Read Car_Nicobarese LA-EN LĒVĪ 7 Bible Online

LA-EN LĒVĪ 7 - Car_Nicobarese bible

LA-EN LĒVĪ 7

¹Ngih ön inrē chöngö i tökētu kūö fālen: tölngö töhet an angū-ö.

²Ip chūök cha nö ṙatnyö likeun töföngö tökētu in e cha-a min nö ṙatnyö likeun ngam tökētu kūön fālen: ngaich kichënyö mahām min anga-aṅ nö el öp tahāklö nö vintakūö.

³Ngaich anga-aṅ min nö kētö nup tösangöö ò nö ṙòkhöre: ap tösangöö lamrit, tösangöö hanum ellōn ò inrē,

⁴Nup tönët elkilpong, tö nup ayū in u inrē nup i ṙat, töp tö-angūö inrē in öp alip, holtö nup elkilpong, nö kē-ĕyö min tö ò.

⁵Ngaich föngö u min ngam Kūönṙô el ngam tahāklö nö tökētu lökten i kūö tameūyö nö i ngam Mā Tēv: tökētu an angū-ö kūö fālen.

⁶Ṙòkhöre yip kikōnyö aṅ in yip Kūönṙô nö kāḵa e min: kāḵa min angū-ö nö el öp töhet chūök: tölngö töhet an angū-ö.

⁷Sā ngam tökētu kūö tökööl, ngatī ngam tökētu kūö fālen: höng hēngö chöngö nun anū-ö: öp Kūönṙô vamī inlām tökööl tö e, anga-aṅ tölööṙu tö e.

⁸Öp Kūönṙô kamëtö töföngö tökētu tö töng tarīka, anga-aṅ Kūönṙô min tö lumnööṙu töp uk ngam töföngö tökētu, ngam tökētu tö ò.

⁹Ṙòkhöre nup nyā-aṅ tökētu nup tökahūlö nö el chūök kinṙul, ṙòkhöre nup tövī-i nö el törah kunrālö, el törah kinṙūlö inrē, nö lumnööṙö ngam Kūönṙô ngam kamëtö e.

¹⁰Ṙòkhöre nup nyā-aṅ tökētu, tökalūöchö tö tavī-i hēk tönyô, lumnööṙö yip kūön Āròn nö ṙòkhöre, nö holkūöre.

¹¹Ngih ön inrē chöngö nö i inlāmö tökētu, töp töhĕng tak kamë-eti nö i ngam Mā Tēv;

¹²Yĕn kētö e anga-aṅ nö nöinyö, ngaich anga-aṅ min nö kētö e nö holtö töt-aföhlöng pikoh kalūöchö tö tavī-i, töt-aföhlöng vēför inrē sôhò tö tavī-i, pikoh inrē tökalūöchö tö tavī-i, töfaṙëcha atra töhamākö.

¹³Holtö pikoh tī min anga-aṅ öp tö-aföhlöng ròtī nö kētö ngam kahëtöre im inlāmö nö nöinyö.

¹⁴Kökahëngö kahëti min anga-aṅ i nup tökētu nö tö hachônglöng tökētu nö im Mā Tēv; lumnööṙö ngam Kūönṙô min angū-ö ngam kumcheny mahām ngam tökētu inlāmö.

¹⁵Ngaich ngam alaha ngam tökētu tö ò im inlāmö tökētu nö nöinyö, kāḵa min ip sakāmö hē ò nö kēten ò; ötṙāka alaha anga-aṅ tö ò nö söllö peuheū.

¹⁶Yē ngam tökētu pöri nö minkahngö öp töchūöku kinlēḵngô, hēk yĕn tökētu nö kanahanglōn, ngaich kāḵa anga-aṅ min im sakāmö hē ò nö kētö ngam kahëtöre: ngaich im huṙöich nö kāḵa öp chööḵṙen.

¹⁷Yē ngam chööḵṙen ngam alaha pöri ngam tökētu nö ōtren im linūöi sumkam ngaich haṙāpi angū-ö nö i kūö tameūyö.

¹⁸Yĕn kāḵa im linūöi sumkam nup alaha ngam tökētu tö ò im lanāmö tökētu, öt hō-ovö min angū-ö, ötrēhĕn min nö kaheuktu nö in ò ngam kamëtö e: sinòkkūö min angū-ö, ngaich öp tarik kamāḵa e min nö keun tököölre.

¹⁹Ngaich öp alaha tö sūöhtöre nö i tökuvīö nö öt kāḵa min; haṙāpi min angū-ö tö tameūyö. Ngaich öp alaha, öp töhet nö kāḵa min.

²⁰Öp tarik kamāḵ alaha ngam tökētu nö inlāmö, nö lamöö i ngam Tēv, nö töṙònghöichṙen nö kuvīö, anga-aṅ min tarik törökiṙen nö i yip tarik ò.

²¹Yĕn hĕng tak min lamūölkö tökuvīö, nup tökuvīö i tarik, hēk i töṙeūla hēk inup tökuvīö sinòkkūö, nö kāḵ alaha öp tökētu nö inlāmö, öp lamöö im Mā Tēv, rökiṙen min öp tarik anga-aṅ nö i yip tarik ò.

²²Ngaich ngam Mā Tēv nö vë-ekūö Môsös, nö ngö ṙô,

²³Vë-ekūö yip kūön Israĕl, ngö ṙô, Hö-ö yin kāḵ tösangöö kōiny nuā, tösangöö sīṅp hēk tösangöö pököre.

²⁴Tösangöö öp kanahngenre nö kapah inrē, tösangöö öp töteūchö tö holre, i nup la-en tahëng nup anū-ö nö kēkaṙen: uh pöri yī-ö kāḵa e.

²⁵Öp töng kamāḵ ta-öng öp töṙeūla, öp kahëtö tarik nö im Mā Tēv nö lökten i kūö tameūyö, öp tarik kamāḵa e rökiṙen min nö i yip tarik ò.

²⁶Hö-ö yin inrē min kahā-av tö mahām, pòrô nö mahām hayöm hēk töṙeūla, el nup töng patī yīö.

²⁷Öp töng kamāḵ mahām, anga-aṅ min tarik törökiṙen nö i yip tarik ò.

²⁸Ngaich ngam Mā Tēv nö ngö ṙô, nö vë-ekūö Môsöss,

²⁹Vë-ekūö yip kūön Israĕl, ngö ṙô,Ngòh kamëtö tökētu tö aṅ ip inlāmö tökētu tö ò nö i ngam Mā Tēv kēḵ töp kahëtöre min anga-aṅ nö im Mā Tēv aṅ ip tökētu tö ò inlāmö:

³⁰Hakôtö tīre anga-aṅ min nö kētö nup tökētu nö i ngam Mā Tēv nö lökten i kūö tameūyö; öp tösangöö holtö öp elngòh nö kētu min tö ò, hòṅ ngam elngòh nö kuvāyö nö i kūö ngam Mā Tēv nö tökētu nö kuvāyö.

³¹Ngaich öp Kūönṙô min nö föng öp tösangöö nö el öp tahāklö: öp elngòh pöri min lumnööṙö Āròn tö yip kūön ò kikōnyö inrē.

³²Ngaich öp lā hāmö kël min nö kētu tö yīö ip Kūönṙô nö töhatāyö nö tökētu aṅ i nup tökētu tö yīö, tökētu nö inlām.

³³Anga-aṅ öp aṅ i yip kikōnyö kūön Āròn öp kamëtöp mahām öp tökētu inlām, töp tösangöö inrē, tölumnööṙu, min töp lā hāmö kël nö minchööḵö ò.

³⁴Pò ngam elngòh tökuvāyö ngam kël inrē töhatāyö nö kē-ĕ tö chu i yip kūön Israĕl aṅ i nup tökētu tö cha, tökētu inlāmö, ngaich kētu anū-ö nö in Āròn öp Kūönṙô nö minchööḵö cha nö örheūheu nö aṅ in yip kūön Israĕl.

³⁵Angū-ö ön ngih töhachāmö minchööḵö Āròn, töhachāmö minchööḵö yip kikōnyö kūön ò inrē, aṅ i nup tökētu nö i ngam Mā Tēv nö lökten i kūö tameūyö, ip sakāmö hē ò nö kēten u nö mineukṙen ngam Mā Tēv nö el chūök Kūönṙô;

³⁶Nö hachöngten ngam Mā Tēv nö kētu nö in cha tö yip kūön Israĕl, ik sakāmö hē ò nö hacham alaha cha, lumnööṙö cha an nö tö-örheūheu i tumköl chap cha.

³⁷Ngih ön chöngö im töföngö tökētu, im nyā-aṅ tökētu, im tökētu inrē kūö tökööl, im tökētu kūö fālen, ane inrē im inhetlö, im tökētu inrē kūö inlāmö;

³⁸Ngam tinöölô Môsös tö ngam Mā Tēv i kui ap rôngö Sināi, ik sakāmö hē ò nö tölṙô yik kūön Israĕl nö kētö nup kahëtö cha nö el tönyaṅlnyi i Sināi.