Read Car_Nicobarese LA-EN LĒVĪ 26 Bible Online

LA-EN LĒVĪ 26 - Car_Nicobarese bible

LA-EN LĒVĪ 26

¹Uh yin vī insātēvre, ui asöklö insātēv, hēk nup tö fën mirëṙö kaha machööḵlö, ui rēhĕn min ṙāḵtö ihong insā im panam yīö, nö pò yīö hòṅ sōntökūöre in ò: tön Chū-ö Chin Tēv meh, Öich Mā Tēv.

²Haköp në anôilö Chu yī-ö min, milēḵṙen inrē tö ngam töhet chūök Chu: Chū-ö Chin Mā Tēv.

³Yē yīö lök i në chöngö Chu, ane inrē haköp në hachöngten Chu, la-evṙen tö u inrē;

⁴Ngaich Chu-ö min kētö nup kumṙah ip hē u, ṙūöhölre ṙòng aṅkūö nup chōn ngam taṙeūḵ min inrē nö ṙônguvö.

⁵Ngaich yī-ö min söl ip inmūlö ṙòng vaīn tī öi piṙōng ṙòng, ane inrē hamūl ṙòng vāin söl ip hē tineūichö: tööḵngen yī-ö min inrē tö nyā-aṅkūöre, öt pinlāḵnguṙen inrē öi iyöng im panamre.

⁶Kētö lanāmö Chin inrē im panam, hulalngöre yī-ö min inrē, ngaich öt hĕng tak min pumnëḵtökūö yīö: ane inrē Chu-ö min vīten në tötlöök töṙeūla nö ṙā-angre nö im panam, ötrēhĕn min ngam sanët nö lökngö el ngam panam yīö.

⁷Ngaich yī-ö min lūḵ yip lā-alre, fukngö min cha-a tö kūö sanët nö i kūö yīö.

⁸Höng taneui tak in yīö min nö lūḵ tö hēngòng, ane inrē hēngòng min in yīö nö lūḵ tö söm köiny: fukngö min cha-a tö kūö sanët nö i kūö yīö yip tökunyāhaṅ elmat tö yīö.

⁹Milēḵ Chin min in yīö, vīlen yīö inrē miṙònglö, ṙūöhlö ṙôken yīö inrē; in yīö tī inrē haköpngö ngam kinlēḵngô Chu.

¹⁰Ngaich yī-ö min nyā nup maṙönylö inchūökngö tömarôangen inlinngen, ngaich yī-ö min kēnyö nup maṙöinylö tö kūö nup tufömngöre.

¹¹Vī töp inrūkuire Chin min in yīö: ngaich ngih nômö Chu min nö öt sa-òkkūö tö yīö.

¹²In yīö Chin min havötköre, ngaich min Öich Tēv yīö, ngaich yī-ö min inrē tarik chu.

¹³Chū-ö Chin Tēv meh Öich Mā Tēv, kamënyen meh ṙā-ang ap panam Aikup, pò yīö sōḵtuṙen töhakövö tarik cha; ngaich tī Chu-ö likölngö öp kaneun yīö, ngaich vīten yīö kiröönngöre chiphaka.

¹⁴Yē yīö pöri min öt hang ṙô Chu, öt lök i në hachöngten Chu inrē;

¹⁵Yē yīö min inrē sōḵ-o në chöngö Chu, yē ngam nômö yīö inrē nö sa-òkhö në inkaha fālen aṅ in Chu, lökngen yīö min ötla-evṙen tö në hachönten Chu, filalngö ngam kilēḵngô Chu pöri;

¹⁶Ngih ön min tī Chu in yīö; vīlö pihë-ekūö yīö Chin min,töp unhööpö, vanūöyö inrē, öp töchihôkö mat tī min, ngaich vīten ngam nômö, nö chīṅpngö: chök alaha yī-ö min ngaich teūichtö kulölre, pòn nyā-aṅ min tö yip tökunyāhaṅ elmat tö yīö;

¹⁷Havööngökūöre Chin min tö yīö, ngaich yī-ö min ötkô i kūö yip lā-alre: hayöngö yīö; ngaich yī-ö min höng pāngö yĕi pòrô ötlūḵu.

¹⁸Yē yīö min sönngenre öt hang ṙô chu tö në, ṙūhölre tī min Chu-ö chökṙen yīö sat van tī kūö nup tökööl yīö.

¹⁹Likölngö ngam inkeūlen yīö Chin min chöngö; ane inrē vīlö ngam halīöngö yīö min nö sā vët, ngam tumlat yīö inrē nö sā vët, mās;

²⁰Ngaich nup kumlēḵ yīö min nö mëichngöre nöng chanök alaha: pò ngam panam yīö min nö ötṙôngu aṅkūö, ötrēhĕn nup chōn im panam yīö nö ṙônguvö min.

²¹Yē yīö harīkngö talöököre tö Chu, öt hang ṙô Chu inrē; sat van ṙanūöhölre nup tölëlngökūö invah kum Chu min i kui yīö asā nup tökööl yīö.

²²Tīntö nup töṙeūla Chin min inrē in yīö, nup mu-ulāingö yip kūön yīö min, fëlngö nup nuā yīö inrē ngaich vīten yīö öt ṙōltak; ngaich nup talöökö yīö min nö öt aṅhavël.

²³Yē yīö min öt hanlööktitṙen tö Chu öi lökten i në, harīkngö talöököre pöri tö Chu;

²⁴Ngaich harīkngö talöököre min Chu-ö tö yīö; fëlö yīö min inrē sat van tī kūö nup tökööl yīö.

²⁵Kētöp sanët Chin min i kui yīö, ngaich havahalvah ngam kinlēḵngô; ngaich yī-ö min hamūlö ël nup el panam yīö: ngaich tīntö öp invah Chū-ö min tölëlngökūö in yīö; ngaich yī-ö min kētu eltī öp tökunyāhaṅ elmat.

²⁶Hē Chu likölngö kaneun ngam rôtī yīö, söm tak min yip kikānö kamhul nup rôtī yīö nö el töhĕng tisum, ngaich kētö nup rôtī yīö min cha-a nö hēk nö kalaha lumngan; nyā min yī-ö ngaich hö-ö tööḵngen.

²⁷Ngaich yē yīö öt hang ṙô Chu nö pòrô ngih nö ngaich, harīkngö talöököre pöri tö Chu;

²⁸Ngaich i lanīnöre Chū-ö harīkngö talöököre tö yīö, chökṙen yīö min Chū-ö inrē sat van tī kūö nup tökööl yīö.

²⁹Ngaich yī-ö min kāḵ alaha yip kūönre kikōnyö, kāḵ alaha yip kūönre kikānö inrē.

³⁰Ngaich Chu-ö min piyāingö nup chūök insātēv, ṙattö ngam insā tavūöi yīö inrē,kavaltö nup tökapah alaha yīö inrē nö i kui nup tökapah insātēv yīö; ngaich Chū-ö min sa-òkhen yīö.

³¹Ngaich min Chū-ö vītö nup el panam yīö nö öt aṅhaṅvkūö, vītö nup töhet chūök yīö inrē nö öt aṅhaṅvkūö, ngaich Chū-ö min inrē öt tongkö nup tinhūsö yīö.

³²Kētuṙen min tö chu ngam panam nö öt aṅhavkūö: pingangkūö min tö e yip tökunyāha elmat tö yīö mī-iyöng in e.

³³Ngaich chū-ö min pirātngen yīö i yip pumnāmö tarik hōknyö öp sanëtre chin min unôichrit yīö: ngaich öp panam yīö min nö öt aṅhavkūö, nup el panam yīö inrē nö öt aṅhav.

³⁴Ngaich ngam panam min nö kumchikngenre nö ôilöre, irô-òten e nö öt aṅhavkūö, ngaich yī-ö min i panam yip tökunyāha elmat tö yīö; hē e min inrē ngam panam nö heūheure kumchikngenre inrē tö minë anôilöre.

³⁵Irô-òten e nö öt aṅhavkūö angū-ö min nö haneūheuvö; ngam tö rö-ö haneūheu e hē nuk anôilö yīö, hē yīö iyöng in e.

³⁶Ngaich cha-a min yip tö ṙā-ai aṅ in yīö, tīntö ötkumlēḵ-en ellōn cha min chu-ö i nup panam yip tökunyāha elmat tö cha: ngaich öp sinlë-e ṙô rōi chōn min nö lūḵu cha; falngöre cha-a ngaich, sā fanalngöre tökūö sanët; fukngö cha-a min inrē yē cha nö öt lūḵu.

³⁷Ngaich cha-a min nöng kö kavē-ĕre nö i kui höö, sā re yĕn i kūö fël hē cha nöng öt lūḵu ngaich yī-ö min ötkanô-òvö sökhak i kūö yip lā-alre.

³⁸Lëlngö yī-ö min in yip pumnāmö tarik, ngaich öp panam yip tökunyāha elmat tö yīö nö kāḵngen yīö min.

³⁹Ngaich cha-a yip tö ōtren aṅ in yīö min nöng lëvngö i nup tökööl cha i panam yip tökunyāha elmat tö yīö, ane inrē i nuk tökööl yik yöng cha min cha-a nö lëvngö anòngngen cha.

⁴⁰Ngaich halööknyôre min cha-a tö nup tököölre, tökööl yik yöng cha inrē, i tanôichngen cha nup tanôichngen cha nö in Chu, pò cha inrē nö harīkngö röönre tö Chu.

⁴¹Ngatī Chū-ö inrē harīkngö röönre tö cha ngaich kēten cha i panam yip tökunyāha elmat tö cha: yē öp töttunyīnyi ellōn cha nö hayāichngöre, ngaich inrē cha-a nö hökngenre nö sācha tökūö nup tököölre;

⁴²Ngaich fēḵĕlre Chū-ö min tö ngam kinlēḵngôre in Yāköp; kinlēḵngô Chu inrē in Isāk, fēḵĕlre inrē tö ngam kinlēḵngô Chu in Aprahām; fēḵĕlre tö ngam panam.

⁴³Ṙā-ayö min inrē ngam panam tö cha, ngaich kumchikngenre tö ngam anôilöre, isaha e nö öt aṅhavkūö tö cha; ngaich hökngenre cha-a min tö ngam sācha kūö tökööl cha: kūö cha nö sōḵo ngam inkaha fālen aṅ in Chu, ngaich ngam nômö cha inrē nö sa-òkhö në chöngö Chu.

⁴⁴Pòrô pöri nö ṙòkhöre anū-ö, yē cha nö i panam yip tökunyāha elmat tö cha, öt sōḵen cha min Chū-ö, ötrēhĕn Öich sa-òkhen cha, Öich keuheūtngöre tī halëlngen cha, ane inrē piyāingö ngam kinlēḵngô in cha: pò Chu Tēv cha Öich Mā Tēv.

⁴⁵Pòkūö cha pöri min chū-ö köpölōn tö ngam kinlēḵngô yik muvöhngö cha, yik kahënyö chu ṙā-ang ngam panam Aikup i kūö vē pumnāmö tarik pò Chu hòṅ Tēv cha: Chū-ö Chin Mā Tēv.

⁴⁶Në nun chöngö inkaha fālen inrē, vahī ngam Mā Tēv ihôi ò tö yip kūön Isarĕl i kui öp rôngö Sināi nö löktö eltī Môsös.