Read Car_Nicobarese YERIMIĀ 16 Bible Online

YERIMIĀ 16 - Car_Nicobarese bible

YERIMIĀ 16

¹Yih ngam ṙô ngam Mā Tēv nö in chu:

²Uh man min kē pīhöre, uh rēhĕn min öm kūönu tö kikōnyö hēk kikānö inrē i ngih chūökö.

³Tön ngö ṙô An ngam Mā Tēv tö yip nyīö kikōnyö nyīö kikānö inrē yip töfötnyu nö i ngih chūökö, tö yip yöngnyīö inrē kamyôḵnyen cha tö yip kikōnyö yöng inrē yip mahakūönten cha nö i ngih panam:

⁴Kapah yip min tökūö nup invah tökapahukūö. Hö-ö yip min nö harāmö, öt rēhĕn min cha-a nö lāpiyö; höng sā sôḵ nuā yip min nö i kui ngam tumlat. Kapah yip min kūö sanët inyāichö inrē, ngaich nup tökapah alaha cha min nö nyā-aṅkūö nup chehechōn el kuföt tö nup töṙeūla inrē el tumlat.

⁵Tön ngö ṙô ngam Mā Tēv: Un kuhēthötre el öp patī miṙivlōn hēk un kiröönngöre i inrāmöre, hēk un haṙivhen cha; tön kēngö ap lanāmöre chin ṙā-ang in vē tarik, ṙô ngam Mā Tēv, ap hanāngenlōn chu tököp miṙēlōn inrē.

⁶Hĕnghöre tökiröng tökūönö inrē min nö kapah nö i ngih panam; öt lāpiyö yip min, öt hĕng tak min inrē maharāmö cha hēk kamötnyö alahare hēk kumhāk ngöre tö pòkūö cha.

⁷Öt hĕng tak min famòk rôti nyā-aṅ yip töhaṙīvölōn, nö haṙāmlōn ò kūö yik tökapah; öt rēhĕn min nö hĕng tak kamë-eṅkūö ò tö kulah inṙāmkölōn nö òk tökūö ök yöng ò kikōnyö hēk kūö ök yöng ò kikānö.

⁸Uh yin chuh el patī chūök tökiröng nyina-aṅ öi ūichhak hol cha, öi nyā òk inrē.

⁹Tön ngö ṙô an ngam Mā Tēv yip tömarôngö, ngam Tēv Israel. Yĕh meuk, vīten ṙô nīölö chin min ṙô ṙānāmölōn inrē, ṙô öp kikōnyö töhapīhö, ṙô öp kikānö tö hapīhö inrē, nö ṙāngenre i ngih chūökö i kūö yīö i sakāmö yīö inrē.

¹⁰Ngaich yē meh vë-enynang vē tarik tö në ṙô, ngaich ngö ṙô cha-a tö meh, Kūöyòh öng ngam Mā Tēv nö ṙônyö ngih tökiröng tötlöök nö in ih? Asuh ap öt lanöökö ih? Asuh ap tökööl kahëken ih im Mā Tēv ngam Tēv ih?

¹¹Ngö ṙô min me-eṅ tö cha: Pò yik yöng yīö nö ṙāngen chu, ṙô ngam Mā Tēv, ngaich nö kiröönngöre nö tömrit tahëng tēv, lök la-en u, vë-ekūö u inrē, ngaich nö ṙāngen chu öt haköp ngam chöngö chu inrē,

¹²Pò yīö inrē höichngen tö yik yöng re, yĕh meuk, höng kö tömrit lōnre yin töm töthanvööken kūö tötlöök, sō öi hang ṙô chu;

¹³Lökten chin kavalngen yīö ṙā-ang i ngih panam öi ip panam ap töt rēhĕn nö mikahkūö yīö öt rēhĕn nö mikahkūö yik yöng yīö, ngaich in e min yī-ö lök la-en tahëng tēv sakāmö hatööm inrē, pò chu min öt hameukhötmat yīö tö hanāngen.

¹⁴Lökten, yĕh meuk, yih nup sakāmö, ṙô ngam Mā Tēv, hē e min nö öt ngöhören nö ṙô nö ngöh, Sā ngam Mā Tēv nö tö-aṅ ngam kamënyö yip tarik Israel nö ṙā-ang Aikup,

¹⁵Ngö pöri, Sā ngam Mā Tēv nö tö-aṅ ngam kamënyö yip tarik aṅ Israel nö ṙā-ang ap panam lā kapā nö ṙā-ang i nup panam chūök cha nö ahōṙi tö ò. Pò chu min hēk kēten cha ip panam cha takô öp kahëtö chu in yik yöng cha.

¹⁶Yĕh meuk, maṙôngö tahīnti chin tö kamëḵ kā, ṙô ngam Mā Tēv, ngaich cha-a min nö kē-ĕ u; ngaich unôich chū-ö maṙôngö tahīntö tö mahacheūḵ, ngaich hacheūḵeu cha, keuheūtkui rôngö rung inrē, el kinluhu ihong inrē.

¹⁷Pò në mat chu nö i kui nup talöökö cha; hö-ö yin nö nyatngö tö chu, öt rēhĕn öp öt lanöökö cha nö hanyāti tö në mat chu.

¹⁸Ngaich chū-ö min nëtö ṙënngen tī tö öt lanöökö cha tökööl cha inrē, pò cha nö hachōichngö ngih panam chu tö alaha kupah nup sin-òkkūö insā tēv cha, ngaich nö hatööḵlö ngih amin chu tö ngam sin-òkkūö tö cha.

¹⁹Ō Mā Tēv, kumlēḵ chu chūök chu inrē töngëḵ, innyatlö chu ip sakāmö kanihngen, löö in meh yin nö yih vē pumnāmö tarik löktökūö i nup manā-angkūö ngih tumlat ngaich ngö ṙô: Öt amīnu yik yöng ih höng minyôiny-aṅ, chehen töt kanôluṙô nö töt taneunglen.

²⁰Kô ang ngòh tarik nö vī tēvre? Hö-ö nup tö ngatī nö tēv!

²¹Lökten yĕh meuk, vīten cha chin nö akahalōn, höng hĕngtöre heuh öich vīten cha nö akahalōn tö kumlēḵ chöngö chu kumlēḵ chu inrē, ngaich akahalōn min cha-a tö ngam minë-eny chu nö ngam Mā Tēv.