Read Car_Nicobarese LA-EN LĒVĪ 23 Bible Online

LA-EN LĒVĪ 23 - Car_Nicobarese bible

LA-EN LĒVĪ 23

¹Ngaich ngam Mā Tēv nö vë-ekūö Môsös, nö ngö ṙô,

²Vë-ekūö yip kūön Israĕl, ngö ṙô tö cha, Në nun tökiröng sakāmö ngam Mā Tēv, nö ahangkö yīö min nö töhet manūlö, anū-ö nun në tö ṙāḵtu tökiröng sakāmö.

³Tafūöl sumkam nup la-en nö keuheūtiṙen: ngam sinat sumkam pöri töhet nö sakāmö nö töchēv haneūheu, töhet manūlö; uh yī-ö vahī-ivṙen tö yô-ôv la-en: töhet sakāmö ngam Mā Tēv an angū-ö i nup elyöngö yīö nö ṙòkhöre.

⁴Në nun töṙāḵtu tökiröng sakāmö ngam Mā Tēv, angū-ö ngih töhet manūlö, nup ahangnyö yīö min i nup hē u.

⁵Im raneh chingëṅt, im finën sīön sakāmö ngam chingëṅt tö harap pāska ngam Mā Tēv an angū-ö.

⁶Im tinneui sīön sakāmö ngam chingëṅt anga-aṅ öp tökiröng sakāmö ngam töt-aföhlöng rôtī im Mā Tēv: sat sumkam yī-ö min nyā tötaföhlöng rôtī.

⁷Im raneh sakāmö yī-ö min im töhet manūlö: öt la-evṙen yī-ö tö la-en kaitī (töhakövö).

⁸Kētö tökētu pöri min yī-ö i ngam Mā Tēv sat sumkam löktökūö i tameūyö; im sinat sumkam ngam manūlö; uh yī-ö la-evṙen tö la-en kaitī (töhakövö).

⁹Ngaich ngam Mā Tēv nö vë-ekūö Môsös, nö ngö ṙô,

¹⁰Vë-ekūö yip kūön Israĕl, ngö ṙô tö cha, Yē yīö söltökūö ip panam öp kahëtö Chu in yīö, ngaich uvòhlö nup taneūichre yī-ö, ngaich yī-ö min kētö tönyamnëkre nup lanòhlòng taneūich yīö nö ip Kūönṙô:

¹¹Kuvāi ngam tönyamnëkre anga-aṅ min nö i kūö ngam Mā Tēv, nö töhōḵov tö pòkūö yīö: ip huṙöich unôichrit ngam töhet sakāmö ngam Kūönṙô min nö kuvāyö e.

¹²Im sakāmö hē yīö kuvāi ngam tönyamnëkre, kētö kōiny sīṅp yī-ö min töt vāhav alaha kūön aṅ im raneh samyēuheu nö töföngö tökētu nö im Mā Tēv.

¹³Öp nyā-aṅkūö tökētu min nö nët i tösöm öp töhĕng efā (2 Kilō) öp töpahīöya atra kalūöchö tö tavī-i, tökētu nö im Mā Tēv löktö i kūö tameūyö nö tötahūsa; öp tö-ôkö tökētu min nö vāin, öp finënö ṙôken aṅ öp hin (1 Litöör).

¹⁴Ötrēhĕn yī-ö nyā rôtī, ötrēhĕn tökurālö sāiny, ötrēhĕn nup tö-uhāv sāiny, hanöng saha öp sakāmö angū-ö, hanöng saha yīö keuheūtö tī kētö tökētu im Tēv yīö: chöngö an angū-ö tö-örheūheu i tumkölchap yīö i nup elyöngö yīö nö ṙòkhöre.

¹⁵Löktökūö huṙöich unôichrit ngam töhet sakāmö yīö min öi kaheuk tūmö, löktökūö im sakāmö hē yīö kētö ngam tönyamnëkre tökuvāyö tökētu; timtörekūö min anū-ö töhet sakāmö nö sat:

¹⁶Nö im huröich unôichrit ngam sinātö töhet sakāmö nö kaheūkö tö yīö nö taneui anāi sakāmö; ngaich yī-ö min kētö tufömngöre nyā-aṅkūö tökētu nö im Mā Tēv.

¹⁷Ngaich yī-ö min ṙā-ang i nup chūökre kēnyö tökuvāyö rôtī nët aṅ i nup tönët i tösöm ṙôken efā (2 Kilō): töpahīöya min angū-ö nö atra, kahūlö min anū-ö holtö inföhlö, nö lanòhlòng im Mā Tēv.

¹⁸Ngaich holtö nup rôtī kahëtö yīö sat nòng kōiny kūön sīṅp tötvāhav alaha kūön aṅ ip raneh samyeūheu, hĕng nòng kōiny kūön nuā nët nòng kōiny kūön sīṅp: töföngö min anū-ö tökētu nö im Mā Tēv, holtö nup tī cha nyā-aṅkūö tökētu, tö nup tö-ôkö tī cha tökētu, nup tökētu lökten i kūö tameūyö, nö im Mā Tēv nö tötahūsa.

¹⁹Ngaich yī-ö min kētö kōiny pököre hĕng nòng tökētu kūö tökööl, nët nòng inrē kōiny sīṅp tökētu nö inlāmö.

²⁰Ngaich min ngam Kūönṙô nö kuvāyö u nö holtö rôtī öp lanòhlòng tökuvāyö tökētu nö i kūö ngam Mā Tēv, nö hol nup tönët nòng kūön sīṅp: töhet min anū-ö nö i ngam Mā Tēv nö lamöö im Kūönṙô.

²¹Ngaich yī-ö min ahangnyö e im sakāmö angū-ö; ngaich töhet manūlö min nö in yīö: öt la-evṙen min yī-ö tö la-en töhakövö chöngö an angū-ö nöng örheūheu i nup elyöngö yīö i tumkölchap yīö.

²²Yē yīö uvòhlö nup taneūichre im panam yīö, ui keuheūtlöre tī uvòhlö nup i sinkeukngö ngam taṙeūḵ, ui rēhĕh hamūl nup pintūtit tī mu-uvòh: ṙā-ang u yī-ö lumnööṙö yāich, lumnööṙö aṅ tahëng inrē: Chū-ö Chin Tēv Öich Mā Tēv meh.

²³Ngaich ngam Mā Tēv nö vë-ekūö Môsös, nö ngö ṙô,

²⁴Vë-ekūö yip kūön Israĕl, ngö ṙô, Im sinātö chingëṅt, haneūheu min angū-ö in yīö nö töchēvngen, inköpkö e öp finööṙö römpet, töhet manūlö.

²⁵Öt la-evṙen yī-ö tö la-en töhakövö ngaich kētö tökētu yī-ö im Mā Tēv lökten i kūö tameūyö.

²⁶Ngaich ngam Mā Tēv nö vë-ekūö Môsös, nö ngö ṙô,

²⁷Im sinöömö sakāmö ngòh sinātö chingëṅt pöri sakāmö inlām tökööl: töhet manūlö min angū-ö nö in yīö, ngaich yī-ö min hakihten nômö re; kētö tökētu inrē im Mā Tēv lökten i kūö tameūyö.

²⁸Uh yī-ö la-evṙen tö yô-òv vahīṙen im angū-ö sakāmö: tön sakāmö inlām tökööl an, vinītö inlām tökööl yīö i kūö ngam Tēv yīö ngam Mā Tēv.

²⁹Öp töng tarik töt mahakihtenre ip sakāmö angū-ö, rökiṙen min anga-aṅ nö ṙā-ang i yip tarik ò.

³⁰Öp töng tarik tö la-evṙen tö töng vahīṙen im sakāmö angū-ö, anga-aṅ min tarik töfëli tö Chu nö ṙā-ang i yip tarik ò.

³¹Uh yin la-evṙen tö töng vahīṙen: chöngö an angū-ö nö tö-örheūheu i tumkölchap yīö, i në elyöngö yīö nö ṙòkhöre.

³²Töhet sakāmö min angū-ö nö in yīö nö töchēv nö haneūheu, ngaich hakihten nômöre yī-ö min inrē; im minchūötöre sakāmö ngam chingëṅt tö harap, löktökūö harap söl ip harap, yī-ö min haköpkö ngam töhet sakāmö yīö.

³³Ngaich ngam Mā Tēv nö vë-ekūö Môsös, nö ngö ṙô,

³⁴Vë-ekūö yip kūön Israĕl, ngö ṙô, Im tinneui sīönö sakāmö ngòh sinātö chingëṅt öp tökiröng sakāmö rūkui manūlö nö sat sumkam nö im Mā Tēv:

³⁵Im raneh sakāmö min öp töhet manūlö: uh yī-ö la-evṙen tö la-en töhakövö.

³⁶Sat sumkam yī-ö min kētö tökētu löktökūö tameūyö im Mā Tēv: im hinëvöre sakāmö töhet manūlö min angū-ö nö in yīö ngaich kētö tökētu yī-ö min löktökūö tameūyö im Mā Tēv: töchēv an angū-ö manūlö, uh yī-ö la-evṙen tö la-en töhakövö.

³⁷Anū-ö nun në töṙāḵa sakāmö ngam Mā Tēv, ahangnyö yīö min im töhet manūlö, kinëtö tökētu löktö i kūö tameūyö nö im Mā Tēv, töföngö tökētu, tö nyā-aṅ tökētu inṙöömngen, tö-ôkö tökētu, kö ip hē sakāmö re:

³⁸Nö holre tö minë töhet sakāmö ngam Mā Tēv, holre tö nup tī meh inlōnti, holre tö nup tö chūöku kinlēḵngô meh, holre inrē tö nup kanāhanglōn meh tökētu, nup kahëtö meh im Mā Tēv.

³⁹Im tinneui sīönö sakāmö pöri, im sinātö chingëṅt, yē yīö hamūl ṙòng nup aṅ ngam panam, haköpkö ngam tökiröng sakāmö ngam Mā Tēv min yī-ö sat sumkam: im raneh sakāmö min öp töchēv haneūheu, im hinëvhöre sakāmö min inrē öp töchēv haneūheu.

⁴⁰Ngaich yī-ö min kēḵ kumre im raneh sakāmö tö ṙòng nup tölöök chōn, rōi nup kachūr, pak nup töchilöölö kaha chōn, ane inrē nup tömöi chōn i kui töhëm mak; ngaich yī-ö ṙāmölōn i kūö ngam Mā Tēv sat sumkam.

⁴¹Haköpkö e yī-ö min nö tökiröng nö sakāmö ngam Mā Tēv sat sumkam i töhĕng samyeūheu: chöngö an min angū-ö nö tö-örheūheu i tumkölchap yīö: haköpkö e yī-ö min im sinātö chingëṅt.

⁴²Sat sumkam yī-ö min iyöng el inrūkui ṙòkhöre yip töfötnyu nö i patī Israĕl nö iyöng el inrūkui min:

⁴³Hòṅ yip tumkölchap yīö nö akahalōn tö Chu vīten yik kūön Israĕl nö iyöng el inrūkui, hē Chu kēnyen cha nö ṙā-ang ip panam Aikup: Chū-ö Chin Tēv meh Öich Mā Tēv.

⁴⁴Ngaich Môsös nö vë-eny nang yik kūön Israĕl tö minë töṙāḵa tökiröng sakāmö ngam Mā Tēv.