Read Car_Nicobarese Isayā 66 Bible Online

Isayā 66 - Car_Nicobarese bible

Isayā 66

¹Ngö ṙô an ngam Mā Tēv: Kantēra chu an ngam halīöngö ranöönö röön chu inrē ngam tumlat; patī yòh öp min patī mahānlö yīö patī chu? Asuh ap chūök chu min heūheure?

²Vahīṙen në kuntī chu nun në, lökten në taṙòkhöre nö chū-ö chu, ṙô ngam Mā Tēv Ngòh pöri tarik ngahëichkö chu min, ngòh yāich töhaṙivlōn tö tökööl re inrē, tökichëyöre inrē tökūö ṙô chu.

³Ngòh ṙamatnyö likeun nuā sā ò an ngam famëlngö tarik; ngam kamëtö kūön sīṅp tökētu sā ò an ngam lumreukngö likeun am; ngòh kamëtö sāiny nö tökētu, sā ò an ngam kamëtö mahām ha-un, ngam kamëtö tötahūsa inköpkölōn tökētu, sā ò an ngam mahakôlò insātēv. Atöllö talöököre yin cha-a, kumchikngö ellōnre inrē, nö i sin-òkkūö;

⁴Atöllö kanihngen chin chū-ö inrē in cha, kētö pinhe-eṅkūö cha inrē i kui cha; pòn öt hĕng tak samap ṙô hē chu havë-a, öt hang cha-a hē chu ṙô-òv; ngaich pöri cha-a nö i kūö chu nö la-evṙen tö tötlöök, ngaich atöllö e ngam töt chūök kumchiklōn chu.

⁵Hangihtöre tö ṙô ngam Mā Tēv, yī-ö tökichëyöre tökūö ṙô ò; öp sumrīkhen meh hanöng kisānö meh kamvalngen meh inrē pòkūö ngam minë-eny chu, ngö ṙô ana, Hökngen ngam Mā Tēv nö ineū-euṅv, hòṅ ih meuk ṙanāmölōn meh; acha-a pöri min tö sumrōngikūö.

⁶Hangihtöre, tinṙōlö ṙô ap elpanam! Ṙënṙô ap el ngam töhet chūök! Ṙënṙô ngam Mā Tēv, nö kētö invahal nö i yip lā-al ò!

⁷Urēhĕkūö inlöinyö ò, kayônyu ngaich ngam nyīö; urēhĕkūö chanökö ò nö yih nö in ò ngam nyīö kikōnyö nö talōköiny.

⁸Achīö ap hamang tö ngatī? Achīö ap mameuk tö ngatī? Höng hĕng sumkam kinyônyi öng ngih panam min höng ilööṙen sanīöplö öng ngih pumnāmö tarik? Pòn hē Sīyôn nö halöinyöre ngaich möl anga-aṅ nö kayônyö kikōnyö kūön re.

⁹Höng talōköiny kūön öich min, öich öthalöinynyö kunyī-i ò? ṙô ngam Mā Tēv; kô-òren öichu löpngökūö chūök kanūönö re, öich mahalöinynyö rinööichnyö ò? ṙô ngam Mā Tēv.

¹⁰Hol Yērusalem yin ṙāmölōn, ṙāmölōn inrē tökūö ò, yī-ö töhāngen tö ò; hol ò yin ṙāmölōn, ṙòkhöre yī-ö töhaṙivlōn tö ò;

¹¹Hòṅ yīö pōḵ ngaich tööḵngen tö aṅteh ò inṙamlōn; hòṅ yīö hatööḵöngkūöre pōḵ holtö kumchik ellōn re öi im töpōiyen kanôlò ò.

¹²Tön ngö ṙô an ngam Mā Tēv: Yĕh meuk, ṙūönyö kanôlò ò chin min nö sā tahël, nup chehen pumnāmö tarik min inrē nö sā tinṙēchlö töhëm mak; ngaich pōḵ min yī-ö, ngaich tētö öi i kūö takeun ò, ngaich kiṙīömö öi i kui kinmônö ò.

¹³Öi sā töhaṙamölōn tö yöng re kikānö, ngatī chū-ö min haṙamlōn yīö; ṙāmölōn yin min i Yērusalem.

¹⁴Meuk yin min, ngaich ṙāmö ellōn yī-ö min ayallöre min nup tangëḵ yīö nö sā kiyôp; ngaich akahaiṙen min angū-ö tö ngam kël ngam Mā Tēv nö in yip tarik ò, in yip lā-al ò pöri ngam lanīnö ò,

¹⁵Yĕh meuk, tameūyö an min ngam Mā Tēv nö yih, nup inröl ò min inrē sā lamfeui kuföt, nö kētö öp tanānyö ò nö kalēḵ, öp inkësö tö ò inrē nö holkūö tö hanūkūö tameūyö.

¹⁶Pòn lökten i tameūyö min ngam Mā Tēv nö kahôka im inkaha fālen, lökten im sanët ò, i kui taṙòkhöre tarik; pōyen yip min töfëliyö tö ngam Mā Tēv.

¹⁷Acha-a yip ma-ahetlöre nö chuh el minë panô-òṅ, tömkörit öp hĕng tak ellōn, kāḵ alaha ha-un nup sin-òkkūö kumit inrē, öt ngöhören min angū-ö, ṙô ngam Mā Tēv.

¹⁸Pò chu akahalōn tö la-en cha, lōn cha inrē, ngaich chū-ö yih hamūl pumnāmö tarik, ëlô inrē; ngaich yih min cha-a ngaich meuk kanôlò chu.

¹⁹Ngaich chū-ö min asöklö minkahngö in cha. Ṙeū-eung in cha min chū-ö tīntö yip tö-aṅ in yip pumnāmö tarik, i Tarsis, Put, Lut inrē, yip lumreiny, i Tūpòl, Yavān inrē, i nup kun panam tömarôvat, yip tö öl nö hang ineūnyö chu hēk öt meuk kanôlò chu; ngaich cha-a min nö vënyö kanôlò chu in vē pumnāmö tarik.

²⁰Ngaich cha-a min nö kētö yip makalaha yīö nö ṙòkhöre nö ṙā-ang in yip pumnāmö tarik nö sā tökētu nö im Mā Tēv, i uk kōra, el inröl, el tö keūnö chūök tarik, i uk köttö, i uk ūṅt inrē, nö im töhet rôngö chu Yērusalem, ṙô ngam Mā Tēv, höng sā yip aṅ Israĕl nö kētö sāiny tökētu nö el töhet chūökṙen nö el patī ngam Mā Tēv.

²¹Haroh tum tak in cha inrē min tökē-ĕ tö chu nö kūönṙô i la-en Lēvi inrē, ṙô ngam Mā Tēv.

²²Pòn sā minë tufömngöre halīöngö tufömngöre tumlat inrē nup vahī chu min nö ōtre nö i kūö chu, ṙô ngam Mā Tēv; ngatī yip kūön meh min tö ngam minë-eny meh inrē nö ōtre.

²³Löktökūö ngam tufömngöre chingëṅt söl im tufömngöre chingëṅt, löktökūö ngam töhet sakāmö inrē söl im töhet sakāmö min vē taṙòkhöre tarik nö yih nö afukngöre nö i kūö chu, ṙô ngam Mā Tēv.

²⁴Ngaich kiröönngöre min cha-a nö ngëichkö alaha yip tökapah tarik aṅ in yik tarik yik ma-ahôngen chu; pò nup kamlökö cha min nö öt kapah, öp tameūyö cha min nö öt hanyāngi kūö, ngaich acha-a min nö sin-òkkūö taṙòkhöre tarik.