Read Car_Nicobarese Isayā 63 Bible Online

Isayā 63 - Car_Nicobarese bible

Isayā 63

¹Achīö ang ngòh yamih nö ṙā-ang Ētöm, töngāṅvö mat inyut ṙamā-ang Pòsrah, ngam tövai nö im inyutre, kiröönngöre an nö i ṙôkö kumlēḵ re? Chū-ö chin tö ṙôtö lanöökö, tökalēḵ hayööken.

²Kūöyòh öng ngam inyut meh nö ngāṅvö mat, ngam hilā meh inrē nö sā mat hilā ramöön kinrān vāin?

³Höng hēngö röön chin röön ngam kinrān vāin öt hĕng tak hol chin inrē tö aṅ in yip tarik; i tanānyöre chin rööntö kui cha i lanīnö re inrē öich kirāichtö kui cha; mahām nômö cha an ngam tökachenyköti nö i mat hilā chu, keuheūtngöre mat an nö ngaich ngam hilā chu nö paṙòk.

⁴Pòn ellōn chu ngam sakāmö invahalvah, ngaich nö yih inrē ngam samyeūheu ṙinānyi tö chu.

⁵Ngëicha chū-ö ngaich öt hĕng tak töhòṅ holṙen; pingangkūö chū-ö ngaich, pòn öt hĕng tak ṙamāpa: lökten ngam kël chu nö kētö minhôiṅyö chu, ṙapken chu inrē ngam lanīnö chu.

⁶I tanānyöre chin rööntö kui yip tarik, mihiyōingen cha chin tö ngam lanīnöre, ngaich vōknyö mahām nômö cha nö el tumlat.

⁷Hòṅ kakkö hanāngen neūkölōn ngam Mā Tēv chin, ineū-euṅ ngam Mā Tēv inrē sā ṙôken tī ngam Mā Tēv nö kē-ĕti nö in hī, ngam tökiröng lanöökö inrē i patī Israĕl ngam kahëtö ò nö in cha sā ṙôkö miṙēlōn ò, sā ṙôkö öp tököp hanāngenlōn ò.

⁸Pòn ngö ṙô anga-aṅ, Tārik chu tal yin vē tarik, kikōnyö kūön töthō nö michūṙen; lökten ò nö Mahayööken cha.

⁹Kihngen anga-aṅ i nup kanihngen cha nö ṙòkhöre, hayööken cha inrē öp ma-ahānga in ò; i hanāngenlōn ò i miṙēlōn ò inrē anga-aṅ nö ṙānyen cha; chātlen cha anga-aṅ ngaich tayuklen cha löktö kūö nuk sakāmö hötṙeh.

¹⁰Ahôngen ò pöri cha-a miṙivngölōn ngam Töhet Fanöinylö ò inrē; lökten ò nö vītöre nö lā-al cha, kôten inrē anga-aṅ nö lā-al cha.

¹¹Fē-ĕlre ngaich anga-aṅ tö nuk sakāmö misī, tö Môsös ök tarik ò. Isuh öku ök kamënyen ih ṙā-ang ël ap mai yip yōm nup pököre ò? Isuh ap anga-aṅ ap chamaphöt ngam Töhet Fanöinylöre nö elṙôngö cha,

¹²Öt tötī-iv tö ngam tökôlò kël ò nö lök lāhāmö Môsös, ök maharēv minë mak nö i kūö cha nö vītö minë-enyre tö tötchanūhuvṙen,

¹³Ök mahachōkūö cha nö lök ël tö-aṙū? Sā kōra nö el kuyāyö tönyaṅlnyi nö öt kavē-ĕre.

¹⁴Sā nuā pameūtöre nö el achāṙö, ngam töhet Fanöinylö ngam Mā Tēv nö kētö haneūheu cha. Ngatī tī me-eṅ hachōkūö vē tarik, öm vīlö minë-enyre tö tökôlò.

¹⁵Löktö el halīöngö mat man ngëicha, ṙā-ang im töhet tölöök elyöngö meh. I chūök kumlēḵlōn meh kumlēḵ meh inrē? Öp kū-ö öp lōn meh ngam miṙēlōn meh inrē nö haköpi nö öt in chu.

¹⁶Pò meh me-eṅ yöng ih, pòrô Aprahām nö öt akahakūö tö ih rö-ö inrē Israĕl nö akahngen ih: Ō Mā Tēv me-eṅ man Yöng ih, Ṙāmānyen ih lamöktökūö misī ngam minë-eny meh.

¹⁷Ō Mā Tēv, kūöyòh ömeh vī-i ih vāichö kū-ötö ngam talöökö meh öm öt hangëṅngö ellōn ih inrē, tö lökten ih öt pa-ekūö tö meh? Chö-öinytö tarik re man yēḵ havantöre, vē miyöngö yip amin meh.

¹⁸Höng rahëchtaṙen yin vē töhet tarik meh nö amīnu tö ngam töhet chūök meh, ngaich yip tökunyaha-elmat tö ih nö rööntö kui e.

¹⁹Ngaich īhö sā cha yip töt hayöngö tö meh, sā cha yip töt havëka tö ngam minë-eny meh.