Read Car_Nicobarese LA-EN LĒVĪ 6 Bible Online

LA-EN LĒVĪ 6 - Car_Nicobarese bible

LA-EN LĒVĪ 6

¹Ngaich ngam Mā Tēv nö vë-ekūö Môsös, nö ngö ṙô,

²Yĕn hĕng tak tököölö fālen, lūölken tanôichngen fālen inrē nö im Mā Tēv, michūṙen inrē nö i holre nö ip hayōmkenre, hēk ip kinlēḵngô hēk i unlāyö, hēk hakihten öp holre;

³Hēk ahūlen öp töchatngen, chūökuṙô inrē nö minyôiny-aṅ, in u anū-ö nö ṙòkhöre la-en ngòh tarik, köölö fālen nö in e:

⁴Ngaich angū-ö min, yē ò nö köölö fālen, ane inrē fāluṙen, ngaich anga-aṅ min nö havan tö öp ulāingöre; hēk taneūngen ò nö lökten i inkihten, hēk öp tökētu hayōmken ò, hēk öp töchatngen ahūlen ò,

⁵Hēk öp töchatngen ahūlen ò, nö minyôiny-aṅ; hateung ṙôken e min anga-aṅ nö havantö e, Ṙūötö ṙôken öp tinneui lā e min anga-aṅ inrē; ngaich kē-ĕkūö ò min anga-aṅ tö e öp töchëhevṙen, ip sakāmö hē ò nö kôti nö fāluṙen.

⁶Ngaich anga-aṅ min nö kētö öp kūö fālen ò tökētu nö im Mā Tēv, hĕng nòng kūön sīṅp aṅ i nup tö kiteūmhaka, töt vahavö sā ṙôken öp ṙāi ò tö lōn meh nö tökētu kūö fālen, nö ip Kūönṙô:

⁷Ngaich ngam kūönṙô min nö havëkö inlām tökööl ò, i kūö ngam Mā Tēv, ngaich aṙēlöngö min anga-aṅ; nö i nup töng sitih kahëken ò nup lökngen ò nö falūṙen.

⁸Ngaich ngam Mā Tēv nö vë-ekūö Môsös, nö ngö ṙô,

⁹Tölṙô Āròn tö yip kikōnyö kūön ò inrē, ngö ṙô, Ngih ön chöngö nö im töföngö tökētu: el ngam tāng öp min nö i kui nup ngòh öp töföngö tökētu nö el ngam tahāklö nö hĕng mitööm söllö peuheū; öp tameūyö inrē el ngam tahāklö nö haköpö hanūṙö kūö.

¹⁰Ngaich öp Kūönṙô min nö hayutlöre töp linen inyutre, töp linen inrē töngënö kalröön pachūma hayutlöng min nö i alaha ò; ngaich anga-aṅ min inrē nö kēḵ öp tisum i chūök öp tameūyö nö ṙāpngökūö töp töföngö tökētu el ngam tahāklö, ngaich anga-aṅ min nö hōngtö u nö i kaha ngam tahāklö.

¹¹Ngaich min anga-aṅ nö luhngö nup inyutre, ngaich hayutlöre tö tahëng, ngaich chātngö nup tisum nö el kahôyöm öp elyöngö ip töhet chūök.

¹²Ngaich öp tameūyö el öp tahāklö nö haköpö hanūṙö kūö nö ël e, sōtuṙen nö nyangngö; kaheuk peuheū min inrē öp Kūönṙô nö föngtö kūö ngòh nö ël e: ngaich hatöök nup töföngö tökētū min anga-aṅ nö ël e nö ṙātu, ngaich ël e nö föng tösangöö tökētu nö inlāmö.

¹³Haköpö min ngam tameūyö nöng iṙūöhö hanūṙö kūö nö el ngam tahāklö; sōtuṙen nö nyangngö.

¹⁴Ngaich ngih inrē chöngö ip nyā-aṅ tökētu: kētö e min yip kikōnyö kūön Āròn nö i kūö ngam Mā Tēv, i kūö ngam tahāklö.

¹⁵Ngaich anga-aṅ min nö kēḵ öp töhĕng mi-el tī-i, aṅ im töfaṙëcha atra nyā-aṅ tökētu, aṅ ip tavī-i in e inrē ṙòkhöre nup tötahūsa lōpān nup i kui öp nyā-aṅ tökētu, föngö min angū-ö nö el öp tahāklö nö tötahūsa kumchik, nö sā inköpkölōn, nö im Mā Tēv.

¹⁶Ngaich nup chööḵṙen e min nö nyā-aṅ tö Āròn tö yip kūön ò inrē kikōnyö; nyā-aṅ min angū-ö ip töhet chūök nö öt holtö tö-aföhlöng: el milūkö öp rūkui manūlö cha-a min nö nyā-aṅ e.

¹⁷Öt kahūlö min angū-ö nö holtö inföhlö. Kētö e chin nö minchööḵ-ö cha aṅ i nup tökētu nö in chu nö lökten i kūö tameūyö; töhet an sā öp tökētu kūö tökööl, sā öp tökētu kūö fālen inrē.

¹⁸Ṙòkhöre kūö yip kikōnyö kūön Āròn nö nyā-aṅ e min. Lumnööṙö cha örheūheu i tumkölchap cha, nö aṅ i nup tökētu aṅ im Mā Tēv nö lökten i kūö tameūyö: het öp min töng lamūölkö u.

¹⁹Ngaich ngam Mā Tēv nö vë-ekūö Môsös, nö ngö ṙô,

²⁰Tökētu ön ngih aṅ in Āròn tö yip kikōnyö kūön ò inrē, ngam kahëtö cha min nö i ngam Mā Tēv ip sakāmö hē ò nö hachāmö; ngam sinömö i töhĕng efā öp töfaṙëcha atra nyā-aṅ tökētu nö örheūheu, ròngti angū-ö tö peuheū, ròngtī inrē tö harap.

²¹El törah kunrālö min angū-ö nö vī-i nö holtö tavī-i; yē e nö sumlöng, kēhĕt e më-eṅ: kētö ngam nyā-aṅ më-eṅ tökētu ngam tökahūlö nö tötahūsa kumchik im Mā Tēv.

²²Ngaich öp kūönṙô tö hachāmö min ṙënngen ò aṅ i yip kikōnyö kūön ò nö kētö e: lökten im tö-örheūheu chöngö angū-ö min nö keuheūtngöre nö haṙāpi nö im Mā Tēv.

²³Ṙòkhöre inrē nup nyā-aṅ tökētu aṅ i Kūönṙô nö haṙāpi min nö keuheūtngöre: öt nyā-aṅ min angū-ö.

²⁴Ngaich ngam Mā Tēv nö vë-ekūö Môsös, nö ngö ṙô,

²⁵Vë-ekūö Āròn tö yip kikōnyö kūön ò inrē, ngö ṙô, Angū-ö ön ngih chöngö im tökētu kūö tökööl: im chūök ngam töföngö tökētu nö ṙatnyu likeun ngam tökētu kūö tökööl min nö ṙatnyu likeun i kūö ngam Mā Tēv: tölngö töhet an angū-ö.

²⁶Öp Kūönṙô kamëtö e, nö kūö tökööl, kāḵa e min: ip töhet chūök min angū-ö nö kāḵa, elmilūkö ngam rūkui manūlö.

²⁷Öp töng sūöhtöre nö im alaha het mīnö: ngaich yē ngam mahām nö kichenytu, el ngam töhet chūök.

²⁸Öp tanīöyö pöri chūök e nö sūmö likūkiyö min: pò e yĕn sūmö nö el mās tēksi ngaich kehngö nö i kaha e, ngaich söichi tö mak,

²⁹Ṙòkhöre kūö yip kikōnyö aṅ in yip Kūönṙô nö kāḵa e min: tölngö töhet an angū-ö.

³⁰Öt kāḵ-a min öp tökētu kūö tökööl, öp tökēhĕtvö mahām nö el ngam rūkui manūlö el ngam töhet chūök, nö vanī inlām tökööl: föngö an min angū-ö nö i kūö tameūyö.