Read Car_Nicobarese Isayā 64 Bible Online

Isayā 64 - Car_Nicobarese bible

Isayā 64

¹Mah, tikachnyö kūö minë halīöngö man öre öm yônti, hòṅ në rôngö nö kayīna nö i kūö meh;

²Sā anöktö kūö ap tameūyö nö elyul chōn sā tameūyö inrē nö pököti tö mak, öm vīten ngam minë-eny meh nö akahaiṙen tö yip tökunyaha elmat tö meh, hòṅ vē pumnāmö tarik nö kichëyöre nö i kūö meh!

³Yē meh tī tö pinhë-eṅkūö nup töt akahten ih, yônti me-eṅ ngaich, kayīna ngaich minë rôngö nö i kūö meh.

⁴Löktökūö misī nö öt hĕng tak hamang hēk öt akaha elnang, öt hĕng tak mameuk Tēv öp hol meh, öp töla-evṙen tö pòkūö cha yip hamökken ò.

⁵Höngkūö ò me-eṅ öp tö ṙāmölōn nö la-evṙen tö lanöökö, acha-a yip tö köpölōn tö meh i nup talöökö meh, Yĕh meuk, līn man, köölö fālen īhö: marô-òten in ngaich i në tökööl re, hayöökaṙen öi min?

⁶Ṙòkhöre in ngaich vītöre sā öp töthet, ṙòkhöre nup tölöök la-en ih nö sā tömūmu mat hilā. Nyīkngö in sā rōichōn; kē-ĕyö in tö nup tökööl re, sā kuföt.

⁷Öt hĕng tak mahavëkö minë-eny meh öp mahachohköre nö ṙapngö tī re nö in meh; pò meh hanyatngökūöre tö ih, ngaich kēngen ih eltī nup öt lanöökö ih.

⁸Töngamuh pöri me-eṅ ngaich Yöng ih, Ō Mā Tēv; tilin in īhö vamī tanīöyö me-eṅ; ṙòkhöre in īhö vahī minë kuntī meh.

⁹Ō Mā Tēv uh man kalē-ĕ lanīnö, um köpölōn inrē örheūheu tö kanöölö ih; yĕh meuk, ngëicha, tarik meh in īhö ṙòkhöre.

¹⁰El inchōn nun minë töhet elpanam meh nö ngaich, vītöre an Sīyôn nö el inchōn, öt aṅhavkūö Yērusalem.

¹¹Haṙāpi tö tameūyö nup töhet tövai patī ih, i chūök yik muvöhngö ih nö ha-öinyö meh; ṙòkhöre nuk tölöök chehen ih nö piyāyi.

¹²Ō Mā Tēv ṙāpöre ömeh in u? Öt hòṅ ṙô-òvö ömeh, hakihten ih inrē öm kalē-ĕtī?