Read Car_Nicobarese LA-EN LĒVĪ 24 Bible Online

LA-EN LĒVĪ 24 - Car_Nicobarese bible

LA-EN LĒVĪ 24

¹Ngaich ngam Mā Tēv nö vë-ekūö Môsös, nö ngö ṙô,

²Tölṙô yip kūön Israĕl, nö kētö töhet tavī-i ôliv nö in meh tösōngö nö mak eāṅvö, hòṅ öp ëāṅvö nö örheūheu nö hū kūö.

³Lā uk öp ranangkūö öp tökô-en inmeuktö, el ngam rūkui manūlö, ang Āròn min nö chöngu tö e nö löktökūö harap söl peuheū nö i kūö ngam Mā Tēv nö örheūheu: chöngö min nö tö-örheūheu i tumkölchap yīö.

⁴Chöngu min anga-aṅ tö nup ëāṅvö i kui ngam töhet chūökröön tö manyaṅk i kūö ngam Mā Tēv nö örheūheu.

⁵Ngaich më-eṅ kēḵ tö pahīöya atra, ngaich kahul pikoh aṅ in e nëtsīön: nët i tösöm aṅ öp töhĕng efā nö hĕng nö pikoh nö vī-i.

⁶Ngaich ṙāḵtö u më-eṅ nö nët mitöökö, tafūöl i töhĕng mitöökö i kui ngam töhet mīs i kūö ngam Mā Tēv.

⁷Ngaich chaplö töhet më-eṅ tötahūsa i kui töhĕng mitöökö, hòṅ e nö im rôtī nö inköpkölōn, nö tökētu löktökūö tameūyö nö im Mā Tēv.

⁸Hē el töhet sakāmö örheūheu anga-aṅ min nö ṙāḵtö e i kūö ngam Mā Tēv örheūheu: kūö yip kūön Israĕl an angū-ö nö öreūheu nö kinlēḵngô.

⁹Ngaich angū-ö min nö in Āròn in yip kikōnyö kūön ò inrē; ngaich nyā-aṅ e min cha-a ip töhet chūök: pò e nö tölngö töhet nö i Ò nö tökētu im Mā Tēv nö lökten i kūö tameūyö nö chöngö tötchanūhuvṙen.

¹⁰Ngaich ök kikōnyö kūön ök kikānö aṅ Israĕl ök tö yöngu tö aṅ Aikup, nö kirööngöre nö i yip kūön Israĕl: ngaich ök kikōnyö kūön ök aṅ Israĕl kikānö nö lā-al kūö ök tarik aṅ Israĕl nö im elyöngö:

¹¹Ngaich ngam kikōnyö kūön ngam kikānö aṅ Israĕl nö hachōichngö ngam minë-eny, rūtngövah inrē: ngaich kēten ò cha-a nö in Môsös Selōmit minënyi ök yöng ò kikānö, kikānö kūön Tiprī, aṅ i miyöngö Tën:

¹²Ngaich cha-a nö kalongngen ò, pòn hōten e nö vënyu nö in cha nö löktö elvāng ngam Mā Tēv.

¹³Ngaich ngam Mā Tēv nö vë-ekūö Môsös, nö ngö ṙô,

¹⁴Kēnyen ò lā uk ngam elyöngö; ap ramūtngövah hökngen cha nö ṙòkhöre yip hamang ṙô ò nö kētö tīre nö i kui ò, hökngö tī cha nö kulëhe ò yip tömaṙôngö.

¹⁵Ngaich vë-ekūö yip kūön Israĕl më-eṅ, ngö ṙô, Öp tötlamëkôre tö ngam Tēv keun tököölre min.

¹⁶Öp mahachōichngö minë-eny ngam Mā Tēv, kumpāhaivah min anga-aṅ; ṙòkhöre tī yip tömaṙôngö min nö kulëhan; tö yip aṅ tahëng inrē, sā töfötnyu nö i patī yē ò nö chōichö ṙô tö minë-eny ngam Mā Tēv, kumpāha min.

¹⁷Ngaich anga-aṅ ngòh tö kapāhatī nö fël tarik kumpāhaivah min anga-aṅ.

¹⁸Ngòh tökapāhatī nö fël töṙeūla haṙīngen ò min: nômö ṙënngen tö nômö.

¹⁹Yē öp tarik nö hamumngen öp holre, sā tī ò, ngatī inlinken min anga-aṅ;

²⁰Tömëngö ṙënngen tö tömëngö, mat ṙënngen tö mat, kanap ṙënngen tö kanap: sā tī ò nö hamumngö ngam tarik ngatī kinëti min angū-ö nö in ò.

²¹Anga-aṅ öp tö kapāhatī tö töṙeūla; haṙīngen ò min: anga-aṅ öp tökapahatī tö tarik kumpahaivah min.

²²Höng hĕng öp min chöngö yīö, tö yip aṅ tahëng inrē tö yip töfötnyu nö i patī: pò Chu Tēv yīö Öich Mā Tēv.

²³Ngaich Môsös nö vë-ekūö yik kūön Israĕl, ngaich kētu nö in ò ök tötlöök el ngam elyöngö, ngaich kulëhe tö ihong. Ngaich ngatī yik kūön Israĕl sā ṙô ngam Mā Tēv nö tölṙô Môsös.