Read Car_Nicobarese LA-EN LĒVĪ 9 Bible Online

LA-EN LĒVĪ 9 - Car_Nicobarese bible

LA-EN LĒVĪ 9

¹Ngaich ngö inlahen ik hinëvhöre sakāmö, havëten Āròn ang Môsös tö yik kikōnyö kūön ò inrē, tö yik mākūö Israĕl inrē;

²Ngaich ngö ṙô anga-aṅ tö Āròn, Kēḵ kōiny man kūön nuā hĕng nòng nö tökētu kūö tökööl, hĕng nòng kōiny kūön sīṅp inrē töföngö tökētu, töt vahav alaha, ngaich kēten u i kūö ngam Mā Tēv.

³Ngaich ngö ṙô pömchö, vë-ekūö yip kūön Israĕl, Kētö tökētu yin kūö tökööl hĕng nòng kōiny pököre; hĕng nòng inrē kūön nuā hĕng nòng inrē kūön sīṅp, aṅ el ngam raneh samyeūheu, töt vahav alaha, nö töföngö tökētu;

⁴Hĕng nòng inrē kōiny nuā hĕng nòng inrē kōiny kūön sīṅp tökētu nö inlāmö, tökētu nö i kūö ngam Mā Tēv; nyā-aṅ inrē tökētu tökalūöchö tö tavī-i: tön hameuktöre an min ngam Mā Tēv nö in meh tö taheui.

⁵Ngaich cha-a nö kētö nuk tinöölôre tö Môsös nö i kūö ngam rūkui manūlö: ngaich ṙòkhöre yik ṙôngö tarik nö ṙūötöre nö i kūöngam Mā Tēv nö sökhaka.

⁶Ngaich ngö ṙô ang Môsös, Angū-ö ön ngih hachöngten ngam Mā Tēv nö la-en yīö: ngaich meūkö min tö yīö ngam kanôlò ngam Mā Tēv.

⁷Ngaich ngö ṙô ang Môsös tö Āròn, Ṙūötöre man im tahāklö, kētö ap tökētu kūö tökööl meh, ap töföngö tökētu inrē tö meh, vī inlām tököölre më-eṅ, tö yip tarik inrē: ngaich kētö öp tökētu tö yip tarik, vī inlām tökööl cha inrē; sā inchöngten tö ngam Mā Tēv.

⁸Lökten Āròn nö ṙūötöre nö ik tahāklö, ngaich ṙatnyö likeun ök kun nuā ök tökētu kūö tökööl, ök tī ò anga-aṅ.

⁹Ngaich yik kikōnyö kūön Āròn nö kētö ök mahām nö in ò; ngaich sumlö kuntīre anga-aṅ nö ik mahām ngaich sòhtö e nö i kui nuk sinrōl ök tahāklö ngaich ṙöhtö ök mahām nö i rööntö ök tahāklö:

¹⁰Nuk tösangöö pöri, tö nuk elkilpong, tök tö-angūö aṅ ik alip ök tökētu kūö tökööl, föngö tö ò nö el ök tahāklö; sā tinöölö Môsös tö ngam Mā Tēv.

¹¹Ngaich ök alaha tök uk inrē föngö tö ò nö elkahôyö tök elyöngö.

¹²Ṙatnyö likeun ök töföngö tökētu anga-aṅ inrē; ngaich yik kikōnyö kūön Āròn nö kētök mahām nö in ò, ngaich kichenytö e anga-aṅ nö el ök tahāklö nö vinngö tī.

¹³Ngaich cha-a nö kētö ök töföngö tökētu nö in ò, hĕng milôhò, tök kui inrē; ngaich föngö e anga-aṅ nö el ök tahāklö.

¹⁴Ngaich söich nuk ellōn anga-aṅ tö nuk kalröön, ngaich föngö u nö i kui ök töföngö tökētu nö el ök tahāklö.

¹⁵Ane inrē anga-aṅ kētö ök tökētu tö yik tarik, ngaich kēḵ ök pököre tökētu kūö tökööl yik tarik, ṙatnyö likeun ò ngaich, kēten ò kūö tökööl, sā ngam lā urĕh.

¹⁶Ngaich anga-aṅ inrē nö kētö ngam töföngö tökētu, ngaich kētö e asā ngam chöngö.

¹⁷Ngaich inrē anga-aṅ nö kētö ök nyā-aṅ tökētu, hatööḵlö eltīre tö e, ngaich föngö e nö el ök tahāklö, nö holtö ök töföngö tökētu im peuheū.

¹⁸Ṙatnyö likeun ök kōiny nuā inrē anga-aṅ tök kōiny kūön sīṅp inrē, tökētu nö inlāmö, tö kūö yik tarik; ngaich yik kikōnyö kūön Āròn nö kēḵ tök mahām nö in ò, ngaich kicheny tö e anga-aṅ nö el ök tahāklö nö vinngö tī.

¹⁹Tök tösangöö ngam kōiny kūön nuā inrē; tösangöö ngam kōiny kūön sīṅp inrē ök tösangöö lamrit, nuk hanum ellōn inrē tö nuk elkilpong, tök töangūö ök alip inrē.

²⁰Ngaich föng nuk tösangöö anga-aṅ nö el tahāklö:

²¹Kuvāyö pöri tö Āròn nö i kūön ngam Mā Tēv, nö tökuvāyö tökētu ök elngòh tök lā hāmö takeun inrē; sā tinöölô ò tö Môsös.

²²Ngaich Āròn nö hachônglö këlre nö kū-ö tö nö yik tarik, ngaich hakôlò cha; ngaich yôkti anga-aṅ nö ṙā-ang i kinëtö tökētu kūö töföngö tökētu inrē kūö lanāmö.

²³Ngaich kuhēthötre ang Môsös, Āròn inrē nö el ök rūkui manūlö, ngaich kunyī-inyre, ngaich hakôlò yik tarik: ngaich ngam kanôlò ngam Mā Tēv nö meūkö tö yik tarik nö ṙòkhöre.

²⁴Ngaich ṙā-ang i kūö ngam Mā Tēv ök tameūyö nö meutnyi, ngaich haṙāpngö nuk el ök tahāklö töföngö tökētu tö nup tösangöö inrē; ngaich hē yik tarik nö meūkö e, ayôṙa cha-a ngaich, ngaich fātngökūöre.