Read Car_Nicobarese YERIMIĀ 18 Bible Online

YERIMIĀ 18 - Car_Nicobarese bible

YERIMIĀ 18

¹Ngam ṙô yamih nö in Yarīmiā nö ṙā-ang im Mā Tēv:

²Chōholre, kuṙòh kirööngöre chuh patī öp vamī tanīöyö in e chin min ahangtö elnang meh tö në ṙô chu.

³Lökten chu kiröönngöre chu patī ap vamī tönīöyö, ngaich umuh anga-aṅ nö la-evṙen ik tö chuvīlö kalröön inröl.

⁴Ngaich ök tanīöyö vahī ò tilin nö pala-aiṙen nö eltī ök vamī tanīöyö, ngaich vītit e anga-aṅ nö tahëng nö tanīöyö, sā inlahen ök tölöök lōn ngam vamī tanīöyö nö vī e.

⁵Ngaich yih ngam ṙô ngam Mā Tēv nö in chu:

⁶Ō patī Israel, ötkô öichu sā tī ngòh vamī tanīöyö öich in yīö? Ṙô ngam Mā Tēv. Yĕh meuk, sā ngam tilin nö eltī ngam vamī tanīöyö, ngatī yī-ö eltī chu, Ō patī Israel.

⁷Yē chu ṙô-òv i pumnāmö tarik hēk pūlngö, tö chu min öich teuklö e, likölngö e inrē ngaich piyāingö e,

⁸Ngaich yē öp pumnāmö tarik, öp chūök ṙô chu tö e, nö havööngökūöre tö ngam tötlöök, ngaich chū-ö ṙā-ang lōnre tö ngam tötlöök ngam lōn chu tī chu in e.

⁹Ngaich yē chu vë-eny inlahen öp pumnāmö tarik hēk ip pūlngö tövīlöng tö chu min töteūichtu inrē,

¹⁰Ngaich yē e nö la-evṙen tö tötlöök nö i kūö chu, nö öt hangṙô chu, ngaich chū-ö min ṙālö öp tölöök lōn chu tī chu in e.

¹¹Lökten töngamuh, ṙô-òv in yip tarik Yūta yip aṅ Yērusalem inrē: Ngö ṙô An ngam Mā Tēv, Yĕh meuk, vī tötlöök chin lā-al yīö ane inrē halēnlö tī re lā-al yīö. Kö havan yin, ṙā-ang i tötlöök talöököre, halööktit nup talöökö yīö nup la-en yīö inrē.

¹²Ngö ṙô pöri cha-a, Chök alaha an angū-ö! Hòṅ tömrit nup halēnlöre in īhö, ngaich kö la-evṙen min sā öp töt hanvööken kūö tötlöök ellōn re.

¹³Lökten an ngam Mā Tēv nö ngö ṙô: Hatön i pumnāmö tarik, chīö ap hamang tö ngatī? La-evṙen an nö ngaich tö pinhë-eṅkūö ngam rēlö Israel.

¹⁴Ṙā-ang nup linrākö Sirīön nup rung tökënngöre tacham Lēpanön? Höng nyô nup ṙung mak nö hëm, ngam tö-uföv töhëm mak?

¹⁵Ngaich pöri vē tarik chu nö vaichngö tö chu, föng tötahūsa yin nö i tötkô-en tēv; kavē-ĕre yin nö el talöököre, i minë hötṙeh talöökö, lök i kanānngö yin nö ngaich inrē, öt im tökiröng talöökö,

¹⁶Vīngen ngam panam re nö pinhë-eṅkūö, nö töng sīhiyö nö örheūheu. Ṙòkhöre yip chamöḵöng e nö pa-ekūö ngaich kichinykūöre.

¹⁷Sātī ngam kuföt chuhöt chin min pirātngen cha i kūö yip lā-al cha. Hameuk tö ukre chin in cha, öt ngam kūö chu, ip sakāmö öt kanôlò cha.

¹⁸Ngaich ngö ṙô cha-a, Tā-a, töi vī lökngö vah Yarimiā, hòṅ ngam chöngö nö öt kēngöre nö ip kūönṙô, un rēhĕn ngam inlēnö nö ṙā-ang in yik tö-akaha un rēhĕn ngamṙô nö ṙā-ang ip pròfĕt. Tā-a, töi fëlan aṅtī tö litāk, uh in tā-a inrē hang nup ṙô ò.

¹⁹Ō Mā Tēv, hangṙô chu, hang ngam vinë-elkui tö chu inrē,

²⁰Invahal tötlöök öng ngam tötlöök? Ngaich yin yih nö ul anūlö ngih nômö chu. Köpölōn tö chu sökhaka i kūö meh öich ṙô tö tölöök in cha, öich havööngökūö ngam lanīnö meh nö ṙā-ang in cha.

²¹Lökten kētö yip kūön cha nö ip inyāichö; kēten cha ip tökalēḵ kūö ap sanët, hökngen yip pīhö cha nö öt kūönu nö tafiösi inrē. Kapah yip yēḵ min tarik cha tökūö invah tölëlngökūö, yip ṙāl tarik cha inrē fëliyö tökūö sanët i kinyūngö.

²²Hāngö öp yēḵ ṙô pameuiny nö i patī cha yē meh min kētö yip kumlöön chehen nöng lūk nö in cha! Pò cha nö ngaich nö ul anūlö nö kē-ĕ chu, ngaich ṙātö tinfötröön chu.

²³Ō Mā Tēv tö-akahalōn man tö nup töhayuntu tī cha nö fëlngen chu. Un aṙēlöng nup öt lanöökö cha, un rēhĕn nö sīchi nup tökööl cha nö ṙā-ang i kūö meh. Hökngen cha nö kavaliyö nö i kūö meh; lök alaha cha ip ṙē-tak tanānyö meh.