Read Car_Nicobarese YERIMIĀ 15 Bible Online

YERIMIĀ 15 - Car_Nicobarese bible

YERIMIĀ 15

¹Ngaich ngö ṙô ngam Mā Tēv tö chu Pòrô Môsös Samu-ĕl inrē nö sökhak nö i kūö chu, sönngenre öp ellōn chu nö öt hanvööten nö lā i vē tarik. Tinngen cha nö ṙā-ang i kūö chu, hökngen cha nö kiröönngöre!

²Ngaich yē cha nö hatönö meh, Chuh yih öi min? Ngö ṙô min me-eṅ tö cha, Ngö ṙô an ngam Mā Tēv: Cha-a yip pôḵ tölëlngökūö invah, im tölëlngökūö invah, acha-a yip lamöö kūö sanët, löö im sanët; acha-a yip lamöö ip inyāichö, löö ip inyāichö acha-a inrē yip lamöö i inkövö, löö i inkövö.

³Fën mihëṅṙö nup min tī chu i kui cha inlëlngö, ṙô ngam Mā Tēv: ngam sanët famëlhanga minë am tameuchhanga minë chehechōn el kuföt tö minë töṙeūla el tumlat kama-anga famëlhanga inrē.

⁴Vīten cha min nö pinhë-eṅkūö i në pūlngö ngih tumlat kūö tī Manasē ök kikōnyö kūön Hēsikia, rācha aṅ Yūtā, nö i Yērusalem.

⁵Ō Yērusalem, chīap min tö-aṙē-ĕlōn tö meh hēk chiāp min pameuiny miṙivlōnre tö meh? Chiāp min kamāntöre nö hatönkö lanööken meh?

⁶Sō-en chu man ngaich ṙô ngam Mā Tēv, höng heūlökūöre mana; hateutnyö këlre ngaich chū-ö lā-al meh öich fëlngen meh; chei chin ṙākö tanānyöre.

⁷Kichāngö cha chin öich aṅtī tö lanòk kinchang i kūö minë inkūp ngam panam; miṙivngölōn cha chin, fëlngö yik tarik re chin; hö-ö cha-a nö havöötöre nö ṙā-ang i nup talöököre.

⁸Ṙūölöng ṙôngö yip tafiösi cha tö chu nö pōyen tö kuyāyö ngam mai; kētö lā-al yip yöngnyīö chin yöng yip ṙāl tarik tö famëlhanga i ra-nònglö ngam tavūöi; vīten miṙivlōn chin pinhë-eṅkūö inrē nöng löö nö fukkui cha.

⁹Anga-aṅ öp tösat tak kūön ngaich nö lëvngö; ngaich an nö kiratngö vahre; meutti ök tavūöi ò nö ngaich hē e nö ṙòngmö sakāmö; sumrōngikūö ana miṙē-ĕi inrē. Ngaich yip chööḵ cha min nö kētu tö chu nö im sanët i kūö yip lā-al cha, ṙô ngam Mā Tēv.

¹⁰Aōla chū-ö me-eṅ yöng chu kikānö tö meh kayôḵyen chu öich tarik kanihngen linā-alkūö inrē ing panam nö ṙòkhöre! Hö-ö chin kēngö töhaṙūöngö, öt rēhĕn öich haṙūöng, sön cha-a nö ṙòkhöre nö rūtngövah chu.

¹¹Lökten hökngen e yēḵ, Ō Mā Tēv, yē chu rö-ö vë-elkui cha in meh öich hōten cha nö löök, yē chu rö-ö mileūchô havë-a in meh öich ṙënngô ngam tökunyaha elmat i hē kanihngen; ane inrē i hē kanihten ellōn!

¹²Hĕng tak hòng tökô nö liköl vët, vët ṙameū-eung lā lòhngö, mās inrē?

¹³Kētu nuk kanôlò meh töpōi ṙāi chehen meh inrē nö ngaich ngen, öt ṙāyu, tökūö nuk tökööl yīö keuheūtngöre chūök im panam yīö.

¹⁴Vīten yīö chin min lök la-en yip lā-al yīö ip panam tötmikahkūö yīö, pò öp tameūyö lanīnö nö hulökūö öp mahaṙāpngen yīö min nöng örheūheu.

¹⁵Ō Mā Tēv akahalōn man; köpölōn tö chu chöhken chu inrē, havāhalvah chu inrē in yip tötmahakôlò chu. Ip manöiyö meh uich kē-ĕyö; akahalōn tö chu keun minṙēngö tö pòkūö meh.

¹⁶Kôti nup ṙô meh nö ngaich, ngaich chin nyā-aṅ u, ngaich nup ṙô meh nö in chu nö ṙanāmölōn kumchik ellōn chu inrē; pò chu tö kaheūkö tö ngam minë-eny meh. Ō Mā Tēv, Tēv yip tömaṙôngö.

¹⁷Öt ūichhak chin elṙôngö yip mumnôn, öt rēhĕn chin ṙāmölōn; hĕng töṙah chin ūichhak, pò ngam kël meh nö I kui chu, pò meh hatööḵngen chu tö inngëṅ tachōich.

¹⁸Kūöyòh öng ngam chanökö chu nö öt ṙātöre, ngam nyaha chu inrē nö öt hanpēten, sō nö hapētö? Hòṅ sā tömichīl öm kun töhëm mak in chu, sā nup mak samökngöre?

¹⁹Lökten an ngam Mā Tēv nö ngö ṙô: Yē meh havan havanten meh chū-ö min, ngaich sökhak min me-eṅ i kūö chu. Yē meh ṙô-òv tö tölöök, un öp töt kanôluṙô, ngaich min me-eṅ sā elvāng chu. Havöötöre min cha-a nö in meh, hö-ö pöri min me-eṅ havöötöre in cha.

²⁰Ngaich chū-ö min vīten meh in vē tarik öm mās kinlōngö chūök kumyung; lā-al meh min cha-a nö kiyung, hö-ö pöri min cha-a nö kô tö meh, pò chu in meh öich hayööken meh, ṙānyen meh inrē, ṙô ngam Mā Tēv

²¹Ṙānyen meh chin ṙā-ang eltī öp tötlöök ṙānyen meh inrē ṙā-ang ip kinṙāpö meh tö ngam töt milēḵ.