-òṅ inrē nö sīöplö aṅkūö tö nup töteūichtu nö ël e, ngatī ngam Mā Tēv min nö vītö ngam lanöökö nöinyö inrē nö sīöplö nö i kūö pumnāmö tarik.