Read Car_Nicobarese YERIMIĀ 17 Bible Online

YERIMIĀ 17 - Car_Nicobarese bible

YERIMIĀ 17

¹Kūichi öp tökööl Yūta tö kanūich tö haṙah tö vët; nö kūö tö taimön ka-iphötvö ap nö ip tömitāk ihong ellōn cha, i kui sinrōl nup tahāklö cha inrē,

²Köpölōn yip kūön cha tö nup tahāklö cha nup Asērim cha inrē, nö kö i nup tö-ayālö rōi chōn i kui nup tömarô-òl kui rung inrē,

³I kui rôngö el öp töngāṅ panam. Nup kanôlò meh töpōi ṙāi chehen meh inrē kē-ĕyö min tö chu nö nāichngen ṙāi öp tökööl meh keuheūtngöre chūök im panam meh.

⁴Ṙā-angtīre man min tö ngam amin meh ngam kahëtö chu in meh, ngaich vīten meh chū-ö min lök la-en yip tökunyaha elmat tö meh ip panam töt mikah kūö meh, pòn i lanīnö chu öp tameūyö nö tōttukūö öp töhū min nö örheūheu.

⁵Ngö ṙô An ngam Mā Tēv, Tötkôlò ap tarik mahayönglenre nö I tarik ngaich vī alaha nö këlre, öp tö ellōnu töp mahavööngökūöre nö ṙā-ang im Mā Tēv.

⁶Höng sā kun chōn ap el tönyalnyi kuyāyö öt maheūṅku min tö tökôlò samīöp. Ngaich anga-aṅ min nö iyöng i nup töngesngö chūök ngam el inchōn tönyalnyi ip töt aṅhavkūö panam sāl.

⁷Tökôlò ap tarik mahayönglenre nö im Mā Tēv, öp mī-im Mā Tēv inyönglen.

⁸Sā chōn ap anga-aṅ töteūichtu nö i kui mak öp mahameuttö nup ṙĕhre nö ip kun töhëm mak, ngaich öt pa-ekūö hē öp ṙanāchö nö yih, pò nup rōi ò nö ngöhöre inyālö, ngaich hö-ö anga-aṅ nö pinṙūtulōn ip samyeūheu nyanôngö, pò ò nö öt ṙākenre nö ṙôngu.

⁹Tulöng michīl an ngam ellōn tö taṙòkhöre öt kôlò takô inrē; chiāp tökô nö akaha elmat tö e?

¹⁰Chöh kuilōn chin chū-ö Mā Tēv kalah ngam fanöinylö inrē, öich kö kē-ĕkūö tarik sā nup talöökö ò. Sā öp ṙòng nup vahīṙen ò.

¹¹Sā ngam Patrich mahamūl kūönre tö nup töt yahum ò ngatī anga-aṅ ngam kamëḵ kanôlòre rö-ö pöri nö inlānen ò; i tūmö nup sākāmö ò anū-ö min nö ṙāngen ò, ip manāngen ò anga-aṅ min inrē nö tökulō-ov.

¹²Öp kantēra rācha töṙātu nö lātulöng löktökūö ik ranehlö nö chūök ngam töhet chūök hī.

¹³Ō Mā Tēv, maheūṅkkö Israel, ṙòkhöre yip min ṙamāngen meh nö sumrōngikūö; cha-a yip mahavööngökūöre tö meh nö kūichiyö min nö im tumlat, pò cha nö ṙāngö ngam Mā Tēv ngam panöklö tö-aṅ mak.

¹⁴Le-en chu, Ō Mā Tēv ngaich lööken min chū-ö, hayööken chu, ngaich hayöökaṙen min chū-ö, pò meh me-eṅ ineū-euṅ chu.

¹⁵Yĕh meuk, ngö ṙô yip tö chu, Isuh ap ṙô ngam Mā Tēv? Höktö yīhih e!

¹⁶Rö-ö chin līpö meh tīnngö tötlöök, öt rēhĕn chin hōḵtö öp sakāmö öt kanôlò, akahalōn man; tö nup lamöknyö elvāng chu nö ngaich nö i kūö meh.

¹⁷Uh man yēḵ pinhë-eṅkūö chu; me-eṅ man in-nyatlö chu ip sakāmö tötlöök.

¹⁸Hökngen cha nö sumrōngikūö yip töt mahakôlò chu, uh pöri chū-ö yēḵ sumrōngikūö; hökngen cha nö ngònglökūö; kētö kui cha töp sakāmö tötlöök; aṅtī tö tö nët tinṙōlngö öm fëlngen cha!

¹⁹Ngö ṙô an ngam Mā Tēv tö chu: Kuṙòh söklöre ip Inkūp Penyamin, öp lökhöt yip rācha Yūtā nö kuhēthötre löknyö cha inrē nö kunyi-inyre, i nup Inkūp Yērusalem inrē nö ṙòkhöre,

²⁰Ngö ṙô: Hang ngam ṙô ngam Mā Tēv, yī-ö rācha Yūtā, ṙòkhöre inrē Yūtā, ṙòkhöre inrē aṅ Yērusalem yip kumhēthötre nö lökhöt i në inkūp.

²¹Ngö ṙô an ngam Mā Tēv: Haṙēmngenre chöḵönytö nup nômö yīö, un keun kūmö hē el anôilö sakāmö hēk un kēhĕt e nö lökhöt nup inkūp Yērusalem.

²²Un keun kūmö inrē ṙā-ang patī yīö hē el anôilö hēk un la-evṙen tö yô-òv, haköpkö ngam sakāmö anôilö pöri nö töhet, sā tinölô yik yöng yīö tö chu.

²³Sönngenre cha-a nö öt hang hēk öt asītö elnangre, hakeh likeunre pöri cha-a, pòn sō nö hang sō inrē nö kē inköptöre.

²⁴Yē yīö pöri hangṙô chu, ṙô ngam Mā Tēv, öi öt kūmu lökhöt minë inkūp ngih elpanam, hē el anôilö sakāmö, haköp ngam sakāmö anôilö pöri nö töhet ui la-evṙen hē e inrē,

²⁵Ngaich möl nö kūhēthötre min nö lökhöt minë inkūp ngih elpanam yip rācha amūichhak nö el kantēra Tāvit, el inröl i uk kōra inrē, cha-a tö yip kūön rācha inrē in cha, yip tarik Yūtā tö yip aṅ Yērusalem inrē; ngaich ngih elpanam min nö örheūheu nö aṅ-havkūö.

²⁶Ngaich yip tarik min nö yih löktökūö i nup elpanam Yūtā i nup chūökö inrē mahavīlen Yērusalem, löktökūö panam Penyamin, löktökūö Sëfēlah, löktökūö rung panam, löktökūö Nēkep inrē, kumtö töföngö tökētu, inṙöömngen tökētu inrē, sāiny tökētu tötahūsa inrē kumtö tökētu nöinyö inrē nö i patī ngam Mā Tēv.

²⁷Yē yīö pöri öt hang ṙô chu, öi haköp ngam anôilö sakāmö nö töhet ui keun kūmö inrē öt kuhēthötre lökhöt minë inkūp Yērusalem hē el anôilö nup inkūp e, ngaich angū-ö min nö ṙāpngö kūö tö nup patī rācha i Yērusalem, ngaich hö-ö min nö hanyāngikūö.