Read Car_Nicobarese LA-EN LĒVĪ 11 Bible Online

LA-EN LĒVĪ 11 - Car_Nicobarese bible

LA-EN LĒVĪ 11

¹Ngaich ngam Mā Tēv nö vë-ekūö Môsös Āròn inrē, nö ngö ṙô tö cha.

²Vë-ekūö yip kūön Israĕl, ngö ṙô, Në nun tö-aṅ chehen kahāḵ yīö min aṅ i në töṙeūla në më-el ngam tumlat.

³Nup töng hôyu kinsòh röön, tösanāṙu kunröön vamööklö nyā-aṅkūöre nö hachāmö, i në töṙeūla, anū-ö kahāḵ yīö min.

⁴Në pöri min töt kāḵa tö yīö nö i në vamööklö nyā-aṅkūöre nö hacham, hēk i në töhôyu kunröön: ngòh ūṅt, pò ò nö vööklö nyā-aṅkūöre nö hacham öthôyu kunröön pöri, tökuvīö an anga-aṅ nö in yīö.

⁵Iskurīl inrē, pò ò nö vööklö nyā-aṅkūöre nö hacham, öthôyu kunröön pöri; tökuvīö an anga-aṅ nö in yīö.

⁶Ngam hër inrē, pò ò nö vööklö nyā-aṅkūöre nö hacham, öthôyu kunröön pöri; tökuvīö an anga-aṅ nö in yīö.

⁷Ha-un inrē, pò ò nö hôyu kunröön sanāṙu kunröön inrē hö-ö pöri nö vööklö nyā-aṅkūöre nö hacham; tökuvīö an anga-aṅ nö in yīö.

⁸Öt kāḵa nup alaha u tö yīö, ötlūölka nup tökapah tö yīö; tökuvīö nun anū-ö nö in yīö.

⁹Në nun kahāḵ yīö i nup aṅ el mak: öp tö kinvāyu kāḵ tökunlööhöv inrē el mak, el mai, el tahël, anū-ö min kāḵ yīö.

¹⁰Nup tötkinvāyu kāḵ ötkunlööhöv inrē el mai, el tahël inrē, ṙòkhöre nup mahalöinyköre el mak, ṙòkhöre el tahël, ṙòkhöre inrē nup tö-aṅ nup më-el mak; sinòkkūö yīö nun anū-ö:

¹¹Tösaòkhu min anū-ö tö yīö; un kāḵa nup alaha u tö yīö, nup tökapah min inrē tösa-òkhu tö yīö.

¹²Nup töt kinvāyu ötrēhĕn nö kunlööhöv el mak, anū-ö tösa-òkhu tö yīö.

¹³Në nun inrē tösa-òkhu tö hayöömö inlahen; un kāḵa anū-ö, sin-òkkūö nun: tökiröng matēṙö, òsprē inrē,

¹⁴Mahatēṙa, völchör inrē nup mihëṅṙö u;

¹⁵Kavöö nup mihëṅṙö u;

¹⁶Mingeūkö, hòk hatööm inrē, sakiôk inrē, hòk inrē i mihëṅrö u;

¹⁷Kun mingeūkö, kòrmòrön inrē, tökiröng mingeūkö inrē.

¹⁸Tösinrōlu mingeūkö, peliken inrē, völchöör inrē;

¹⁹Tö nup istôk inrē, heròn i mihëṅṙö u, hupō, tayām inrē.

²⁰Ṙòkhöre nup tö saneôku, töṙeūla töfënö kalröön sin-òkkūö yīö anū-ö

²¹Në pöri tökāḵa tö yīö i në tösaneôku, töṙeūla töfënö kalröön nup tökalröönu lā tulöng tö kunröönre, nö tinsòku nö i kui tumlat;

²²Kāḵa u më-eṅ; ngam hāyö i mihëṅrö ò, öp töngānyö kui hāyö inē i mihëṅrö ò, tatēt inrē i mihëṅṙö ò.

²³Ṙòkhöre pöri nup tösaneôku töṙeūla, nup töfënö kalröön, nö tösa-òkhu tö yīö.

²⁴Ngaich kūö u min yī-ö kuvīö: öp lamūölkö nup tökapah in u min kuvīö anga-aṅ söl harap.

²⁵Öp tamyuk öp tökapah in u söich inyutre min anga-aṅ ngaich kuvīö söl harap.

²⁶Nup töṙeūla töhôyu kinsòh röön, rö-ö nö töhôyu kunröön, ötrēhĕn nö vööklö nyā-aṅkūöre nö hacham, tökuvīö nö in yīö: yip lamūölken u kuvīö min.

²⁷Öp ramööntö elröönre nö ṙeul, i në töṙeūla töfënö kalöön, tökuvīö anū-ö nö in yīö: öp lamūölkö öp tökapah kuvīö min anga-aṅ söl harap.

²⁸Öp tamyuk öp tökapah in u söich inyutre min anga-aṅ ngaich kuvīö söl harap: tökuvīö nun anū-ö nö in yīö.

²⁹Në nun inrē tökuvīö nö in yīö i në töṙeūla në lamān el tumlat; vösöl, kumit, tökiröng kav i mihëṅṙö ò,

³⁰Kekkō, ṙēv el tanyô, kav, kav aṅ kuyāyö inrē, kakūöng inrē.

³¹Anū-ö nun në tökuvīö nö in yīö i në ṙameul: öp lamūölkö u, yē u nö kapah, kuvīö min yī-ö söl harap.

³²Öp chūök fūkö u yē u nö kapah, kuvīö min angū-ö; yĕn pòrô nö tökachāvu, hēk hilā, hēk uk, hēk sāk, öp töng sitih chūökṙen, chūök la-en nö kēkaṙen, hòṅ sumtu angū-ö nö el mak, ngaich tökuvīö angū-ö söl harap: ngaich möl min angū-ö nö löök.

³³Nup tanīöyö, chūök u nö suktöre, nup töng sitih aṅ u, kuvīö min ngaich likukngö u yī-ö.

³⁴Ṙòkhöre nup nyā-aṅkūö el e, nup tömāku alaha, nö kuvīö min: nup tö-ôkö aṅ nup tö ngatī kuvīö min.

³⁵Nup chūök fūkö u nö kapah kuvīö min; yĕn tisum, yĕn chūök tösūmö, likūki min angū-ö: tökuvīö nun anū-ö, ngaich tökuvīö min nö in yīö.

³⁶Töhet öp löklö mak, hēk öp tö-ulö mak chūök finôkö mak: öp tösūöhtöre pöri nö i nup tökapah alaha u kuvīö min.

³⁷Yē ngam tökapah alaha u nö fuk kui nup taneūich kulöl nup tö hòṅ teūichtu nö ngaich, het angū-ö.

³⁸Yĕn ṙöstu pöri öp mak nö i kui öp kulöl, ngaich fuk in e öp tökapah, kuvīö angū-ö nö in yīö.

³⁹Yĕn töṙeūlavö tökapah, öp tö kāḵa tö yīö; söl harap min nö kunvīö öp lamūölken ò;

⁴⁰Söich hilāre min anga-aṅ öp kamāḵ ngam tökapah, ngaich kuvīö söl harap: söich hilāre min inrē öp tamyuk ngam tökapah, ngaich kuvīö söl harap.

⁴¹Sinòkkūö nun në töṙeūla lamān nö el tumlat; öt tö kāḵa nun anū-ö

⁴²Nup töng lanāntö aichre, nup töfënö kalröön, hēk töṙōlö kalröön, nup töṙeūla lamāna nö el tumlat, anū-ö töt kāḵa tö yīö pò u nö sinòkkūö.

⁴³Uh yin vītöre sinòkkūö i në töṙeūla në lamāna, ui rēhĕn vītöre kuvīö in u, hòṅ yīö öt hamumngöre tö kūö u.

⁴⁴Tön Chū-ö chin Mā Tēv, Tēv meh: ahetlöre yin lökten, hòṅ yīö töhet; tön töhet Chin Chū-ö: ui rēhĕn hamumngöre öi yô-òv lökten i töreūla nup mahalöinyköre nö el tumlat.

⁴⁵Tön Chū-ö Chin Mā Tēv kamënyen meh ṙā-ang ap panam Aikup, öich Tēv meh: lökten yin het, tön Töhet Chin Chū-ö.

⁴⁶Ngih ön chöngö i në töṙeūla, në hayöm inrē, në tö-aṅ inrē mahalöinyköre el mak, nup lamāna inrē el tumlat:

⁴⁷Inrīkngöre tökuvīö tö tölöök, inrīkngöre nup tö-aṅ tökanāḵen tö nup tö-aṅ töt kanāḵen.