Read Car_Nicobarese LA-EN LĒVĪ 5 Bible Online

LA-EN LĒVĪ 5 - Car_Nicobarese bible

LA-EN LĒVĪ 5

¹Yĕn hĕng tak tököölö fālen, nö kūö ò nö chūöku ṙô, yĕn mameuk anga-aṅ, yē ò nö meuk hēk akahalōn, yĕn öt kônyô anga-aṅ nö eūkö e, ngaich anga-aṅ min nö keun öp fālenre;

²Hēk yĕn hĕng tak lamūölkö töt het, yē e nö alaha tökapah töt het töṙeūla, hēk alaha tökapah töt het nuā, hēk alaha tökapah töt het töṙeūla chehen, nyatngö angū-ö tö ò, ngaich kuvīö anga-aṅ, köölö fālen min anga-aṅ.

³Hēk yĕn lūölkö töt het anga-aṅ i tarik, öp tö sitih töt het in ò, nyatngö angū-ö inrē tö ò; yē ò nö akahalōn tö e, ngaich tö köölö fālen min anga-aṅ.

⁴Hēk yĕn hĕng tak töt afēku nö chūöku ṙô nö löknyö elvāngre nö hòṅ kēken tötlöök, hēk tölöök, nup töng sitih ṙô öp tarik min nö chūöku ṙô nö ötfahēku, nyatngö inrē angū-ö tö ò; yē ò nö akahalōn tö e, ngaich anga-aṅ min nö köölö fālen i tö hĕng in u.

⁵Ngaich mīnö, yē ò nö köölö fālen i töhĕng in u, halööknyôre min anga-aṅ ip chūökre nö köölö fālen:

⁶Ngaich anga-aṅ min nö kētö tökētu kūö tököölre nö im Mā Tēv kūö öp kanöölö fālen ò; hĕng nòng kan aṅ i nup töhĕng nòng kūön sīṅp hēk hĕng nòng pököre, tökētu kūö tökööl; ngaich ngam Kūönṙô min nö havëkö inlām tökööl ò.

⁷Ngaich yē ò nö ötkô nö kēḵ kūön sīṅp, ngaich anga-aṅ min nö kētö tökētu kūö tökööl, öp tökööl fālen ò, nët nòng nyö-öṅ, hēk nët nòng kūön pumpa, nö i ngam Mā Tēv; hĕng nòng tökētu kūö tökööl, ngam tahëng inrē töföngö tökētu.

⁸Ngaich min anga-aṅ nö ip Kūönṙô, öp kamëtö tökētu kūö tökööl nö urĕh, litòkngö ngam kui ò ngaich anga-aṅ nö i ngam likeun ò, hö-ö pöri nö harēvö alaha anga-aṅ:

⁹Ngaich min anga-aṅ nö kicheny öp mahām tökētu kūö tökööl öp i taseū ngam tahāklö; ngaich öp chööḵ ngam mahām min nö hareūtu nö i rööntö ngam tahāklö: tökētu an angū-ö kūö tökööl.

¹⁰Ngaich anga-aṅ min inrē nö kētö ngam innët nòng nö töföngö tökētu, asā ngam chöngö: ngaich ngam Kūönṙô min nö havëkö inlām tökööl ò, ngaich aṙēlöngö min anga-aṅ.

¹¹Yē ò pöri nö öthuveū-en tö tönët nòng nyö-öṅ hēk tönët nòng kūön pumpa, ngaich anga-aṅ min nö kētö öp kahëtö ò kūö tökööl ò, hĕng nyamum efā (1 kilō lumngan) i tösöm öp töfaṙëcha atra tökētu an nö in e, un chaplöng inrē lōpān nö in e: tön tökētu an angū-ö kūö tökööl.

¹²Ngaich kēten e anga-aṅ nö ip Kūönṙô, ngaich öp Kūönṙô min nö hĕng mi eltī-i kahë nö in e nö inköpkölōn ngaich föngö e nö el ngam tahāklö, i kui nup tökētu nö i ngam Mā Tēv nö lökten i kūö tameūyö: tökētu an angū-ö kūö tökööl.

¹³Ngaich ngam Kūönṙô min nö havëkö inlām tökööl ò nö ip tökööl kanöölö fālen ò aṅ i në, ngaich aṙēlöngö min anga-aṅ: ngaich öp chööḵṙen min nö lumnööṙö öp kūönṙö, nö nyā-aṅ tökētu.

¹⁴Ngaich ngam Mā Tēv nö vë-ekūö Môsös, nö ngö ṙô,

¹⁵Yĕn hĕng tak öp töfāluṙen nö tôichngen, ngaich köölö fālen nö amahaiṙen, nö i nup töhet aṅ im Mā Tēv; ngaich anga-aṅ min nö kētö tökētu kūö fālenre, nö im Mā Tēv, hĕng kūön sīṅp töt vahav alaha aṅ i tö hĕng kiteūm asā öp ṙāi ò i rupīö siköl (chantī), tö sā öp siköl ngam töhet chūök, tökētu kūö fālen:

¹⁶Ngaich anga-aṅ min nö haṙënngen nuk tö ngaich falenre nö im töhet, ngaich ṙūöten ṙôken alaha ngam tinneui lā in e, ngaich kētö e nö ip Kūönṙô: ngaich ngam Kūönṙô min nö havëkö inlām tökööl ò nö holtö ngam kūön sīṅp tökētu kūö fālen ngaich aṙēlöngö min anga-aṅ.

¹⁷Ane inrē yĕn hĕng tak tököölö fālen, nö hēngö lahūölken tö në tö sōḵtu nö lūölkaṙen tö ngam Mā Tēv; pòrô anga-aṅ nö öt akahaiṙen tö e, sön anga-aṅ nö köölö fālen, ngaich min anga-aṅ nö keun kanöölö fālenre.

¹⁸Ngaich kētö kūön sīṅp min anga-aṅ hĕng nòng töt vahav alaha aṅ i töhĕng kiteūm, sā ṙôkö ṙāi tī meh, tö kūö fālen tökētu nö im Kūönṙô, ngaich ngam Kūönṙô min nö havëkö inlām tökööl ò nö ip vanāichö ò nö öt hutölhangen öt akahngen e inrē anga-aṅ, ngaich aṙēlöngö min anga-aṅ.

¹⁹Tökētu an angū-ö kūö fālen: kô-en an nö köölö fālen nö i kūö ngam Mā Tēv.