Read Car_Nicobarese YERIMIĀ 14 Bible Online

YERIMIĀ 14 - Car_Nicobarese bible

YERIMIĀ 14

¹Ngam ṙô ngam Mā Tēv yamih nö in Yarimiā inlahen ök nganasngö:

²Haṙivlōn Yūtā nuk inkūp e inrē nö salīnköti; harāmöre yip tarik nö el tumlat, kööilöṙô Yērusalem inrē nö peuiny.

³Tīnngö tarik re nö fòk mak yip mā tö-akaha; sölta cha-a ngaich nö i nup inchūökngö mak, ötkôtökūö cha-a tö mak havan cha-a ngaich nöng öt aṅhav chūök kum; sirōngkūö cha-a kalūöchöre el kui inrē ngaich kahultö kui re.

⁴Pò ngam tumlat ngam töng ngangngökūö, kūö törö-ö kumṙah im panam, sirōngkūö yip tameūch kahulkuire cha-a.

⁵Uroh nup Hain el kahôyö nö ṙāngö tufömnyöre kinyôḵnyi kūön re pòn öt kiyôpu umuh.

⁶Sökhak nup köttö aṅ el inchōn nö i kui nup rung töt aṅhavkui, hangòskö kuföt anū-ö sā am aṅ el inchōn; öt meuk nup mat u kūö törö-ö rōi chōn.

⁷Pòrô nup öt lanöökö ih nö hameuktö chanôchö in ih, Ō Mā Tēv, tī-iv yĕh tökūö ngam mine-eny meh; pòkūö nup hineūlrit nö pōyen, köölö fālen in ngaich in meh.

⁸Ō me-eṅ maheūṅkkö Israel, mahayööken el hē kanihngen, kūöyòh öm hòṅ sā aṅ tahëng im panam, sā töng kumrööna öp kamānngöre nö sökngöre tökūö hatööm?

⁹Kūöyòh öm ngatī sā öp tarik tökalūöchöre elkui, sā öp tarik tökalēḵ tötkô nö hayööken? Ō Mā Tēv, sön me-eṅ elṙôngö ih, ngaich īhö minë-eny meh öi havëka; uh in yĕh ṙā-ai.

¹⁰Ngö ṙô an ngam Mā Tēv tö inlahen vē tarik: Hāngen yin nö ngatī invötö, hö-ö yin nö ma-iṅh röönre; lökten ngam Mā Tēv nö öt hō-en cha, ngaich ön töngamuh nö köpölōn tö ötlanöökö cha ngaich sācha tī inrē tö tökööl cha.

¹¹Ngö ṙô an ngam Mā Tēv tö chu: Un havëka lanööken vē tarik.

¹²Pòrô cha-a nö ahik, öt hòṅ hangrô cha chū-ö nö peuiny, pòrô cha-a inrē nö kētö töföngö tökētu, sāiny inrē tökētu hö-ö chū-ö min hō-en u; ahetngen cha pöri min nö pôḵ sanët, pôḵ inyāichö, pôḵ invah tölëlngökūö inrē.

¹³Ngö ṙô chū-ö ngaich: Aōla, Mā Tēv, yĕh meuk, ngö ṙô yip pròfĕt tö cha, Hö-ö yin min meuk sanët, öt rēhĕn inyāichö nö in yīö, kē-ĕkūö yīö pöri min chū-ö tö tökô-en lanāmö i ngih chūökö.

¹⁴Ngaich ngö ṙô ngam Mā Tēv tö chu: Minyôiy-aṅ ṙô yip pròfĕt nö i minë-eny chu; hö-ö chin tīnten cha, ötrēhĕn tölṙô cha hēk vë-ekūö cha. Vë-eny maheuṅkre; yip nö in yīö tö miynôiny-aṅ; chinông alaha töt kanôluṙô, inchīlö inrē aṅ el kuilōn cha.

¹⁵Lökten ngam Mā Tēv nö ṙô tö inlahen yip pròfĕt yip vamë-eny nö i minë-eny chu pòrô chū-ö öt tīnngen cha, yip tö ngö ṙô inrē, Öthō sanët, inyāichö inrē nö yih min nö ing panam: keuheūtngöre vah yip cha-a min pròfĕt tökūö sanët, inyāichö inrē.

¹⁶Ngaich yip tarik chūökṙô cha nö vë-eny min nö kavāliyö nö el kanröönö Yērusalem, pôḵ inyāichö sanët inrē, öt hĕngtak amulngö cha-a-cha-a, pīhö cha, kūön cha kikōnyö, kūön cha kikānö inrē. Pò chu min vōknyö ngam öt lanöökö cha nö i kui cha.

¹⁷Ngö ṙô man in cha min tö ngih ṙô: Hökten në mat chu nö kāti makmat, hatööm sakāmö inrē, un ṙākenre inrē anū-ö, pò rēlö kūön yip tarik chu kikānö nö nyahav tö vah tökiröng, nö kūö tökalēḵ tī famël.

¹⁸Yē chu kunyī-inyre el kahôiṙen, yĕn meuk, ip töfëli tö sanët! Yē chu inrē kuhēthötre im elpanam, yĕh meuk, invah inyāichö! Pò yip pròfĕt tö yip kūönṙô nö kēken innyihkö chehen nö im panam, ngaich rö-ö nö akahalōn.

¹⁹Keuheūtyöre öng Yūtā nö sō-ov tö meh? Sa-òkkūö lōn öm tö Sīyôn? Kūöyòh öm hachökö ih töp lökngen ih ötlanë-enṙen? Ngëichkö lanāmö in, öt yih pöri tölöök; ṙētak linë-en, meuk pöri nöng pinhë-eṅkūö.

²⁰Ō Mā Tēv akahngen öt lanöököre in, tö ötlanöökö yik yöng ih inrē, pò ih ngaich köölö fālen in meh.

²¹Uh in rööniyö, lökten im minë-eny meh; un miṙē-ĕyö ngam tökôlò kantēra meh; köpölōn ane inrē un piyāyi ngam kinlēḵngô nö in ih.

²²Tökô-òv hòng umuh i nup tötkò-en tēv pumnāmö tarik nö kētö kumṙah? Hēk kô ön minë halīöngö nö kētö tö-aṙöka kumṙah? Ō Mā Tēv Tēv ih, röh öm me-eṅ anga-aṅ? In meh in öi meūka, pò në nö ṙòkhöre nö tī meh.