Read Car_Nicobarese YERIMIĀ 20 Bible Online

YERIMIĀ 20 - Car_Nicobarese bible

YERIMIĀ 20

¹Ngaich ök kūönṙô ang Pasūr, ök kikōnyö kūön Imör, ök yöngkūö mā el patī ngam Mā Tēv, hangṙô Yarimiā nö vë-eny në.

²Ngaich Pasūr nö fōhoh Yarimiā ök pròfĕt, ngaich halökngen ò nö i nup inlök el ap Lātulöng Inkūp Penyamin ip patī ngam Mā Tēv.

³Im huṙöich, hē Pasūr nö luhlen Yarimiā nö ṙā-ang i nuk inlök, ngö rô ngaich Yarimiā tö ò, Hö-ö an ngam Mā Tēv nö havëkö ngam minë-eny meh nö Pasūr, Pinhe-eṅkūö pöri nö āṅngöre lā-a.

⁴Pòn ngö ṙô ngam Mā Tēv: Yĕh meuk, vīten meh chin min höng pin-he-eṅkūö töre pinhe-eṅkūö yip holre inrē nö ṙòkhöre. Fukngö yip min tökūö sanët yip lā-alre höng hatīöna min më-eṅ. Keuheūttöre tī chū-ö min kēten Yūtā elti ap rācha an Pēpilön; Kēngen cha min anga-aṅ nö i Pēpīlön nö töhakövö, ngaich aṅtī tö sanët min nö fëlngen cha.

⁵Hēk inrē chū-ö min kētö nup kanôlò ngam elpanam nup taneunglen e, nup aṅ in e töpōi ṙāi, aṅ in yip rācha aṅ Yūtā nö eltī yip lā-al cha, yip kamīlö cha min, kē-ĕ u inrē, ngaich kēngen u nö i Pēpilön.

⁶Ngaich me-eṅ, Pasūr, ṙòkhöre inrē yip mi-iyöng el patī meh, nö kiröönngöre nö im inkövö; chuh Pēpilön min me-eṅ; in e min inrē me-eṅ kapah in e inrē me-eṅ lāpi, me-eṅ ṙòkhöre yip hol meh inrē, yip chūökṙô meh minyôiny-aṅ vë-eny.

⁷Ō Mā Tēv hachīlö chu man ngaich, ngaich chū-ö öich hachīlö; mötlö kumlēk man tö chu, ngaich öm mihôiṅ. Ngaich chin chū-ö aṅkūö inyīölhanga hĕng sumkam; ṙòkhöre yin nö hayëḵngen chu.

⁸Yē chu höng ṙô-òvö chū-ö, hūnyôre chū-ö, cha-nökhuṙen tinṙōlngö inrē! Pò ngam ṙô ngam Mā Tēv nö vītöre nö in chu nö minṙēngö pinhë-eṅkūö inrē sumkāmu nö marô-òten.

⁹Yē chu ngö ṙô, Öt hòṅ kakken ò chin min hēk öt hòṅ ṙôtö ò chin min hēk öt hòṅ ṙôtö minë-eny ò chin ngaich, ngaich ellōn chu ap umuh sā töhūkūö tameūyö öpngö-rekūö nö el nup tangëḵ chu, ngaich chū-ö cheingö haköpken e nö lātuhēt, ngaich ötkô chū-ö.

¹⁰Pòich pōyen ahang tö töhīṙeūtka ṙô. Pinhë-eṅkūö keuheūtngöre lā-al! Vënyen ò nö töfāluṙen! Tā-a töi vënyen ò nö töfāluṙen! yip töha-eh nö hol chu, nö ngëichngö fanukngö chu. Lohten öp min nö hachīlö, ngaich möl ayī-ö kô mihôiṅ tö ò, havahalre inrē in ò.

¹¹In chu pöri ngam Mā Tēv nö sā kumyung töpahë-evö; lökten yip töt mahakôlò chu min nö kavē-ĕre, ötkô yip min nö mihôiṅ tö chu. Kiröngö sumrōngkūö yip min, pò cha min nö öt teunglen, vāchi ap min töt chanūhuvṙen minṙēngö cha.

¹²Ō Mā Tēv yip tömaṙôngö, kamlah tölöök mameuk fanöinylö kuilōn inrē, yĕh töich meuk ngam invahalvah aṅ in meh nö i kui cha, tön in meh tī chin kētö ngih fālen re.

¹³Tikökhökūö ngam Mā Tēv; ha-öiny ngam Mā Tēv! Pò ò nö ṙānyö nômö ngam töhòṅ ṙānyu nö ṙā-ang eltī yip tötlöökö la-en.

¹⁴Rūtpööḵ tötkôlò an yēḵ ngam sakāmö hē chu fötnyu! Ngam sakāmö hē ngam kikānö yöng chu nö rööchnyen chu, hökngen e yēḵ nö tötkôlò!

¹⁵Rūtpööḵ tötkôlò ap yēḵ tarik öp ma-ahangtö nang ap yöng chu kikōnyö, Kikōnyö ap töfötnyu kūön meh, ngaich ṙāmölōn tī tö ò.

¹⁶Hökngen öp tarik anga-aṅ yēḵ nö sā minë elpanam minë tö tiṙöli tö ngam Mā Tēv nö öt aṙē-ĕlōn; hökngen ò nö hang hinū-a tö peuheū pinhe-eṅkūö inrē i ranònglö ngam sakāmö,

¹⁷Pò ò nö öt kumpaha chu el chūök kanūönö; ngaich öre ök yöng chu kikānö nö el anūlö, ngaich kirönghöre ap chūök kanūönö ò.

¹⁸Kūöyòh öichu meutnyi ṙā-ang el chūök kanūönö öich meuk kanihngen miṙivlōn inrē, ngaich keuheūtngö në sakāmö re i sinrōngkūö?