Read Car_Nicobarese LA-EN LĒVĪ 25 Bible Online

LA-EN LĒVĪ 25 - Car_Nicobarese bible

LA-EN LĒVĪ 25

¹Ngaich ngam Mā Tēv nö vë-ekūö Môsös, nö i kui rôngö Sināi, nö ngö ṙô,

²Vë-ekūö yip kūön Israĕl, ngö ṙô tö cha, Yē yīö yih ip panam öp kahëtö Chu in yīö, ngaich min ap panam nö haköpkö ngam anôilö ngam Mā Tēv.

³Tafūöl samyeūheu min më-eṅ teūich ngam taṙeūḵ meh, ngaich tafūöl samyeūheu min më-eṅ kamöpngö nup rōi vāin el panô-òṅ, ngaich hamūl nup ṙòng;

⁴Ngam sinātö pöri samyeūheu min nö anôilö töchēv haneūheu ngam panam, anôilö ngam Mā Tēv: uh më-eṅ rēhĕn teūich ngam taṙeūḵre, um rēhĕn kamöpngö rōi nup vāin el panô-òṅre.

⁵Nup kamahngenre nö sīöp un hamūlö ṙòng tö meh, nup ṙòng vāin inrē töt haṙūötkaṙen un hamūlö tö meh: hĕng samyeūheu an min angū-ö nö töchēv haneūheu ngam panam.

⁶Ngam anôilö ngam panam nyā-aṅkūö yīö min angū-ö; më-eṅ öp kūön alaha meh kikōnyö, töp kikānö kūön alaha meh inrē, öp töhaṙāyö alaha kūön meh kikōnyö töp aṅ tahëng törahëichtaṙen nö iyöng in meh.

⁷Nup nuā meh inrē, tö nup töṙeūla im panam meh, nup ṙòng u min ṙòkhöre nö nyā-aṅkūö.

⁸Ngaich më-eṅ min kaheuk tösat anôilö i nup smyeūheu meh, sat van sat samyeūheu; ngaich anū-ö nö in meh në sakāmö nö sat anôilö i nup samyeūheu, nup töfën anāi machūötöre samyeūheu.

⁹Ngaich më-eṅ min marô-òlkūö tī söömngö ṙô öp römpet öp töpōitô ip sinömö ngam sinātö chingëṅt; im sakāmö inlām tökööl yī-ö min söömngö ṙô ngam römpet marô-òlkūö keuheūtngöre chūök im panam yīö.

¹⁰Ngaich yī-ö min ahetlö ngam tinneui anāi samyeūheu, ngaich ahangkö ṙināḵnyö in yip aṅ ngam panam nö ṙòkhöre: samyeūheu ṙināḵnyi yīö an angū-ö; ngaich yī-ö min kö havantöre i nup aminre, kö havantöre min inrē tarik nö i pīhöre, kūönre inrē.

¹¹Samyeūheu ṙināḵnyi an min nö in yīö ngam tinneui anāi samyeūheu: öt teūich yī-ö min, öt rēhĕn uvòh nup kamnahngenre nö sīöp; öt rēhĕn hamūl ṙòng vāin i nup töt haṙūötkaṙen vāin.

¹²Pò e nö samyeūheu ṙināḵnyi; töhet min angū-ö nö in yīö: nyā nup ṙòng yī-ö min lā el kahôyö töm taṙeūḵ.

¹³I ngih samyeūheu ṙināḵnyi yī-ö min kö havantöre i nup amin re.

¹⁴Ngaich yē meh inyihnguvö min i holre, hēk havah öm ip holre, uh nā-aṅ chōichen in höö.

¹⁵Sā tūmö minë samyeūheu unôichrit ngam ṙināḵnyi samyeūheu min më-eṅ havah ip hol re, ngaich sā tūmö nup samyeūheu u nö ṙòng anga-aṅ min nö inyihngö u nö in meh.

¹⁶Sā ṙôken nup samyeūheu ngatī ṙanūöhlö tī më-eṅ tö ṙāi ane inrē sā kanūönen nup samyeūheu ngatī tī më-eṅ hakūönngö ṙāi; pòn höng nup tumköl ṙòng inyih tö ò nö in meh.

¹⁷Uh yī-ö min chōichen in höö; pa-ekūö pöri min tö ngam Tēv meh: pò Chu Chū-ö Tēv Öich Mā Tēv.

¹⁸Lökten yin la-evṙen tö në chöngö Chu; haköp në inkaha fālen aṅ in Chu la-evṙen tö u inrē; ngaich öt pinlāḵngūṙen min yī-ö iyöng el öp panam.

¹⁹Ngaich kētö ṙòngre min öp panam, ngaich tööḵngen min yī-ö nyā-aṅvkūö, ngaich iyöng in e öi öt pinlāḵnguṙen.

²⁰Ngaich ngö ṙô yī-ö min, Suāp min nyā-aṅkūö hī im sinātö samyeūheu? Yĕh meuk, öt teūich in min, öt rēhĕn hamūl ṙòng taneūichre.

²¹Ngaich Chū-ö min chöngu tö inkôlò i kui yīö im tinfūölö samyeūheu, ngaich ṙôngu min angū-ö tö ṙòng tölūöi samyeūheu.

²²Ngaich yī-ö min teūich im hinëvhöre samyeūheu, ngaich nyā nup ṙòng, nup maṙöinylö inchūökngö; hanöng saha öp minchūötöre samyeūheu, hanöng saha nup ṙòng e nö kuhēt, yī-ö min nyā nup maṙöinylö töhachūöki.

²³Öt inyīhiyö min ngam panam nö urāḵngen; pò e nö panam Chu: pò yīö öi aṅ tahëng ane inrē törahëichtaṙen in Chu.

²⁴Ngaich ṙòkhöre nup panam amīn yīö nö kētu ṙāi invānö min tö yīö.

²⁵Yē öp hanöng kisānö meh nö ṙūöhngenre ötkanôlò, ngaich inyihngö nup rīkre aminre, ngaich öp mak alaha ò min öp tö röhta nö in ò nö yihtöre ngaich havan ngam tö inyīhiyö tök hanöng kisānö ò nö ṙāyu tī.

²⁶Ngaich yē öp tarik nö öt hĕng tak in ò mahavānö e nö ṙāyuti, ngaich ṙūöhölre kanôlò anga-aṅ ngaich kôtökūö tö kanô-òṅre nö havānö e nö ṙāyu tī,

²⁷Hökngen ò nö kaheuk nuk samyeūheu innyihngö e, ngaich havan tö nup sinṙaklökūö nö ip tarik chūök tī ò nö inyihngö e; ngaich havan anga-aṅ nö ip aminre.

²⁸Ngaich yĕn ötkô anga-aṅ nö havantö e nö in re ngaich öp inyihngö ò nöng ngöh min nö eltī ò öp mahavāha e hanöng saha öp samyeūheu ṙināḵnyi: ngaich im samyeūheu ṙināḵnyi min angū-ö nö talöhlöngö, ngaich havan anga-aṅ min nö im amin re.

²⁹Yē öp tarik nö inyihngö elyöngö patī el öp tö kinlōngu el panam, ngaich kô-òren anga-aṅ nö havānö e nö ṙāyu i el töhĕng samyeūheu unôichrit innyihngö e; pò ò nö huvēu-en nö havānö e nö ṙāyu yĕn keuheūt töhĕng samyeūheu.

³⁰Yē e nö öt havānö nö ṙāyu i el töhĕng samyeūheu, ngaich öp patī öp el öp tökinlōngu el panam nö vītuṙen nö urāḵngen nö ip mahavāha e, i tumkölchap ò: öt talöhlöng angū-ö min ip samyeūheu ṙināḵnyi,

³¹Nup patī pöri i nup tuhēt töthavīlöng tö kinlōngö ngaich kaheuktu anū-ö nö i nup taṙeūḵ ngam panam: hanvānen anū-ö nö ṙāyu, ngaich talöhlöng anū-ö ip samyeūheu ṙīnāḵnyi.

³²Nup el panam yik kūön Lēvī pöri, nup patī el nup el panam amin cha, kô-òren vē kūön Lēvī nöng meuk hēre nö havānö e nö ṙāyu.

³³Yĕn hĕng tak öp kūön Lēvī töṙāyutī nö havānö e, tö ngam el panam amin ò, talöhlöng min ip samyeūheu ṙināḵnyi: pò në patī vē kūön Lēvī el panam nö amin cha nö i yip kūön Israĕl.

³⁴Öp taṙeūḵ pöri el kahôyö tö el panam cha tö ötkô nö inyīhiyö; pò e nö amin cha nö tötchanūhuvṙen.

³⁵Yē öp hanöng kisānö meh nö ṙūöhngenre nö ötkôlò, ane inrē öt kô-òltī nö in meh; ṙapken ò më-eṅ: sā aṅ tahëng ane inrē törahëichtaṙen nö iyöng anga-aṅ min nö iyöng in meh.

³⁶Uh më-eṅ kēḵ ṙāi inṙūöngkö rupīö in ò, hēk un kē-ĕ ṙāi nup tösīöplöre ṙôken; pa-ekūö pöri më-eṅ tö ngam Tēv meh: hòṅ ngam hanöng kisānö meh nö iyöng in meh.

³⁷Um kē-ĕkūö ò tö rupīöre nö ṙāyu inṙūöngka, um rēhĕn kētö nyā-aṅkūöre in ò nö asīöplöng ṙôken.

³⁸Chū-ö Chin Tēv meh Öich kamënyen meh ṙā-ang ap panam Aikup, Öich kē-ĕkūö meh tö ngam panam Kanā-an, Öich Tēv meh.

³⁹Yē öp hanöng kisānö meh nö ṙūöhngenre ötkanôlò nö in meh; ngaich inyihngöre nö in meh; uh më-eṅ vīten ò nö la-evṙen nö sā kūönkūö töhakövö:

⁴⁰Sā töhaṙāyö mahalanṙen, sā töṙahëichtaṙen inrē nö iyöng, in meh min anga-aṅ nö ngatī; la-evṙen min anga-aṅ nö in meh hanöng saha öp samyeūheu ṙināḵnyi:

⁴¹Kiröönngöre min ngaich anga-aṅ nö ṙā-ang in meh, tö yip kūön ò nö hol ò, ngaich havantöre nö i patī mupīhö, i amin yik yöng ò inrē anga-aṅ nö havantöre.

⁴²Pò cha nö mahalanṙen Chu, nö kahënyö Chu ṙā-ang im panam Aikup: un inyīhiyö cha-a nö töhakövö tarik.

⁴³Um hayöngan holtö chanökhutīre; pa-ekūö pöri tö ngam Tēv meh.

⁴⁴Yip tarik kikōnyö töhakövö tö meh kikānö inrē, mi-in meh min; më pumnāmö tarik mahavīlen meh, in cha min më-eṅ havah kikōnyö töhakövö kikānö inrē.

⁴⁵Hēk inrē in yip kūön aṅ tahëng yip törahëichtaṙen nö iyöng in yīö; in cha min yī-ö havah, in yip mupīhö cha inrē yip holtöṙah yīö, yip kayôḵnyö cha nö im panam; cha-a min amin yīö.

⁴⁶Ngaich vīten cha min yī-ö nö amin yip kūön yīö, unôichrit yīö, nö ṙapka nö amin; in cha min yī-ö kēḵ hakövre tö tarik örheūheu: uh pöri yī-ö hayöng i kui yip hanöng kisānöre kūön Israĕl öi kö i kūi höö, holtö chanökhutī.

⁴⁷Yē öp aṅ tahëng hēk öp törahëichtaṙen nö iyöng in meh nö ṙūöhölre kanôlò, ngaich öp hanöng kisānö meh hol ò nö ṙūöhngenre ötkanôlò, ngaich inyihngöre nö im aṅ tahëng hēk törahëichtaṙen nö iyöng in meh, hēk in yip kūön ngam mupīöhö aṅ tahëng:

⁴⁸Kô-òre anga-aṅ nö ṙāyu invānö unôichritre nö inyihngöre; kô-òren nö hĕng tak tö yip hanöng kisānö ò mahavānan nö ṙāyu invaha:

⁴⁹Hēk öp kikōnyö kūön öp kōiny yöng ò, mahavānan nö ṙāyutī, hēk öp töng ranghö mak ahalaha ò aṅ i mupīhö ò mahavānan nö ṙāyutī; hēk yĕn ṙūöhlöre kabôlò anga-aṅ, ngaich kô-òren anga-aṅ nö havānöre nö ṙāyutī.

⁵⁰Ngaich anga-aṅ min nö kaheuk nö in ò öp mahavāhan löktökūö ngam samyeūheu hē ò nö inyihngöre nö in ò, söl i ngam samyeūheu ṙināḵnyö: ngaich öp ṙāi innyihngö ò min nö sā tūmö nup samyeūheu; sā öp ṙētak ngòh töhaṙāyö kūönkūö ngatī anga-aṅ min nö in ò.

⁵¹Yĕn ṙòngmö ṙōltöre samyeūheu, sā u tī min anga-aṅ nö havantö ṙāi invānöre i nup rupīö ṙāi ò sin nö havāha.

⁵²Ngaich yĕn öt ṙōltöre samyeūheu pöri nö im samyeūheu ṙināḵnyö; ngaich anga-aṅ min nö kaheuk nö in ò, sā nuk samyeūheu tī min anga-aṅ nö havantö ṙāi invānöre.

⁵³Sā töhaṙāyö kūön kūö min anga-aṅ nö in ò i tum samyeūheu: un hayöng anga-aṅ nö i kui ò nö holtö chanökhutī.

⁵⁴Yĕn ngatī anga-aṅ nö ṙāyu invānö, ngaich talöhlöng min anga-aṅ ip samyeūheu ṙināḵnyö, anga-aṅ, tö yip kūön ò inrē in ò.

⁵⁵Pòn kūön alaha Chu vē kūön Israĕl; kūön alaha Chu yin kahënyö chu ṙā-ang öp panam Aikup, chū-ö Chin Tēv meh Öich Mā Tēv.