Read Car_Nicobarese Isayā 8 Bible Online

Isayā 8 - Car_Nicobarese bible

Isayā 8

¹Ngaich ngö ṙô ngam Mā Tēv tö chu, Hēngö kahë man tö tökiröng tömitāk ihong, ngaich kūich mat e aṅtī tö kanūich tarik, löö in Mahersalālhaspās;

²Ngaich chū-ö min kēḵ tökô-en vamë-eny maheukre nö kūichngen e, Uriyā ök kūönṙô, Sakarīa inrē öp kikōnyö kūön Yeparikiā.

³Ngaich chū-ö chuh ip kikānö pròfĕt; pirūkö nyīö ngaich anga-aṅ kayôḵnyö kikōnyö nyīö ngaich. Ngaich ngö ṙô ngam Mā Tēv tö chu, Kaheuk mine-eny ò nö Mahersalalhaspās.

⁴Pòn urēhĕkūö ngam nyīö min nö huveū-euṙô nö ngö ṙô, Yöng chu kikōnyö, ane inrē, yöng chu kikānö, ngaich nup kanôlò aṅ Tamāskös, nup tökīlö inrē Samarīa min nö kē-ĕyö urēhĕkūö ngam rācha aṅ Asiria.

⁵Hēk ngam Mā Tēv nö vë-ekūö chu; nö ngö ṙô,

⁶Pò vē tarik nö sō-o minë mak Sailoh töṙēmö röön ngaich ṙāmölōn nö in Rēsin ök kikānö kūön Remalaya;

⁷Lökten, yĕh meuk, kēten minë mak an ngam Mā nö i kui cha aṅ ngam Tahël, tökalēḵ töpōyen inrē, anga-aṅ öp rācha Asiria nö im minā-aṅ ò: Ngaich anga-aṅ min yamih nö lök el nup pak e, ngaich havāngngöre min nö i kui e:

⁸Ngaich anga-aṅ min nö lāp röön re nö chuh Yūtā; taṙēchlöngö min anga-aṅ nö lökngö umuh; söllö min anga-aṅ nö i likeun, ngaich ngam innyāṅknyö saneòk ò min nö töö-öl tī tö ṙôktö ngam panam meh, Ō Immanuĕl.

⁹Ayôṙa yin, Ō yī-ö tarik, ngaich yī-ö min panyeny öi liköli; kētö elnangre inrē, ṙòkhöre yī-ö aṅ nup tö marôvat panam: nyëk ṙat re yin, ngaich yī-ö min panyeny öi liköli.

¹⁰Halēnöre holṙen re, ngaich angū-ö min nöng öt teunglen; ṙô-òv tö ngam ṙô, ngaich öt köp min angū-ö: pò ngam Tēv nö in hī.

¹¹Pòn ngö ṙô ngam Mā Tēv tö chu nö holtö kumlēḵ këlre, ngaich haköpten chu inrē öich sōḵtu lök talöökö vē tarik, nö ngö ṙô,

¹²Uh yin ngö ṙô, Inmūlngö töchōch lōn, nup ṙô vē tarik min, uh yī-ö rēhĕn vöö tö e.

¹³Ngam Mā Tēv yip tömaṙôngö, anga-aṅ ahetlö yīö hökngen Ò nö anga-aṅ pinhe-eṅkūö yīö, hökngen Ò inrē nö anga-aṅ vanööṙö yīö.

¹⁴Ngaich anga-aṅ min nö töhet chūök; Ihong pöri nö kinvē-ĕre, tökiröng ihong inrē nö löknyö fālen nup patī Israĕl nö nët re, nö insuk tinngöp yip aṅ Yērusalem inrē.

¹⁵Ngaich maṙôngö min tökavēköti nö umuh, fukngö, ngaich oh, tingöpö inrē, ngaich kē-ĕ.

¹⁶Nyëklö ngam chöngö man, hapanngö ngam inköphöti inrē in yip haköp tö meh.

¹⁷Hòṅ hökkö ngam Mā Tēv chin, ngam mahanyatngö kūö re tö ngam patī Yāköp, chôngken ò chin min.

¹⁸Yĕh meuk, tö chu tö vē nyīö inrē kahëtö ngam Mā Tēv nö in chu nö minkahngö pinngangkūö inrē nö in Israĕl aṅ im Mā Tēv yip tömaṙôngö öp mī-iyöng i kui rung Siyôn.

¹⁹Ngaich yē cha nö ngö ṙô tö yīö, Chöhtö mameuk ma-alaha in cha i yip tömilūönö inrē, yip töchëṅcha ṙô, tökūönti ṙô inrē: hö-ö hòng tarik nö hòṅ chöh ngam Tēv re? Chöh i tökapah ṙöng cha-a nö tö-aṅ?

²⁰Im inköphöti yĕh im chöngö inrē! Yē cha nö öt asā ngih ṙô ṙô nö ṙô-òv, kô-òngrit yip min cha-a nö töt peuheū-euvö:

²¹Ngaich lökngö in e min cha-a, ötkô nö halöinyköre kapahare inrē: ngaich ngö inlahen angū-ö min, hē cha nö kapahare, ngaich cha-a min nö kapahare, ngaich cha-a min nö hakihtenre, ötlēkôre inrē tö ngam rācha re tö ngam Tēv re inrē, ngaich tuvööklö kūöre cha-a nö lātulöng:

²²Ngëchkö el tumlat min cha-a inrē, ngaich meuk, kanihngen singūlö inrē, sinngultö miṙivlōn inrē; ngaich ahōṙi min cha-a nö el tökufëi sinngūlö.