Read Car_Nicobarese YERIMIĀ 13 Bible Online

YERIMIĀ 13 - Car_Nicobarese bible

YERIMIĀ 13

¹Ngö ṙô an ngam Mā Tēv tö chu, Kuṙòh havah līnen man kinfan ngaich kafanlö ṙatre tö e, un sumtu angū-ö inrē nö el mak.

²Lökten chu havah kinfan hĕng sā ngam ṙô ngam Mā Tēv, kafanlöṙat re ngaich tö e.

³Yih ngam ṙô ngam Mā Tēv nö in chu ik innët heuh,

⁴Kē ngam kinfan ngam havah meh, ngam mī-iṙat meh, chōholre, chuh i Yūfratīs, hayunngöre e umuh el linrākö ihong.

⁵Kiröönngöre ngaich chū-ö, ngaich hayunngö e nö röhta nö Yūfrātis, sā tinölô chu tö ngam Mā Tēv.

⁶Unôichrit töṙōl sumkam ngam Mā Tēv nö ngö ṙô tö chu, Choholre, kuṙòh chuh i Yūfratis, ngaich kē ap kinfan umuh ap tinölô meh tö chu nö hayūni.

⁷Ngaich chū-ö chuh i Yufratīs ul ngaich, ngaich kē ök kinfan chū-ö ṙā-ang ip chūök e nö hayūni tö chu. Ngaich meuk, öt kôlò ngaich ök kinfan; öt kanôluṙô ngaich angū-ö.

⁸Ngaich yih ngam ṙô ngam Mā Tēv nö in chu:

⁹Ngö ṙô an ngam Mā Tēv: Ngatī tī chin min öthakôlò ngam inkeūlen Yūtā ngam tökiröng inrē inkeūlen Yērusalem.

¹⁰Vē tötlöök tarik tösōḵ nö hang në ṙô chu, töngëḵnö tömrit kuilōnre ngaich kiröönngöre nö tömrit nup tahëng tēv ngaich vë-ekūö u, sā ngih kinfan min, ngih töng öt kanôluṙô.

¹¹Pòn sā ngam kinfan nö köp nö i ṙat tarik, ngatī chū-ö vīten yip aṅ patī Israel nö ṙòkhöre tö yip aṅ patī Israel nö ṙòkhöre töyip aṅ patī Yūtā inrē nö ṙòkhöre nö köp nö in chu, ṙô ngam Mā Tēv, hòṅ cha öre nö tarik chu minë-eny, nöinyö,ineū-eu inrē, hö-ö pöri cha-a nö hō nö hang.

¹²Vë-ekūö cha man min tö ngih ṙô; Ngö ṙô An ngam Mā Tēv, ngam Tēv Israel, kö hatööklöng nup min neū-euṅ tö vāin. Ngaich ngö ṙô min cha-a tö meh, Kô-òngrit öi ihö öt akahakūö tö neū-euṅ nö kö hatööḵlöng tö vāin?

¹³Ngaich ngö ṙô min me-eṅ tö cha, Ngö ṙô An ngam Mā Tēv: Yĕh meuk, hatööḵngen yip aṅ ngam panam chin min tö hinyōyö yip rācha amūchhak nö el kantēra Tāvit, yip kūönṙô, yip pròfĕt, ṙòkhöre inrē yip aṅ Yērusalem.

¹⁴Ngaich chū-ö min pinyānyen cha nö lā-al höö, kikōnyö yöng tö kikōnyö kūön inrē, ṙô ngam Mā Tēv. Öt miṙe-ĕvlōn chin min hēk öt ṙā-al hēk öt aṙē-ĕlōn, töp lökten chu öt piyāingen cha.

¹⁵Kētö elnang re hang inrē: un hakeūṙöre, tön ṙô-òvö an ngam Mā Tēv nö ngaich.

¹⁶Eū ngam Mā Tēv ngam Tēv yīö urēhĕkūö ò nö kumtö sinngūlö, urēhĕkūö yīö kavē-ĕre i chinṙivtö minë rôngö, hē yīö inrē meūkkö hanātö ngaich havāngtö e anga-aṅ nö im chinṙīvö, vīten e inrē nö tökūfëi sinngūlö.

¹⁷Yē meh pöri min öt hòṅ hang, ngaich ngih nômö chu min nö ulāikôre nö peuny inkeūlen meh; kalē-ĕṙô në mat chu min nö peuiny nö kāti mak mat, pò nup pököre ngam Mā Tēv nö kē-ĕyö nö hakövö.

¹⁸Ngö ṙô tö ngam ṙācha tö ngam rāni yöng nyīö inrē: Kē lataṙeū anūichöre, tön ṙūötö chūökre an ngam tövai sapīöv meh nö ṙā-ang i kui meh.

¹⁹Öpikūö nup elpanam Nēkep nö öt hĕng tak lamöpnyö kūö, keuheūtlöre Yūtā nö kē-ĕyö nö ahöti, ṙòkngöre nö kē-ĕyö nö ahöti.

²⁰Môklökūöre ngëicha inrē yip yamih nö löktö lā kapā. Isuh nup pököre tökētu nö in meh, nup tövai pököre meh?

²¹Sītih ṙô öm min yē cha nö ūichhak nö yöngṙen nö i kui meh, cha-a yip töhaköptu tö meh nö hol meh? Röh öm min lökö tö saneônglöre chanökö, sā öp kikānö i kinyô-ò?

²²Ngaich yē meh, ngö ṙô ellōn re, Kūöyòh ön në nö teunghö kui chu? Kūö ṙôkö öp öt lanöökö meh öp mamëchlö ngam kinhôi meh, ngaich kihngen me-eṅ tö chanökhuṙen.

²³Kô ang ngòh aṅ Iti-ōpia nö haṙīngö uk alaha re hēk ngòh Liōpāt nö harīngö pintōhore? Ngaich kô-öre më-eṅ inrē löökö la-en öm tö-u-lòhten la-evṙen tö tötlöök.

²⁴Pirātngen meh chin min sā uk nëlö töheuingö tökūö kuföt nö ṙā-ang el ngam tö-nyalnyi kuyāyö.

²⁵Ngatī man min, ngam kalah ṙôken chu minchööḵö meh, ṙô ngam Mā Tēv, pòmeh vaichngen chu ngaich hayönglenre i minyôiny-aṅ.

²⁶Hakôtenre chin chū-ö min mëchlö kinhôi meh nö i kūö meh ngaich meūkö min ap sumrōngkūö meh.

²⁷Ngaich chin meuk nup sin-òkkūö in meh, insĕha inrē, ngam öt lanöökö meh i mi-inyihköre kikānö, i kui rung el töngāṅ. Ō Yērusalem, öt kôlò man! Irô-òten öng min urēhĕkūö meh öm ahetlöngö?