Read Car_Nicobarese LA-EN LĒVĪ 15 Bible Online

LA-EN LĒVĪ 15 - Car_Nicobarese bible

LA-EN LĒVĪ 15

¹Ngaich ngam Mā Tēv nö vë-ekūö Môsös Āròn inrē ngö ṙô,

²Vë-ekūö yip kūön Israĕl, ngö ṙô tö cha, Yĕn tarīku tö meutnyi aṅ alaha, kūö e ngaich anga-aṅ nö kuvīö.

³Ngih ön min kinvīöṙö ò nö ip tömeutnyi aṅ alahare: yē öp alaha ò nö hëmhu töp aṅ alaha ò, hēk yē öp alaha ò nö sökngöre tī töp aṅ alaha ò kinvīöṙö ò an angū-ö.

⁴Nup chaman chūök ngam tömeutnyi aṅ alaha nö hulalhaka kuvīö min anū-ö nup töng ūichka kui tö ò, kuvīö min anū-ö.

⁵Öp töng lamūölkö öp chamam ò, söich hilāre min anga-aṅ, vōköre inrē nö el mak, ngaich kuvīö söl harap.

⁶Anga-aṅ öp amūichkö el chūök ò ngam tömeutnyi aṅ alaha, söich hilāre min anga-aṅ vōköre inrē nö el mak, ngaich kuvīö söl harap.

⁷Anga-aṅ öp lamūölkö alaha ò ngam tömeutnyi aṅ alaha, söich hilā re min anga-aṅ, vōköre inrē nö el mak, ngaich kuvīö söl harap.

⁸Yē ngam tömeutnyi aṅ alaha nö kösngö alaha ò ngam tötkuvīö; ngaich söich hilāre anga-aṅ, vōk inrē nö el mak, ngaich kuvīö söl harap.

⁹Nup nām uk kōra töūichka kui tö ngam tömeutnyi aṅ alaha, kuvīö min anū-ö.

¹⁰Öp töng lamūölkö töng chehen nup el katòh ò, kuvīö min söl harap: öp tamyuk nup chehen, söch hilāre min anga-aṅ, vōk inrē nö el mak ngaich kuvīö söl harap,

¹¹Öp töng lamūölkö ngam tömeutnyi aṅ alaha, nöng söichngö tīre nö i mak, söich hilāre min anga-aṅ, vōköre inrē nö el mak, ngaich kuvīö söl harap.

¹²Öp tanīöyö, tölūölka tö ngam tömeutnyi aṅ alaha, likūki min: ane inrē nup tökachāvu söichö min nö el mak.

¹³Ngaich hē ngam tömeutnyi aṅ alaha nö ngaich nö öt kuvīö, ngaich anga-aṅ min nö kaheuk tösat sakāmö nö ahetlöre, söich hilāre inrē; vōk alahare inrē nö el töhëm mak, ngaich möl nö het.

¹⁴Im hinëvhöre sakāmö nët nòng kahëḵ anga-aṅ min tö nyö-öṅ, hēk inrē nët kūön pumpa, ngaich yihtöre nö i kūö ngam Mā Tēv, i kūö inkūp ngam rūkui manūlö, ngaich kēten u nö ip Kūönṙô:

¹⁵Ngaich ngam Kūönṙô min nö kētö u, hĕng nòng tökētu kūö tökööl, ngaich ngam tahëng töföngö nö tökētu; ngaich ngam Kūönṙô min nö vī inlām tökööl ò i kūö ngam Mā Tēv tö kūö ök lamöknyö in ò.

¹⁶Yē öp tarik nö föthöre, ngaich anga-aṅ min nö vōköre tö mak nö keuheūtngö alahare, ngaich kuvīö söl harap.

¹⁷Ṙòkhöre nup hilā, tö nup uk alaha inrē, tömāichngö tö ngam tösuknyöre söichö min nö el mak, ngaich kuvīö söl harap.

¹⁸Öp kikānö inrē tölökö alaha töp kikōnyö nö i inkūöntö nyīö, kö vōkö nyöre min cha-a nö el mak, ngaich kuvīö söl harap.

¹⁹Yē öp kikānö nö kunyahen, ngaich öp kunnyahen ò nö i alaha ò nö mahām, ngaich anga-aṅ min nö sat sumkam nö im öt hanëtöre: ngaich öp töng lamūölken ò kuvīö min söl harap.

²⁰Ṙòkhöre nup töṙōltu kui tö ò im saha öt hanëtö ò: ṙòkhöre inrē nup tö-ūichka kui tö ò, kuvīö min.

²¹Öp töng lamūölkö öp chamam ò söich hilāre min, ngaich vōköre nö el mak, ngaich kuvīö söl harap.

²²Öp töng lamūölkö chehen tö-ūchka kui tö ò söich hilāre min, vōköre nö el mak, ngaich kuvīö söl harap.

²³Yĕn el chamam, hēk inrē i kui nup chūök ò nö ūichhaka, hē ò nö lūölkö e, kuvīö min anga-aṅ söl harap.

²⁴Yē öp tarik nö hulalhaka nö in ò, ngaich īnu anga-aṅ tö ngam öt hanëtö ò, ngaich anga-aṅ min nö kuvīö sat sumkam; ane inrē nup chamam töṙōlka ël tö ò kuvīö min.

²⁵Yē öp kikānö nö ṙōl sumkam nö kunyahen nö öt ip hē öt hanëtö ò, hēk inrē yē ò nö kunyahen nö saṙaklöngkūö sakāmö töp hē öt hanëtö ò, ngaich ṙòkhöre nup sakāmö ò nö kunyahen nö kinvīöṙö ò ngaich anga-aṅ min nöng sāre i nup sakāmö öt hanëtö ò: kuvīö min anga-aṅ.

²⁶Ṙòkhöre nup chamam töṙōlka ël tö ò i rô-òten ò nö kunyahen nö chamam ò min im öt hanëtö ò: ṙòkhöre inrē nup töng ūichka kui tö ò nö kunvīöṙö ò: ṙòkhöre inrē nup töng ūichka kui tö ò nö kuvīö min, sā kinvīöṙö ngam öt hanëtö ò.

²⁷Öp töng lamūölkö u kuvīö min, ngaich söich hilāre min anga-aṅ, vōköre inrē tö mak, ngaich kuvīö söl harap.

²⁸Yē ò pöri nö ngaich nö öt kuvīö tö ngam kunnyahṙen re, ngaich anga-aṅ min nö kaheuk tösat sakāmö nö ahetlöre, ngaich unôichrit e anga-aṅ min nö öt kuvīö.

²⁹Im hinëvhöre sakāmö anga-aṅ nö kēḵ nyö-öṅ nët nòng, hēk inrē nët nòng kūön pumpa, ngaich kēten u nö ip Kūönṙô, nö i kūö inkūp ngam rūkui manūlö.

³⁰Ngaich ngam kūönṙô min nö kētö u, hĕng nòng tökētu kūö tökööl, ngaich ngam tahëng töföngö nö tökētu; ngaich ngam kūönṙô min nö vī inlām tökööl ò i kūö ngam Mā Tēv tö kūö ök kunnyahen ò ök kinvīöṙö ò.

³¹Ngatī yin pöchö haköhngen yip kūön Israĕl tö ngam kinvīöṙö cha; hòṅ cha nö öt kapah nö im kinvīöṙö re, yē cha nö kumvīöngö ngam rūkui manūlö chu ngam el ṙôngö cha.

³²Angū-ö ön ngih chöngö ò ngam tö löknyu aṅ in, ane inrē ngam töföthöre, lökngen ò nö kuvīö tö kūö e;

³³Anga-aṅ inrē ngam tövāhav tö öt hanëtöre, anga-aṅ inrē ngam tölöknyu aṅ in, kikōnyö, kikānö inrē, anga-aṅ inrē öp muhulalhaka nö im kikānö ngam tö kuvīö