Read Car_Nicobarese Isayā 65 Bible Online

Isayā 65 - Car_Nicobarese bible

Isayā 65

¹Lēnen chin öich chöhöh tö cha yip töt mahatönken chu; tölēn chin ngaich öich kôti tö tī cha yip töt chamöhöh chu. Ngö ṙô chū-ö, Ihih chīni, ihih chīni, tö pumnāmö tarik öp töt mahavëkö minë-eny chu.

²Sumkāmu chin hanyāknyö kël re i tarik ma-ahôngen, yip lamök ip talöökö öp tötlöök, nö tömrit kuilōn re;

³Yip tarik tö-iṙūöhen nö harunnyö lanīnö nö i kūö chu, kētö tökētu nö el panô-òṅ föng tötahūsa inrē nö i kui īt;

⁴Yip amūchhaka nö i kui mitīlö, ngaich keuheūtngö hatööm nö ël nup töhayūni chūökö; yip kamā alaha ha-un, hūt inrē nup sin-òkkūö el nup tanīönyö cha;

⁵Yip tö ngö ṙô, Um halöinyköre, um haröhtöre in chu tön töhet chin tö meh. Lul elmeh chu nun anū-ö, tameūyö töhĕng sumkam nö hū.

⁶Yĕh meuk, kūichiyö an nö i kui chu; hö-ö chin min hòṅ ṙāngöre, haṙënhangen pöri, hôṅ, elngòh cha tī chin min haṙënngen,

⁷Nup kanöölö cha nö holre tö nup kanöölö yik muvöhngö cha, ṙô ngam Mā Tēv; pò cha nö föng tötahūsa nö i kui minë rôngö ötlēkôre inrē tö chu nö i kui minë rung, kalah nup invahalvah chin elngòh cha tī kūö nuk lā-urĕh la-en cha.

⁸Ngö ṙô an ngam Mā Tēv, Sā ngam vāin nö kôti nö im töhĕng tum, ngaich ngö ṙô cha-a, Uh an nö filösi mat, tön in e ap inkôlò, ngaich ngatī chū-ö min tökūö yip tarik re öich öt fëlngen cha nö ṙòkhöre.

⁹Kēnyö yip kūön chin min nö löknyö in Yāköp, löknyö in Yūtā inrē yip tö-amīnu tö në rôngö chu; aminten e yip min katöllö chu, iyöng umuh min inrē yip tarik chu.

¹⁰Vītöre min Sāròn nö kiyôp nyā-aṅkūö töṙeūla, ngam Achāṙö Akōr inrē nö chūök töṙeūla nö hulalhaka, pòkūö yip tarik chu chamöhö chu.

¹¹Yī-ö pöri ṙamāngö ngam Mā Ṭev, öi tövachngö tö ngam töhet rôngö chu yī-ö vamīlö mīs Kanôlò ngaich hatööḵlö nup kulah tö vāin tökatēhĕ tö öp Tölngökūö;

¹²Tölngökūö ngam sanët tī chin tö yīö ṙòkhöre min yī-ö inrē sōnngöre i kūö öp famëlhanga; pò yīö öt sapṙô chu hē chu havëken yīö, öt hang yī-ö, hē chu vë-ekūö yīö, ngaich pöri yī-ö öi i kūö chu la-evṙen tö tötlöök, ngaich atöllö ngam töt chūök kumchiklōn chu.

¹³Lökten an ngam Mā Tēv nö ngö ṙô: Yĕh meuk, nyā-aṅvkūö yip min tarik chu, kapahare pöri min yī-ö; Yĕh meuk, òk yip min tarik, chu, haṙëhe nômö pöri min yī-ö; Yĕh meuk, ṙāmölōn yip min tarik chu, sumrōngikūö pöri min yī-ö;

¹⁴Yĕh meuk, tikökṙôre yip min tarik chu tökūö ṙanāmö ellōn re peuiny pöri min yī-ö tökūö chanökö ellōn re, harāmöre min inrē tökūö yöng miṙivlōn.

¹⁵Ṙāngö ngam minë-eny re man min in yip katöllö chu nö ranôichngen, ngaich fëli min me-eṅ tö ngam Mā Tēv; ngaich pöri min yip tarik ò nö kaheūkö minë-eny tö ò tö tahëng.

¹⁶Lökten ò ngam mahakôlòre nö ing panam nö lökten im Tēv kanô-en min nö hakôlòre, anga-aṅ inrē öp töchūöku ṙô nö ing panam im Tēv kanô-en chūök ṙô min; pò nuk lā-urĕh kanihngen nö vāchiyö nyatngö inrē nö i mat chu.

¹⁷Lökten yĕh meuk, vīlö tufömngöre chin halīöngö tufömngöre tumlat inrē: ngaich nup lamā-urĕh min nö vāchiyö hēk nup mu-unôich min nö öt fēkaṙen.

¹⁸Ṙāmölōn pöri yī-ö yēḵ örheūheu i ngam vahīlö chu; yĕh meuk, pò chu vīlen Yērusalem nö ṙanāmölōn, yip tarik ò min inrē nö inṙamlōn.

¹⁹Ṙāmölōn chin min in Yērusalem ṙāmölōn inrē in yip tarik re; öt hāngö ṙô min pineūinyö nö hēk nö in e öp inyôṙö ṙô kanihngen inrē.

²⁰Öt tënuvö min nyīö inrē tö aṅ nöng öt ṙōl sumkam, hēk öt tököinyu tarik tötkumheūṅtngö sakāmö re, pò ngòh nyīö min nö hēngòng samyeūheu ṙēti nö kapah, öp tököölö fālen min inrē nö hēngòng samyeūheu ṙēti nö öthakôlöng ṙô.

²¹Mānlö patī re min cha-a iyöng ël u inrē, teūich vāin min cha-a nyā ṙòng u inrē.

²²Hö-ö cha-a min nö mānö ngaich iyöngö ël angū-ö tö tahëng; öt teūich min cha-a ngaich nyā-aṅ anū-ö tö tahëng pòn sā nup sakāmö ngam chōn ngatī nup sakāmö vē tarik chu, marô-òten yip min katöllö chu nö kumchikngenre nö i nup vahīṙen kuntī cha.

²³Öt chök alaha yip min nö la-evṙen, hēk öt chök alaha nö kayônyö nyīö nö lamöö i kanihngen; pò cha min nö lamökngörit tökôlò aṅ im Mā Tēv, hol cha inrē yip kūön cha.

²⁴Sapṙô cha min chū-ö urēhĕkūö cha nö havë-a, hang chū-ö min yē cha nö ṙònghöichṙô.

²⁵Holkūöre min nö nyā-aṅvkūö am aṅ el inchōn tö kūön sīṅp, nyā kiyôp min ngam lāyön nö sā nuā; tumlat pöri min nyā-aṅkūö ngam pēch. I kui ngam töhet rôngö chu nup min nö ṙòkhöre nö öt hachök öt fëlhanga inrē, ṙô ngam Mā Tēv.