Read Car_Nicobarese Isayā 9 Bible Online

Isayā 9 - Car_Nicobarese bible

Isayā 9

¹Hö-ö pöri min nö tin ūnnguṙen nö umuh nö in ò öp mī-im miṙivlōn. Ik lā-urĕh misī anga-aṅ nö minūöṙô tö ngam panam. Sepulön panam Naftalī inrē; lā unôich pöri anga-aṅ nö vīlen e nö tövai, ip talöökö i kūö mai, lāmuh tö Yôtön, i Kelelī yip tahëng mihëṙö tarik.

²Meuk yöng hanātö yip tarik lamök el singūlö: yang ngam hanātö nö i kui cha yip mi-iyöng elnyat kinpaha.

³Ngaich man ṙūölö ṙôken pumnāmö tarik, ngaich man ṙūölö ṙôken ṙanāmölōn cha: ṙāmölōn yin nö i kūö meh sā ṙanāmölōn mahamūl ṙòng taneūch re, sā ṙanāmölōn tarik yē cha nö michö-ö tö pôḵ re.

⁴Pò ngam kaneun lumngan ò, ngam el ranôṙö ò inrē kaneun, ngam kaneun inkihten ò, nö ngaich nö liköli tö meh nö sā ök sakāmö hē yik aṅ Mitia.

⁵Pò nup lanaklö yip tarik kumyung el tinṙōlen tömaṙôngö, nup inyut inrē nö māchngö tö mahām, ngaich min nö töng föngiyö, nö ngòh kūö tameūyö.

⁶Pòn in hī öp hĕng tak nyīö nö fötnyu, in hī öp kikōnyö nyīö hĕng tak nö kētu; ngaich elranôṙö ò min öp inyöngö: kaheūkö inrē min öp mine-eny ò nö Pinngangkūö, Mahalēn, Tēv Tökeuheūttöre Chöngö, Yöng Tö-örheūheu-aṅ, Rācha kūö Lanāmö.

⁷Aṅ im töṙūölöng ṙôken inyöngö aṅ im lanāmö inrē nöng öt chanūhuvṙen, nö el kantēra Tāvit, i kui ngam pūlngö ò inrē, nö haköpngö e, ṙapkö e inrē nö aṅtī tö inkaha fālen aṅtī tö lanöökö inrē löktökūö ing töngamuh höng örheūheu. Ngam kumlēḵlōn aṅ im Mā Tēv yip tömaṙôngö min mahateungten e.

⁸Söömtö ṙô an ngam Mā nö in Yāköp, ngaich teungtöre angū-ö nö i kui Israĕl.

⁹Ngaich ṙòkhöre min tarik nö akahalōn, Ifrēm tö yip aṅ Samarīa inrē, yip mahakeūlô re i ngane-eṅ ellōn re inrē, nö ngö ṙô,

¹⁰Taṙöli nuk īt, vīlö e pöri min ayī-ö nö ihong tö töfāsö: kūöltu nup nö ngaich sikamôr chōn, haṙī-ing u pöri min ayī-ö tö sitör chōn,

¹¹Lökten an ngam Mā Tēv min nö ha-ūichtö öp lā-al ò nö lātulöng öp lāḵlö Rēsin, ngaich haruhlö alaha yip tökunyaha elmat tö ò;

¹²Lā kūö yip aṅ Siria, lā unôich yip aṅ Filistain; ngaich cha-a min nö ngeūkten Israĕl nö vā-akakūö. Pòrô angū-ö ngih ngaich ngam lanīnö ò nö öt havööṙikūö, ṙòngmöng teuthak pöri ngam kël ò.

¹³Sönngenre yip tarik nö öt havöötökūöre nö in ò ngam famôhò cha, öt rēhĕn cha-a nö chöh ngam Mā Tēv yip tömaṙôngö.

¹⁴Lökten an min ngam Mā Tēv nö rökngö kui Israĕl rökngö lamrit ò inrē, ṙal tö talëḵ kachūr fangngö chōn el silāng inrē, nöng hĕng sumkam tī.

¹⁵Anga-aṅ an kui yip mā misī mā tarik inrē; tö yip pròfĕt inrē mahaköp tö minyôiny-aṅ, anga-aṅ an lamrit.

¹⁶Pò cha yip mahachōḵ kūö vē tarik nö vīngen cha nö vāchö kū-ö; ngaich cha-a yip töhachō-o kūö tö cha nö lëlngö

¹⁷Lökten an ngam Mā min nö öt ṙāmölōn nö in yip ṙāl tarik cha, öt rēhĕn min anga-aṅ nö aṙē-ĕlōn nö in cha yip kūönyōich cha tafīösi inrē: pòn ṙòkhöre nö chōich töla-evṙen inrē tö tötlöök, ṙòkhöre elvāng inrē nö ṙô tö kumlō-ov, kūö në nö ṙòkhöre ngam lanīnö ò nö öt havööṙikūö, ṙòngmöng teuthak pöri ngam kël ò.

¹⁸Pò ngam öt lanöökö nö öktikūö nö sā tameūyö; ngaich an nö ṙāpngökūö tö nup töchökhu kaha chōn; hòṅ öktikūö an tö nup töyul elinchōn, ngaich anū-ö nö tafūönlöng lul nö kū-ötö lātulöng nö el tökufëi taṙul.

¹⁹Ökngö an ngam panam kūö lanīnö ngam Mā Tēv yip tömaṙôngö: ngaich yip tarik inrē nö sā ngòh kūö tameūyö; öt tarīkuvö ṙamā-al hanöng kisānö re.

²⁰Hĕng tak min kumchötngö lā hāmö eltī, ngaich nöng aheuk; ngaich nyā anga-aṅ nö lātavē eltī re, ngaich hö-ö cha-a min nö tööḵngen: höng kö kā alaha takeun kël re yip min tarik:

²¹Manasē Ifrēm; Ifrēm inrē Manasē: hol re cha-a min nö lā-al Yūtā, kūö në nö ṙòkhöre ngam lanīnö ò nö öt havööṙi kūö, ṙòngmö teuthak pöri ngam kël ò.