Read Car_Nicobarese YERIMIĀ 10 Bible Online

YERIMIĀ 10 - Car_Nicobarese bible

YERIMIĀ 10

¹Ō patī Israel, hang ngam ṙô ngam ṙô, ngam Mā Tēv nö vë-ekūö yīö.

²Ngö ṙô ngam Mā Tēv: Ui haköp talöökö vē pumnāmö tarik, ui rēhĕn ngangngökūö i nup minkahngö el halīöngö tön ngangngökūö yin vē punmāmö tarik nö in u,

³Pò në kui panam vē tarik nö töminyôiny. Kūöltu öp chōn nö el inchōn, vī-i ngaich tö hanīöng töp töhuveū tarik.

⁴Hanyöṅtö ngaich angū-ö tö tarik, tö rupīö humlum inrē; haköpngen e cha-a nö aṅ tī tö mūngöre kīny inrē pòn sōten e nö halöinyköre.

⁵Sā inhôngö Kavöö nup insā tēv cha nö el panô-òṅ kukumör, öt huveū-euṙô anū-ö inrē nö ṙô-òv; hòṅ keūnö anū-ö, pò u nö ötkô nö kiröönngöre. Ui pa-ekūö tö u, tön ötkô nup nö öt löököti, ötrēhĕn nö īnu töhuneū-en nö vī tölöök.

⁶Ō Mā Tēv, öt hĕng tak tösā meh: kiröng man me-eṅ, kiröng ngam minë-eny meh inrē nö im minhôiṅyö.

⁷Chīöp öre töt pa-ekūö tö meh, Ō me-eṅ tö meh, rācha vē pumnāmö tarik? Pò e nö lumnööṙö meh; pòn vē tö-akahaṙa in vē pumnāmö tarik i nup pūlngö cha inrē nö ṙòkhöre öt hĕng tak tösā meh.

⁸Tökulō-ov mikah, hĕnghöre tökulō-ov anū-ö: höng chōn öp inköphöti tö nup insā tēv!

⁹Törömö rupīö tökētu nö ṙā-ang Tarsis, humlum inrē tökētu nö ṙā-ang Ufās vahī tarik töhuveū-en nun anū-ö aṅ kuntī ramöm humlum inrē; tö-ulöö-ö nganāvömat nup inyut u tököinyö hunṙīngö mat inrē: ṙòkhöre anū-ö nö vahī töhuveū-en tarik,

¹⁰Tökô-en pöri nö Tēv ngam Mā Tēv; tö-aṅ an nö Tēv rācha inrē tö-örheūheu nö aṅ. Kayin ngih tumlat i lanīnö ò, ötkô vē pumnāmö tarik inrē nö keun öp tökiröng lanīnö ò.

¹¹Ngö ṙô in tö cha: Nup tēv töt vamī halīöngö tumlat inrē payāyi min nö ṙā-ang im tumlat, ṙā-ang el katòh ngam halīöngö inrē.

¹²Anga-aṅ An vamī tumlat lökten i minhôiṅyö ò, ngam mahaköpngö ngih panam lökten i mikah ò, hanyāknyö minë halīöngö inrē lökten i mikah elmat ò.

¹³Yē ò nö kaknyö ṙôre payāvlöng ngaich nup mak el halīöngö, vīlö minë vang ṙanāchö anga-aṅ inrē nö tafūnlöng nö ṙā-ang i manā-angkūö ngam tumlat. Vīlö hanyālö anga-aṅ tökūö ngam kumṙah, kēnyö ngam kuföt anga-aṅ inrē nö ṙā-ang el chūök chehen ò.

¹⁴Ṙòkhöre tarik nö tökulō-ov mikah öt īnu inrē tö mikah; ṙòkhöre ramöm humlum nö sumrōngikūö min tö insā tēv re; pòn töminyôiny-aṅ minë insā tēv in ò, öt īnu nup tö unhômö.

¹⁵Öt kanôluṙô nup vahīṙen inchīl elmat; ip hē cha min nö sācha, ötkôlò min cha-a.

¹⁶Öt ngatī an anga-aṅ ngam minchööḵö Yāköp, pòn anga-aṅ vamī taṙòkhöre, miyöngö ò inrē Israel aṅ ip amin ò; Mā Tēv yip tömaṙôngö ap minë-eny ò.

¹⁷Hamūl nup inṙung chehen re man el tumlat; Ō me-eṅ mi-iyöng el ngam tökayīngö!

¹⁸Tön ngö ṙô An ngam Mā Tēv: Yĕh meuk chuvilnyö vē aṅ ngam panam chin ing töngamuh, kētö kui cha inrē tö kanihngen, hòṅ cha nö akahaiṙen tö e.

¹⁹Aōla chū-ö, kūö ngih chanökö chu! Pōyen an ngih vah nyaha chu. Ngö ṙô pöri chū-ö, Kô-en ön ngih nö kanihngen, ötkô chin öt keūnö e.

²⁰Piyāyi ök rūkui chu, keuheūtngöre nuk tökuvaha nö latòk; ngaich yip kūön chu nö kiröönngöre nö ṙāngen chu, hö-övö yik nö ngaich; öt hĕng tak mahanyāknyö ngam rūkui chu nö hēk ma-asöklö minë ranangkūö inrē.

²¹Pò yip yōm pököre nö kulō-ov mikah, öt hatöntöre inrē nö im mā Tēv; lökten yik nö ötkôlò, ṙòkhöre inrē nuk pököre cha nö pirāti.

²²Hangihtöre töhāngö ap umuh! Yĕh meuk,yih ap nö ngaich! öp yöng tinṙōlen löklö im lā kapā panam nö vīten nup elpanam Yūtā nö öt aṅhaṅvkūö, chūök am aṅ el inchōn.

²³Akahalōn chin, Ō Mā Tēv, tö talöökö ngòh tarik nö öt in ò, tö e inrē nö öt in ngam tarik ngam kumröönngöre nö hachōḵ vanāngöre.

²⁴Ō Mā Tēv, vëken chu, im tölöök pöri kinlah ṙôken; Un im tanānyö meh, hòṅ meh öt kēten chu im ranö-ö.

²⁵Vōknyö ngam lanīnöre man i kui vē pumnāmö tarik, vē töt akahakūö tö meh, i kui vē tarik inrē vē mahavëkö minë-eny meh; tön ngaich yip nö ngeūṅkten Yāköp; ngeūṅkten ò yip nö ngaich inrē nö tiṙōlngö elyöngö ò.