Read Car_Nicobarese LA-EN LĒVĪ 20 Bible Online

LA-EN LĒVĪ 20 - Car_Nicobarese bible

LA-EN LĒVĪ 20

¹Ngaich ngam Mā Tēv nö vë-ekūö Môsös, nö ngö ṙô,

²Ngö ṙô pömchö inrē tö yip kūön Israĕl, Öp töng sitih aṅ i Israĕl, hēk aṅ i yip aṅ tahëng törahëichtaṙen nö iyöng in Israĕl öp kamëtö kūönre nö in Mōlek kumpāhaivah takô min anga-aṅ: kuleh kui ò min tarik aṅ ngam panam tö ihong.

³Lāḵlö öp tarik Chin min Chū-ö inrē, ngaich rökngen ò nö ṙā-ang i yip tarik ò; pòn kētö kūönre anga-aṅ nö in Mōlek, nö hachōichngö ngam töhet Chūök Chu, anë inrē hachōichngö ngam töhet minë-eny Chu.

⁴Yē yip tarik aṅ ngam panam nö la-evṙen tö yô-òv nö hanyatngö matre töp tarik anga-aṅ, hē ò nö kētöp kūönre nö in Mōlek, ngaich öt kumpāhangvah ò:

⁵Ngaich Chū-ö min laḵlö öp tarik, anga-aṅ, lāḵlö yip aṅ patī ò inrē, ṙòkhöre inrē yip tö sā ò nö ngatī la-en, nö asĕhken Mōlek, ngaich rökngen ò min, nö ṙā-ang i yip tarik cha.

⁶Öp tarik mahavöötö kūöre nö in cha yip mameuk sī-ö, tömilūönö inrē, nö hòṅ tömken la-en cha, lāḵlö öp tarik Chin min anga-aṅ ngaich rökngen ò min nö ṙā-ang i yip tarik ò.

⁷Lökten yin ahetlöre, het yī-ö inrē: tön Chū-ö Chin Tēv meh Öich Mā Tēv.

⁸Haköp në chöngö Chu min yī-ö, la-evṙen inrē tö u: Chū-ö Chin Mā Tēv Öich ma-ahetlen yīö.

⁹Vē töng ramūtngövah kikōnyö yöng, hēk kikānö yöngre kumpāhaivah takô-min: rūtngövah kikōnyö yöngre an hēk kikānö yöngre; i kui ò öp min mahām ò.

¹⁰Öp tarik, ma-asĕhkö pīhö tahëng taka tarik, anga-aṅ öp ma-asĕhkö pīhö öp holre, kumpāhaivah nyöre minā ma-asĕhken höö.

¹¹Öp tarik muhulalhaka nö i pīhö öp kikōnyö yöngre hameuknyö linchôyö yöngre hameuknyö linchôyö ngam kikōnyö yöngre anga-aṅ: nëtre taka cha-a min nö kumpāhaivah; i kui cha nup mahām cha.

¹²Yē öp tarik nö hulalhaka nö ip kankūönre, nëtre taka cha-a min nö kumpāhaivah: tökalūöchöre tī nan cha-a; i kui cha min nup mahām cha.

¹³Yē öp tarik nö hulalhaka nö i kikōnyö, nö sāre nö i kikānö nëtre taka cha-a nö chōichö fālen: kumpāhaivah min cha-a; i kui cha min nup mahām cha.

¹⁴Yē öp tarik nö kēḵ pīhöre töp kikānö töp yöng ò inrē; töchōich an angū-ö: föngi min cha-a tö tameūyö, hĕnghöre anga-aṅ, cha-a inrē; hòṅ ngam ötlanöökö nö öt in yīö.

¹⁵Yē öp tarik nö hulalhaka nö i töṙeūla, kumpāhaivah min anga-aṅ: kumpāhangvah ngam töṙeūla yī-ö min inrē.

¹⁶Yē öp kikānö nö söökūö öp töṙeūla ngaich hulalngöre nö in ò, fëlngen öp kikānö min më-eṅ, töp töṙeūla inrē: kumpāhaivah acha-a min; i kui cha min öp mahām cha.

¹⁷Yē öp tarik nö kēḵ öp kanānöre, öp kikānö kūön öp kikōnyö yöng ò, hēk inrē öp kikānö kūön öp kikānö yöng ò, ngaich meuk linchôyö ò anga-aṅ, ngaich ngam kikānö inrē nö meuk linchôyö ò; sinrōngkūö an angū-ö; rökiṙen min cha-a nö i kūö yip kūön yip tarik cha: hameuknyö linchôyö öp kanānöre anga-aṅ; keun tököölre min anga-aṅ.

¹⁸Yē öp tarik nö hulalhaka nö ip kikānö tökunyahen, ngaich hameuknyö linchôyö ò; ngaich anga-aṅ nö lichôyö tī töm löknyi, ane inrē ngam kikānö hameuknyö ngam löknyö mahām nëtre taka cha-a min nö rökiṙen nö ṙā-ang i yip tarik cha.

¹⁹Uh më-eṅ hameuknyö linchôyö öp kanānö öp kikānö yöng meh, un rēhĕn öp kanānö öp yöng meh: pòn lichôyö tī anga-aṅ töp töröhta makalahare: keun tököölre min cha-a.

²⁰Yē öp tarik nö hulalhaka nö i pīhö öp kōiny yöngre, hameuknyö linchôyö ngam kōiny yöngre anga-aṅ: keun tököölre cha-a min; kapah min cha-a nöng öt kūönu.

²¹Yē öp tarik nö kēḵ pīhö öp mëmre hēk öp kahëm ò kikōnyö, öt töhet an angū-ö: hameuknyö linchôyö ngam mëmre anga-aṅ hēk ngam kahëm ò inrē; öt kūönu min cha-a.

²²Lökten yin haköp në chöngö Chu, ṙòkhöre inrē në aṅ in Chu inkaha fālen, ngaich lök in u: hòṅ ap panam, chūöktī Chu kēten yīö öi iyöng in e, nö öt kuvavlen yīö.

²³Uh yin inrē lök i nup kui panam yip pumnāmö tarik, yip tö-ahōre tö Chu nö i kūö yīö; pòn ngatī vahīṙen cha-a tö e; lökten Chu sa-òkkūö tö cha.

²⁴Ngaichô pöri Chū-ö tö yīö, amīnu yin min töp panam cha, kētö e chin min nö in yīö nö kanahngen yīö, öp panam töhëmö aṅkūö tö aṅteh, hanī inrē: Chū-ö Chin Tēv meh Öich Mā Tēv, mahaköhngen meh tö më tarik.

²⁵Lökten yin haköhngen u tö höö minë töṙeūla, tö minë töt het chehechōn tö nup töhet inrē: ui vīngenre sin-òkkūö tö kūö töṙeūla, hēk kūö chehechōn, hēk kūö nup töng ṙeūla nö el tumlat, nup töt het, töhaköösiṙen tö Chu, tö yīö.

²⁶Töhet yin yī-ö min in Chu: pò Chu Chū-ö töhet Öich Mā Tēv, ngaich haköhngen yīö tö më tarik, pò yīö hōtu öi Chū-ö.

²⁷Öp kikōnyö tarik hēk öp kikānö mameuk ma-alaha, hēk öp tömilūönö, kumpāhaivah min: kuleh kui cha min cha-a tö ihong: i kui cha min öp mahām cha.