Read Car_Nicobarese LA-EN LĒVĪ 4 Bible Online

LA-EN LĒVĪ 4 - Car_Nicobarese bible

LA-EN LĒVĪ 4

¹Ngaich vë-ekūö Môsös ngam Mā Tēv; nö ngö ṙô,

²Vë-ekūö yip kūön Israĕl, ngö ṙô, Yĕn hĕng tak min tö-amahaiṙen nö köölö fālen, nö i nup tö sōḵtu tö ngam Mā Tēv, ngaich hēngö lahök nö in u;

³Yē öp kūönṙô min nö köölö fālen ngaich sā kamëtö kui vē tarik tö tökööl; ngaich hökngen ò nö kētö tökētu kūön öp tökööl ò, öp kanöölö fālen, hĕng nòng kōiny kun nuā töt vahav alaha tökētu nö i ngam Mā Tēv tö kūö tökööl.

⁴Ngaich kētö öp kōiny nuā min anga-aṅ im inkūp ngam rūkui manūlö i kūö ngam Mā Tēv; ngaich ṙātö eltīre anga-aṅ nö i kui ngam kōiny nuā, ngaich ṙatnyö likeun ngam kōiny nuā nö i kūö ngam Mā Tēv.

⁵Ngaich ngam töhachāmö kui Kūönṙô min nö kēḵ ngam mahām ngam kōiny nuā ngaich kētö e nö im rūkui manūlö.

⁶Ngaich ngam Kūönṙô nö sumlö kuntīre nö im mahām, ngaich kicheny ngam mahām nö sat heuh tī nö i kūö ngam Mā Tēv i kūö ngam innyatngö ngam töhet chūök.

⁷Ngaich ngam Kūönṙô min nö lūöptö ngam mahām nö i kui nup sinrōl ngam tahāklö nö tötashūsa nö i kūö ngam Mā Tēv, öp me-ël ngam rūkui manūlö; keuheūtlöre öp mahām ngam tahāklö ngam töföngö tökētu nö in öp inkūp ngam rūkui manūlö.

⁸Ngaich ṙòkhöre min nup tösangöö ngam nuā ngam tökētu kūö tökööl nö kē-ĕyö nö ṙā-ang in ò; öp tösangöö hanum, ṙòkhöre inrē tösangöö ellōn ò,

⁹Nup elkilpong tönët tö nup ayū in u, nup mī-i ṙat, töp tö-angūö inrē ip alip, nö kē-ĕyö nö lökngö i minë elkilpong,

¹⁰Sā kinë-eng u nö ṙā-ang im kōiny nuā ngam tökētu nö inlāmö: ngaich ngam Kūönṙô min nö föngö u nö el ngam tahāklö töföngö tökētu.

¹¹Ngaich ngam uk ngam nuā, tö nup alaha ò, hol töp kui ò, tö nup kalröön ò inrē tö nup aṅ ellōn ò sôḵ ò inrē,

¹²Keuheūtlöre ngam nuā min nö kēnyu nö lā uk ngam elyöngö ip töhet chūök, öp chūök hinôngngö tisum, ngaich föngi nö i kūö ngòh tameūyö: i chūök nup tisum nö hōngi min angū-ö nö föngi.

¹³Yē yip ṙôngö Israĕl min nö ṙòkhöre nö köölö fālen, ngaich angū-ö nö öt meūkö tö yip tömaṙôngö, ngaich acha-a nö kēken nup sinôtöre tö ngam Mā Tēv, ngaich fāluṙen.

¹⁴Yē ngam tökööl cha nö akahaiṙen, ngaich yip tömaṙôngö min nö hĕng nòng kahëti tö kun kōiny nuā tökētu kūö tökööl, ngaich kēten ò nö i kūö ngam rūkui manūlö.

¹⁵Ngaich yip ṙôngö yip tarik min nö ṙātö eltīre nö i kui ngam nuā nö i kūö ngam Mā Tēv: ṙatnyu likeun ngaich ngam nuā nö i kūö ngam Mā Tēv.

¹⁶Ngaich öp Kūönṙô töhachāmö kui nö kētö ngam mahām ngam kōiny nuā min nö im rūkui manūlö:

¹⁷Ngaich ngam Kūönṙô nö sumtö kuntīre nö im mahām; ngaich kicheny ngam mahām nö sat heuh tī nö i kūö ngam Mā Tēv, i kūö ngam innyatngö.

¹⁸Ngaich anga-aṅ min nö lūöptö ngam mahām nö i minë sinrōl ngam tahāklö ngam i kūö ngam Mā Tēv, ngam el ngam rūkui manūlö, ngaich keuheūttöre min ngam mahām nö ṙöösi tö ò nö i rööntö ngam tahāklö töföngö tökētu öp ip inkūp ngam rūkui manūlö.

¹⁹Ṙòkhöre nup tösangöö ò min nö kē-ĕyö nö ṙā-ang in ò, ngaich föngö nö el ngam tahāklö.

²⁰Ngati tī min anga-aṅ tö ngam nuā; sā tīre tö ngam nuā tökētu kūö tökööl, ngatī tī anga-aṅ tö ngòh; ngaich ngam Kūönṙô min nö vī inlām tökööl cha, ngaich aṙēlöngö cha-a min.

²¹Ngaich anga-aṅ min nö kēnyö ngam nuā nö lā uk öp elyöngö, ngaich föngngen ò sā tīre tö ngam mu-urĕh nuā: tökētu an anga-aṅ kūö tökööl tömaṙôngö.

²²Yē öp mahayöng nö köölö fālen, nö amahaiṙen i töhĕng i në nö ṙòkhöre hachöngten ngam Mā Tēv, ngam Tēv ò, nö tö un kēka, köölö fālen anga-aṅ ngaich;

²³Yē öp tökööl ò, öp chūök ò nö köölö fālen, nö vënyu nö in ò, ngaich hĕngö kahëti anga-aṅ tö kōiny pököre, töt vahav alaha;

²⁴Ngaich anga-aṅ min nö ṙātö tīre nö i kui öp pököre, ṙatnyö likeun ò ngaich ip chūökö öp chūök cha nö ṙatnyö likeun öp töföngö tökētu nö i kūö ngam Mā Tēv: tökētu an angū-ö kūö tökööl.

²⁵Ngaich öp Kūönṙô min nö kēḵ aṅ ip mahām aṅ im tökētu kūö tökööl nö aṅtī tö kuntīre, ngaich lūöptö e i minë sinrōl ngam tahāklö töföngö tökētu, ngaich ngam mahām min nö ṙöstu nö i rööntö ngam tahāklö tökētu.

²⁶Ngaich ṙòkhöre nup tösangöö min nö föngö nö el ngam tahāklö, sā nup tösangöö ngam tökētu tö kūö inlāmö: ngaich ngam Kūönṙô min nö havëkö inlām tökööl ò nö ip kanöölö fālen ò, ngaich aṙēlöngö min anga-aṅ.

²⁷Yĕn hĕng tak öp aṅ i yip töng tarika nö amahaiṙen nö köölö fālen, i töhĕng i në nö ṙòkhöre hachöngten ngam Mā Tēv nö öt un kēkaṙen ngaich köölö fālen;

²⁸Yē öp tökööl ò, öp chūök ò nö köölö fālen, nö vënyu nö in ò, ngaich hĕng nòng kahëti anga-aṅ tö kan pököre, töt vahav alaha, kūö öp tökööl ò öp chūök ò nö köölö fālen.

²⁹Ngaich anga-aṅ min nö ṙātö tīre nö i kui öp tökētu kūö tökööl, ngaich ṙatnyö likeun ngam tökētu kūö tökööl nö im chūök töföngö tökētu.

³⁰Ngaich öp Kūönṙô min nö kēḵ aṅ ip mahām nö aṅti tö kuntīre, ngaich lūöptö e nö i kui nup sinrōlngam tahāklö töföngö tökētu, ngaich keuheūttöre min ngam mahām nö ṙöstu nö i röön tö ngam tahāklö.

³¹Ngaich ṙòkhöre min nup tösangöö nö kē-ĕyö, sā kinëngö nup tösangöö i nup tökētu tö kūö inlāmö: ngaich föngö e min ngam Kūönṙô nö el ngam tahāklö nö tötahūsa kumchik nö im Mā Tēv; ngaich ngam Kūönṙô min nö havëkö inlām tökööl ò, ngaich aṙēlöngö min anga-aṅ.

³²Yē ò nö kētö kun pököre nö tökētu kūö tökööl, kēten ò min anga-aṅ nö kan töt vahav alaha.

³³Ngaich anga-aṅ min nö ṙātö tīre nö i kui ngam tökētu kūö tökööl, ngaich ṙatnyö likeun ò nö tökētu kūö tökööl, im chūökö chūök cha nö ṙatnyö likeun ngam töföngö tökētu.

³⁴Ngaich ngam Kūönṙô min nö kēḵ aṅ i ngam mahām ngam tökētu kūö tökööl nö aṅtī tö kuntīre, ngaich lūöptö e nö i kui minë sinrōl ngam tahāklö töföngö tökētu, ngaich keuheūttöre ngam mahām nö ṙöhtu nö i rööntö ngam tahāklö:

³⁵Ngaich kē-ĕyö nup tösangöö min nö ṙòkhöre, sā nup tösangöö ngam kun pököre nö kē-ĕyö im tökētu kūö inlāmö; ngaich ngam Kūönṙô min nö föngö u nö el ngam tahāklö, i kui nup tökētu nö im Mā Tēv nö lökten i kūö tameūyö, i kui nup tökētu nö im Mā Tēv nö lökten i kūö tameūyö; ngaich ngam Kūönṙô min nö havëkö inṙē-ĕl tökööl ò, ip tökööl, chūök aṙēlöngö min anga-aṅ.