Read Car_Nicobarese Isayā 62 Bible Online

Isayā 62 - Car_Nicobarese bible

Isayā 62

¹Kūö Sīyôn chin öt hòṅ ṙāngôre, kūö Yērusalem chin inrē öt hòṅ heuhtöre, hanöng saha ngam lanöökö ò nö kiröönngöre nö sā töyang, ngam inyööken ò inrē nö sā töhūkūö ëāṅvö.

²Meuk lanöökö meh yip min pumnāmö tarik, meuk kanôlò meh inrē yip rācha: ngaich me-eṅ min kaheūkö minë-eny tö tufömngöre, öp kahëtö ngam elvāng ngam Mā Tēv min.

³Tövai man min sapīöv rācha eltī ngam Mā Tēv, sapīöv rācha eltī ngam Mā Tēv meh.

⁴Hö-ö man min Töṙā-aiṙen invëka; öt rēhĕn ngam panam meh min nö Tötaṅhaṅvkūö invëka: Kaheūkö pöri min me-eṅ öm In ò, ap ṙanāmölōn chu, Pīhövö inrē ngam panam meh: pò ngam Mā Tēv nö ṙāmölōn nö in meh, ngaich ngam panam meh min nö pīhövö.

⁵Sā ṙāl tarik nö pīhö tö rēlö, ngatī yip kikōnyö kūön meh min nö pīhö meh, sā ngam kikōnyö töhapīhö nö ṙāmölōn nö im kikānö töhapīhö, ngatī min ngam Tēv meh nö ṙāmölōn nö in meh.

⁶Ō Yērusalem, ṙātö amahaṅti chin i kui minë kinlonglö meh; öt ṙāngö ṙôre yip min irô-òtö sakāmö hatööm inrē, yī-ö famëḵlö ngam Mā Tēv, uh yin heūheure.

⁷Ui kētö haneūheu ò inrē hanöng saha Ò nö köpö tī tö Yerusalem nö vīten e nö ineū-eu nö ing tumlat.

⁸Chūökuṙô an ngam Mā Tēv nö im lāhāmö kël re im tökalēḵ inrē kël ò, hö-ö chin min kēngö ngam sāiny meh nö nyā-aṅkūö yip tökunyaha elmat tö meh; öt ôkö nup min inrē vāin meh nup halinten meh tö aṅ tahëng;

⁹Acha-a pöri min nyamā-aṅvkūö tö u yip mahachūökngö u acha-a inrē yip mahamūlö u min nö ôkö u el milūkö ngam töhet chūök.

¹⁰Kuṙòh, kuṙòh kiröönngöre lök i minë inkūp; halēn talöökö yip tarik, afônglö, afônglö ngam tökiröng talöökö; kēngö nup ihong; hatamlö ngam minkahngö in yip tarik.

¹¹Yĕh meuk, söl manā-angkūö ngih tumlat an ngam Mā Tēv nö ahangka, ngö ṙô yin tap kikānö kūön Sīyôn, Yĕh meuk, yih an ngam inyööken meh; yĕh meuk, kum ò ap raneushö, urēhĕkūö ò an inrē ngam invahalvah.

¹²Ngaich cha-a min nö kaheūkö nö Töhet tarik, Töṙānyu tö ngam Mā Tēv; ngaich me-eṅ min kaheūkö Töchöhöh, elpanam tötṙā-aiṙen.