Read Car_Nicobarese YERIMIĀ 11 Bible Online

YERIMIĀ 11 - Car_Nicobarese bible

YERIMIĀ 11

¹Ngam ṙô yamih nö in Yarimiā nö ṙā-ang im Mā Tēv:

²Hangihtöre tö në ṙô ngih kinlēḵngô, vë-ekūö yip tarik aṅ Yūtā inrē tö yip aṅ Yērusalem.

³Ngö ṙô me-eṅ tö cha, Ngö ṙô An ngam Mā Tēv, ngam Tēv Israel: Tötkôlò öp yēḵ tarik öp töthamang në ṙô ngih kinlēḵngô.

⁴Ngih tinölô yik muvöhngö yīö tö chu hē chu kēnyen cha ṙā-ang ap panam Aikup, ṙā-ang ip vët töhūṙökūö,öichngö ṙô, Hangihtöre tö ṙô chu, la-evṙen inrē tö nup tinölô yīö tö chu nö ṙòkhöre. Hòṅ yīö min tarik chu, Tēv yīö chū-ö min inrē,

⁵Hòṅ chu hateungngö öp töchūöku kinlēkngôre in yip muvöhngö yīö, öich kē-ĕkūö cha tö panam töhëmö aṅkūö tö aṅteh töpachāka inrē, sā e ing töngamuh. Ngaich ngö ṙô chū-ö sapṙô, Ngatī an yēḵ, Mā Tēv.

⁶Ngaich ngö ṙô ngam Mā Tēv tö chu, Ahangkö në ṙô i nup elpanam Yūtā, el nup kanröönö Yērusalem inrē: Hang në ṙô ngih kinlēḵngô la-evṙen inrē tö u.

⁷Pò chu ṙēmen urĕhnyôre in yik muvöhngö yīö hē chu kē-nyen cha ṙā-ang ap panam Aikup, mu-urĕhnyôre öt ṙākôre ing cha, söl in töngamuh sakāmö, öich ngö ṙô, Hang ṙô chu.

⁸Sönngenre cha-a nö öt hang hēk öt asītö elnang re, höng kö lök im tötlöök nganë-eṅ ellōn re pöri cha-a. Lökten chu kētö kui cha nö ṙòkhöre tö në ṙô ngih kinlēḵngô, ngam la-en cha nö tölô tö chu, hö-ö pöri cha-a nö teūngen.

⁹Hēk ngam Mā Tēv nö ngö ṙô tö chu, Inhôngen chöngö ap umuh in yip tarik aṅ Yūtā aṅ Yērusalem inrē.

¹⁰Havantöre yip nö hēk nö i nup kanöölö yik muvöhngö cha, yik tösōḵ nö hang në ṙô chu: ngaich yik nö tömrit tahëng tēv nö lök la-en u; finlalngö ngam kinlēḵngô chu yip nö ngaich aṅ patī Israel aṅ patī Yūtā inrē ngam vahīten chu in yik yöng cha.

¹¹Lökten an ngam Mā Tēv nö ngö ṙô, Yĕh meuk, kētö tötlöök chin i kui cha öp lökngen cha nö öthō nö ötkô-òngvah; pòrô cha-a nö peuinyhökūö chu öt hang ṙô cha chū-ö min.

¹²Ngaich nup elpanam Yūtā tö yip aṅ Yērusalem inrē min nö kiröönngöre nö peuiyhökūö nup tēv nup chūök tī cha nö föng tötahūsa, hö-ö pöri anū-ö nö kô nö hayööken cha hē el nup kanihngen cha.

¹³Pò nup tēv yīö nö vītöre nö sā tūmö nup elpanam yīö, Ō Yūtā; sā tūmö nup kanröönö Yērusalem inrē nup tahāklö tö-asöklöng tö yīö nö sinrōngkūö, tahāklö chūök finöngö tötahūsa nö in Pē-al.

¹⁴Lökten un vëlöng kui vē tarik, hēk un pōitô peuiny hēk un vë-elkui nö ṙënngô cha, tön rö-ö chin min hang yē cha nö havëken chu hē kanihngen cha.

¹⁵Asuh huneū-en ang ngam hanāngen chu nö el patī chu, yē ò nö ngaich nö chōichö la-en? Kô-òren nup töchūöku kinlēkngô alaha inrē tökētu nö lakngö ngam öt inkôlò meh? Kô-òren ṙöng öm kiröngö ṙanāmölōn.

¹⁶Hĕng heuh an mīsi ngam Mā Tēv nö kaheūkö meh, Tö-ayal chōn ôlìv, tövai tökôlò ṙòng; i ṙôktô öp tökiröng chanôchö pöri anga-aṅ min nö föngtökūö e, ngaich ṙāpngö min nup pak e.

¹⁷Ngam Mā Tēv yip tömaṙôngö an, ngam tameūchten meh nö ṙônyö ngih tötlöök nö in meh pò ngam tötlöök tī yip aṅ patī Israel aṅ patī Yūtā inrē nö harunnyö lanīnö chu nö föng tötahūsa nö in Pē-al.

¹⁸Mikahtölōn chu an ngam Mā Tēv tö e, ngaich akahalōn chū-ö; ngaich me-eṅ hameukhömat chu tö nup tötlöök la-en cha.

¹⁹Ngaich pöti chū-ö sā öp tö-ṙēm kūön sīṅp töhachōtu nö ṙatnyu likeun. Öt akahalōn chū-ö tö e tö cha nö lukken tīre nö in chu, nö ngö ṙô, Tā-a töi kūölngö ngòh chōn, holre tö nup ṙòng ò, tā-a töi rökngen ò nö ṙā-ang i panam tö-aṅ, hòṅ öp minë-eny ò nö öt ōtren inköpka.

²⁰Ō Mā Tēv yip tömaṙôngö, Achīö ap rih tö chiplen nö akah fālen, öp kamlah ellōn, el kuilōn inrē, yĕh töich meuk ngam invahal aṅ in meh nö i kui cha, tön in meh tī chin tö ngam chööḵnyöre.

²¹Lökten an ngam Tēv nö ngö ṙô tö inlahen yip tarik aṅ Anatòt, yip chamöh nômö meh, tö ngö ṙô inrē. Uh man vë-eny yanīhih mu-unôich i minë-eny ngam Mā Tēv, tön kapah man min tö tī ih

²²Lökten an ngam Mā Tēv yip tömaṙôngö nö ngö ṙô: Yĕh meuk,sācha tī chin min tö cha, kapah yip min ṙāl tarik tökūö sanët; kapah yip min kūön cha kikōnyö kikānö inrē tökūö inyāichö;

²³Ngaich öt hĕngtittak min tö cha tö ōtre nö ṙā-ai, pò chu min kētö tötlöök i kui yip tarik aṅ Anatòt, samyeūheu cha nö sācha.