Read Car_Nicobarese YERIMIĀ 19 Bible Online

YERIMIĀ 19 - Car_Nicobarese bible

YERIMIĀ 19

¹Ngö ṙô an ngam Mā Tēv Kuṙòh havah tanīöyö chūök òk ip vamī tanīöyö kē yip mākūö yip tarik tö yip minṙöinylen inrē kūönṙô,

²Ngaich kunyī-inyre in öp Achāṙö öp kikōnyö kūön Hinôm ip lökhöt linrākö tanīöyö inkūp, ngaich ahangnyö në ṙô umuh në ṙô chu tö meh.

³Ngö ṙô min me-eṅ, Hang ngam ṙô ngam Mā Tēv, Ō yī-ö rācha aṅ Yūtā yī-ö aṅ Yērusalem inrē. Ngö ṙô an ngam Mā Tēv yip tömaṙôngö, ngam Tēv Israel Yĕh meuk, kētö tötlöök chin i kui ngih chūökö hòṅ nup elnang öp hamang min nö kāthöt elnang tö e.

⁴Pò vē tarik nö ṙāngen chu, ngaich hachōichngö ngih chūökö nö föng tötahūsa nö in e nö i tahëng tēv nup töt mikahkūö cha, öt rēhĕn yik yöng cha, öt rēhĕn yik rācha aṅ Yūtā; pò cha inrē nö hatöḵöl ngih chūökö tö mahām tötakahaṙā.

⁵Ngaich nö vīlö tömarô-òl chūök, chūök Pē-al nö föng kūön re tö kikōnyö nö i kūö tameūyö nö töföngö tökētu nö in Pē-al, ngam töt hachöngten chu hēk chöngö, öt rēhĕn angū-ö nö yih nö ellōn chu,

⁶Lökten, yĕh meuk, yih nup sakāmö, ṙô ngam Mā Tēv, hē ngih chūökö min nö öt ngöhöre invëka nö Tōfĕt hēk Achāṙô öp kikōnyö kūön Hinôm Achāṙö Finëlhanga pöri.

⁷Ngaich i ngih chūökö chū-ö min öich vītö kamngö Yūtā Yērusalem inrē nö hö-övö, vīten yip tarik cha inrē nö fukngö tökūö sanët nö i kūö yik lā-alre, lökngö eltī cha inrē yip chamöh nômö cha, Kētö nup tökapah chin min alaha cha nö nyā-aṅkūö chehechōn aṅ elkuföt töṙeūla inrē aṅ el tumlat.

⁸Ngaich chū-ö min vīten ngih elpanam nö pinhe-eṅ-kūö, nö töng hīsiyö, ṙòkhöre min yip chamöhö meh nö pa-e-kūö ngaich hisngö e tökūö minë ötkanôlò e.

⁹Ngaich vīten cha chū-ö min nö kā alaha kūön re tö kikōnyö kikānö inrē, ngaich min cha-a nö kö kā alaha holre ip invīlö cha tö yip kumyung kanihngen inrē, tī yip lā-al cha min acha-a inrē yip chamöh nômö cha nö hakihten cha.

¹⁰Ngaich me-eṅ min i kūö yip tarik yip hol röön meh nö kiröönngöre öm likukngö ngam chūökkūö amòk,

¹¹Ngaich ngö ṙô tö cha, Ngö ṙô an ngam Mā Tēv yip tömaṙôngö, Ngatī tī chin min likuknngö vē tarik tö ngih elpanam inrē, sā linkukngö öp tanīöyö öp vami tanīöyö, hòṅ e nö öt vanītitṙen. Lāpi min tö tarik nö i Tōfĕt pòn öt chūöku tī tö tahëng nö lāpö.

¹²Angū-ö an min tī chu i ngih chūökö, ṙô ngam Mā Tēv, in yip aṅ e inrē, vīten ngih elpanam nö sā Tōfĕt.

¹³Nup patī i Yērusalem nup patī yip rācha inrē aṅ Yūtā ṙòkhöre nup patī tö-aṅhaṅvkūö töföngö tötahūsa nö in minë tömaṙôngö el halīöngö, nup töṙösnyu òk tökētu nö i tahëng tēv nö hachōchi min sā ök chūök Tōfĕt.

¹⁴Yih ngaich Yarimīa nö ṙā-ang Tōfĕt i chūök tinīnngö ò tö ngam Mā Tēv nö vë-eny nup ṙô, sökhak ngaich anga-aṅ nö el milūkö ök patī ngam Mā Tēv, ngaich ngö ṙô tö yik tarik nö ṙòkhöre:

¹⁵Ngö ṙô an ngam Mā Tēv yip tömaṙôngö, ngam Tēv Israel, Yĕh meuk, kētö tötlöök chin i kui ngih elpanam i kui në kun elpanam e inrē nup tötlöök tö ngaich nö ahangnyu nö in e, pò cha nö hakehngö likeunre, sō nö hang në ṙô chu.