Read Car_Nicobarese LA-EN LĒVĪ 19 Bible Online

LA-EN LĒVĪ 19 - Car_Nicobarese bible

LA-EN LĒVĪ 19

¹Ngaich ngam Mā Tēv nö vë-ekūö Môsös, nö ngö ṙô,

²Vë-ekūö yip ṙôngö kūön Israĕl nö ṙòkhöre, ngö ṙô tö cha, Het yin min: pò Chu Chū-ö Tēv yīö töhet öich Mā Tēv.

³Kö pa-ekūö yin min tö kikānö yöngre, kikōnyö yöngre inrē, ane inrē haköp në töhet sakāmö Chu: Chū-ö Chin Tēv yīö Öich Mā Tēv.

⁴Uh yin havöötökūöre i insātēv ui vī vët nö insātēv yīö: Chū-ö Chin Tēv yīö Öich Mā Tēv.

⁵Yē yīö kētö inlām tökētu im Mā Tēv, kētö e yī-ö hòṅ yīö hōḵovö.

⁶Nyā-aṅyö min angū-ö im sakāmö yīö kētö e huṙöich inrē, ngaich yĕn tö-ōtrevö nö söl im linūöi sumkam, föngi min angū-ö nö i kūö tameūyö.

⁷Ngaich yē e nö nyāka el ngam linūöi sumkam, töchōich angū-ö; öt hōḵovö an min angū-ö:

⁸Yip nyamā-aṅ e min kö keun tököölre, pò ò nö hachōichngö ngam töhet aṅ im Tēv: ngaich anga-aṅ min tarik nö rökiṙen nö ṙā-ang i yip tarik ò.

⁹Yē yīö uvòhlö nup taneūchre im panam, ui keuheūtlöre tī uvòhlö nup lā nang ngam taṙeūḵ meh, um rēhĕn hamūl nup pintu-en yip mahamūl

¹⁰Um hamūl pintu-en yip mahamūl el panô-òṅ vāin meh; ṙāḵngö u më-eṅ lumnöörö yāich lumnööṙö aṅ tahëng inrē: Chū-ö Chin Tēv meh Öich Mā Tēv.

¹¹Uh yin ulāyö; uh rēhĕn öi michūḵṙen, ui minyôiny in höö.

¹²Ui chūöku ṙô inrē i minë-eny Chu öi minyôiny, öp lökten meh hachōichngö minë-eny ngam Tēv meh: Chū-ö Chin Mā Tēv.

¹³Uh man hakihten holre, uh rēhĕn ulāingen ò: un köp nö in meh nö hĕng mitööm nö söllö peuheū nup raneushö yip töhaṙāyö nö kūönkūö meh.

¹⁴Um rūttö öt inkôlò i töthang, um rēhĕn ṙāḵtö kinvē-ĕre i tötmeuk, pa-ekūö pöri më-eṅ tö ngam Tēv meh: Chū-ö Chin Mā Tēv meh.

¹⁵Uh man tī tö tötchip im inkaha fālen: uh man atölten yāich, um rēhĕn milēḵṙen töp tarik tökirööngö chöngö: im chanīpen pöri öm akah fālen ngam holre.

¹⁶Uh man havöt inrē sā sumlô nyā-aṅ i vē tarik meh: um rēhĕn sökhak lā-al i mahām öp hol meh: Chū-ö Chin Mā Tēv.

¹⁷Uh man kunyāṅha ellōn ip makalaha meh: lahëḵ man vëkö öp holre, uh pöri öm keun tökööl tö pòkūö ò.

¹⁸Uh man havāhalre, um lanīnuvö i yip kūön yip tarik meh, hāngenlōn pöri më-eṅ tö holre sāre tö re, Chū-ö Chin Mā Tēv.

¹⁹Haköp në chöngö Chu yin min, Un höökiṙen nup nuā meh nö ṙōlkangen mahakūön tö kūön: um nëtkangen taheūchti tö kulöl el öp taṙeūḵ meh: um rēhĕn hayūtöre töp tö nët kangen kinpātö hilā nö katēhĕmat.

²⁰Öp ṙamôlngöre nö i kikānö nö i lōn alaha, nö in öp kikānö töhakövö, öp tömikāhayö töp tö hòṅ pīhövö, öl pöri nö havaha ṙinānyi, ötrēhĕn nö kētu ṙinānyi; sācha min chā-a; öt kumpaha chā-a, pôm kikānö nö töhakövö.

²¹Ngaich ngam kikōnyö min nö kētö tökētu kūö tökööl nö im Mā Tēv, nö i kūö inkūp ngam rūkui manūlö, hĕngnòng öp kūön sīṅp tökētu kūö tökööl.

²²Ngaich ngam Kūönṙô min nö vī inlām tökööl ò nö aṅtī tö ngam kūön sīṅp tökētu kūö tökööl nö i kūö ngam Mā Tēv kūö ök tökööl ò ök lahūölken ò: ngaich möl anga-aṅ min nö aṙēlöng tökööl tö ök lahūölken ò tökööl.

²³Hē yīö min yih ip panam, ngaich ṙōl mihënṙö taheūichti tö chōn nö nyā-aṅkūö, ngaich kaheuk nup ṙòng min yī-ö nö sā töttunyīnyi, lūöi samyeūheu min anū-ö nö sā töttunyīnyi nö in yīö, öt nyā-aṅ min angū-ö.

²⁴Im finënö samyeūheu pöri ṙòkhöre nup ṙòng min nö töhet, nö tökētu nöinyö ngam Mā Tēv.

²⁵Im tinneūyö samyeūheu yī-ö min nyā nup ṙòng u hòṅ u min nö ṙūölöre ṙôken nö in yīö: Chu-ö Chin Tēv yīö, Öich Mā Tēv.

²⁶Uh yin kāḵ nup tö mahāmu: ui rēhĕn kēken milūönö, uh rēhĕn chòng alaha.

²⁷Ui chuvīngö lā taseū lā kuire, um rēhĕn kamöpngö lā taseū sanôi ngam samā meh.

²⁸Um ṙatnyö alahare nö lālö kupah, um rēhĕn vītö mirun alahare: Chū-ö Chin Mā Tēv.

²⁹Un hachōichi ngam kūön meh kikānö nö vītuṙen nö inyihköre; hòṅ ngam panam min nö öt höng mi-inyihkö kikānöre, ngaich tööḵlö min ngam panam tö ötlanöökö.

³⁰Haköp në töhet sakāmö Chu yin, milēḵṙen töm töhet chūök Chū-ö Chin Mā Tēv.

³¹Ui havöötökūöre in cha yip mameuk ma-alaha, un rēhĕn i yip tömilūönö; un chöhö cha-a tö yīö, öi hòṅ hachōichngöre tö tī cha: Chū-ö Chin Tēv meh Öich Mā Tēv meh.

³²Söklöre man i kūö öp töpakū-uv kui, milēḵṙen inrē tö tököiny tarik, pa-ekūö inrē tö ngam Tēv meh: Chū-ö Chin Mā Tēv meh.

³³Yē öp aṅ tahëng nö rahëichtaṙen nö iyöng in meh im panam meh, un hayëḵe tö meh.

³⁴Öp aṅ tahëng tö rahëchtaṙen nö iyöng in meh sā töfötnyu anga-aṅ nö i patī nö in meh, hāngenlōn më-eṅ tö ò sāre töre; pò yīö misi i panam Aikup öi aṅ tahëng, Chū-ö Chin Tēv meh Öich Mā Tēv.

³⁵Ui michūḵṙen i inkaha fālen, i kinlah rôta, i kinlah lumngan, i nyanūmö inrē.

³⁶Töt hachūḵuiṙen kinlah lumngan nun anū-ö nö in yīö Öich Mā Tēv kamëḵnyen yīö ṙā-ang ap panam Aikup.

³⁷Haköpkö në chöngö Chu yin nö ṙòkhöre, ṙòkhöre inrē në inkaha fālen aṅ in Chu, la-evṙen tö u: Chū-ö Chin Mā Tēv.