Read Car_Nicobarese Isayā 7 Bible Online

Isayā 7 - Car_Nicobarese bible

Isayā 7

¹Ngaich ngö inlahen angū-ö i nup sakāmö Ahas ök kikōnyö kūön Yôtam, ök kikōnyö kūön Usāya, rācha aṅ Israĕl, ang Rēsin ök rācha aṅ Sīria, Pēkah inrē ök kikōnyö kūön Ramalaya, rācha aṅ Israĕl, nö chuh Yērusalem nö kiyung nö lā-al e, ötkô pöri tö e.

²Ngaich vënyu angū-ö nö i patī Tāvit, nö ngö ṙô, Hol ellōn re nap nāṅ Sīria tö Ifrēm inrē. Ngaich ök ellōn ò nö halöinyköre, ellōn yik tarik ò inrē, sā chōn elinchōn tö halöinyka tö kuföt.

³Ngaich ngö ṙô ngam Mā Tēv tö Israyā, Kuṙòh höngkūö Ahas, me-eṅ Sī-aryasup inrē ap kikōnyö kūön meh, ip tölngö hanëmnyö kūö ap mak ap lātulöng törūḵngö mak ip tökiröng talöökö öp chūök samöch hilā;

⁴Ngö ṙô tö ò, Haṙēmngenre, ṙātö alahare inrē; un pa-ekūö, un rēhĕn ngam ellōn meh nö pa-ekūö, tökūö në tönët lamrit öp lul töhūkūö tameūyö Rēsin, Sīria inrē, tökūö öp kikōnyö kūön Ramalaya inrē.

⁵Pò Sīria nö halēnlö töchōch nö lā-al meh, Ifrēm inrē, ngam kikōnyö inrē kūön Ramalaya, nö ngö ṙô,

⁶Tā-a tai kiröönngöre lā-al Yūtā, hakihten e inrē, tā-a inrē tai hamëngnyö lökhötre in e, ngaich ha-ūichlö rācha hĕng tak nö ellōn e, öp kikōnyö kūön Tapīl:

⁷Ngöṙô an ngam Mā Tēv: Öt kô-òl kui öp min, öt rēhĕn nö teungtökūö, min;

⁸Pò öp kui Sīria nö Tamāskös, öp kui Tamāskös inrē nö Rēsin: ngaich i ël tö tafūöl anāi tafūöl samyeūheu min Ifrēm nö panyeny nö lāköl, lökten e nö öt tarik:

⁹Samariā inrē kui Ifrēm öp kikōnyö inrē kūön Ramalaya kui Samariā. Yē yīö öt ṙatö ellōn re, öthō yin min köp.

¹⁰Ngaich ngam Mā Tēv nö hēk nö vë-ekūö Ahas, nö ngö ṙô,

¹¹Havëkö minkahngö man hĕng im Mā Tēv ngam Tēv meh; kömayē-ĕ chūök ṙô öm havëkö e i lātarṙeū, hēk inrē lātulöng.

¹²Ngö ṙô pöri Ahas, Hö-ö chin hòṅ havë-a, öt rēhĕn chin hòṅ kalah ngam Mā Tēv.

¹³Ngaich ngö ṙô anga-aṅ, Hangihtöre yin töngamuh, Ō yī-ö aṅ patī Tāvit, tökūöṅnen öng angū-ö ngam incheikö tarik tö yīö, tö yīö hòṅ hacheikö ngam Tēv chu inrē?

¹⁴Lökten an ngam Mā min nö kē-ĕkūö yīö tö minkahngö. Yĕh meuk hĕng tak öp min töt chô-òv rēlö pumrūkö nyīö, ngaich kayôḵnyö kikōnyö nyīö, ngaich kaheuk minë-eny ò min nö Immanuĕl.

¹⁵Nyā ta-öng öp min höni inrē, hòṅ ò nö akahalōn nö sōḵ tö tötlöök, ngaich atöllö tölöök.

¹⁶Pòn urēhĕkūö ngam nyīö min nö akahakūö nö sōḵ tö tötlöök, ngaich atöllö tölöök, ngam panam min tönët tak rācha sahō-o min yī-ö nö ṙā-ayö.

¹⁷Kētö kui meh an min ngam Mā Tēv, i kui më tarik meh inrē, i kui patī öp yöng meh inrē, nup sakāmö tö-öl tö yīhih, löktökūö ök sakāmö Ifrēm nö ṙā-ang Yūtā; anga-aṅ ök rācha aṅ Asiriā

¹⁸Ngaich ngö inlahen angū-ö min ip sakāmö angū-ö, tö ngam Mā Tēv nö hisngö öp inṙūöi öp i manā-angkūö nup tahël Aikup, hisngö ngam kilamta-ō inrē ngam mī-ip panam Asiriā.

¹⁹Ngaich yih min anū-ö ngaich teungtöre min nö i nup töt aṅhavkūö achāṙö, el manëngö nup ihong inrē, i rōi nup töchökhukūö, i kui nup töyul inrē.

²⁰Im sakāmö angū-ö ngam Mā min nö kuhākö tö kunhāk öp töhaṙūöngka, öp mi-i nup chūökö lāmuh tö ngam Tahël, ip rācha aṅ Asiria, nö kuhāk kui kuhāk sanôi kalröön inrē: kuhākngö sanôi samā kūö min angū-ö inrē.

²¹Ngaich ngö inlahen min ip sakāmö angū-ö, öp tarik min nö haruklö kun nuā kan, nët nòng sīṅp inrē.

²²Ngaich ngö inlahen min anū-ö, pòn pōyen aṅteh u min ngaich nyā ta-öng min anga-aṅ: pò ta-öng min höni inrē nö ṙòkhöre kūö nyamā tö yip tö-ōtren ellōn ngam panam.

²³Ngaich ngö inlahen min ip sakāmö angū-ö, nö keuheūtngöre chūök, i chūök nup tököṅnyu vāin tököṅnyu ṙāi tö rupīö, ngaich nöng chūök töchökhu kaha kun chōn.

²⁴Kumtö chòk linreiny inrē min öp hĕng tak min nö yih nö umuh; pòn ṙòkhöre ngam panam min nö aṅtö töchökhu kaha kun chōn.

²⁵Ṙòkhöre inrē nup rung tö-ūlö tö patuh, öt chuh muh me-eṅ min kūö pinhe-eṅkūöre tö töchökhu kaha kun chōn, ngaich pöri min angū-ö nö tösöömhukūö tö kōiny nuā, chūök röön sīṅp inrē.