Read Car_Nicobarese LA-EN LĒVĪ 17 Bible Online

LA-EN LĒVĪ 17 - Car_Nicobarese bible

LA-EN LĒVĪ 17

¹Ngaich ngam Mā Tēv nö ngö ṙô, nö vë-ekūö Môsös,

²Vë-ekūö Āròn, tö yip kikōnyö kūön ò inrē, ṙòkhöre yip kūön Israĕl inrē, ngö ṙô tö cha; Angū-ö ön ngih hachöngten ngam Mā Tēv, nö ngö ṙô,

³Öp töng tarik aṅ patī Israĕl ṙamatnyö likeun kōiny nuā, kōiny sīṅp, pököre, nö im elyöngö, hēk öp ṙamatnyö likeun ò nö lā uk ngam elyöngö,

⁴Nö öt kēten ò nö i kūö inkūp ngam rūkui manūlö, nö tökētu sā inlāmö nö im Tēv i kūö rūkui manūlö ngam Mā Tēv: fukhu kui min anga-aṅ tarik tö mahām: kumtaknyö mahām an anga-aṅ; ngaich anga-aṅ min tarik nö rökiṙen nö ṙā-ang i yip tarik ò:

⁵Pòn hōtu yip kūön Israĕl nö kētö nup tökētu tö cha, nup tökētu tö cha nö elngāṙö, hòṅ cha nö kētö u nö im Mā Tēv, i kūö inkūp ngam rūkui manūlö, nö ip Kūönṙô, ngaich kētö u nö tökētu kūö inlāmö nö im Mā Tēv.

⁶Ngaich min ngam Kūönṙô nö kicheny ngam mahām el ngam tahāklö ngam Mā Tēv i kūö inkūp ngam rūkui manūlö, ngaich föng ngam tösangöö nö tötahūsa nö im Mā Tēv.

⁷Hö-ö cha-a min nö ngöhören nö kētö nup tökētu nö i kōiny pököre, öp tahömken cha nö asēha. Angū-ö ön min ngih chöngö tö-örheūheu nö in cha i tumkölchap cha.

⁸Ngö ṙô pömchö tö cha, Öp töng tarik aṅ patī Israĕl, hēk öp aṅ tahëng tö rahëichtaṙen nö iyöng in cha, öp kamëtö töföngö tökētu,

⁹Ngaich öt kēten ò nö i kūö inkūp ap rūkui manūlö, nö tökētu nö i ngam Mā Tēv; anga-aṅ tarik min inrē törökiṙen nö ṙā-ang i yip tarik ò.

¹⁰Öp töng tarik inrē aṅ patī Israĕl, hēk yip aṅ tahëng tö rahëichtaṙen nö iyöng nö in cha, öp kamāḵ töng mahām; ngaich Chū-ö min lā-al öp kamāḵ mahām, ngaich rökngen ò min nö ṙā-ang i yip tarik ò.

¹¹Pò ngam nômö ngam alaha nö im mahām: ngaich kētö e Chu-ö in yīö el ngam tahāklö nö vī inlām tökööl nômö yīö; pòn ngam mahām nö vī inlām tökööl nö kūö e nö nômö.

¹²Lökten Chin ngö ṙô tö yip Kūön Israĕl, öt tarīku tö yīö min kamāḵ mahām, ötrēhĕn min öp aṅ tahëng tö rahëichtaṙen nö iyöng nö in yīö, nö kāḵ mahām.

¹³Öp töng tarik aṅ i yip kūön Israĕl, hēk aṅ i yip aṅ tahëng törahëchtaṙen nö iyöng in cha, öp tö pô-òv tö töṙeūla hēk tösaneôku nö hacheūḵ, tö öp tökāḵa; ṙöhngö öp mahām ò anga-aṅ, ngaich ulngö kui e tö tumlat.

¹⁴Pòn sā ngam nômö taṙòkhöre alaha, hĕng ngam mahām nö im nômö: lökten Chin ngö ṙô tö yip kūön Israĕl, uh yin kāḵ mahām nup töng siti alaha: tön nômö nup alaha an ngam mahām: öp kamāḵa e min rökiṙen anga-aṅ.

¹⁵Öp tarik kamāḵ öp töng kahngenre nö kapah hēk öp töteūchö tö töṙeūla, yĕn tö fötnyu nö i patī hēk yĕn aṅ tahëng, söich hilāre min anga-aṅ, vōköre inrē nö el mak, ngaich kuvīö söl harap: ngaich möl anga-aṅ min nö öt kuvīö.

¹⁶Yē ò pöri nö öt söichö u ötrēhĕn nö vōk alahare, ngaich anga-aṅ min nö keun tököölre.