Read Car_Nicobarese YERIMIĀ 21 Bible Online

YERIMIĀ 21 - Car_Nicobarese bible

YERIMIĀ 21

¹Ngih ön ṙô ngih yamih nö in Yarimiā nö ṙā-ang im Mā Tēv, hē ök rācha Sētikia nö tīnten Pasūr nö in ò ök kikōnyö kūön Malkiyā Safāniā inrē ök kūönṙô, ök kikōnyö kūön Ma-asāya, nö ngö ṙô,

²Hatöntöre im Mā Tēv ṙënngen ih, tön kiyung öp nö lā-al ih Nēpukatrēsör rācha aṅ Pēpīlön; lohten an min ngam Mā Tēv nö tī-iv nö in ih tö tösā nup pinngangkūö la-en ò, ngaich heūlngen ò min nö ṙā-ang in ih.

³Ngaich Yarimiā nö ngö ṙô tö cha:

⁴Ngö ṙô yin tö Sētikia, Ngö ṙô an ngam Mā Tēv, ngam Tēv Israel: Yĕh meuk, havanrit nup aṅtī kumyung chin min nup eltī meh nup aṅti meh inrē kiyung lā-al öp rācha aṅ Pēpilön lā-al yip aṅ Kālti inrē yip lā-uk minë kinlōngö nö havīlen yīö; kēten cha chin min nö holre nö ellōn ngih elpanam.

⁵Hakôtenre chin min kiyung lā-al yīö öich teuthaka kël tö tökalēḵ kël, i tanāinyö, i inngëṅṙö, i tökiröng inrē lanīnö.

⁶Fël yip aṅ ngih elpanam chin min inrē, hĕng höre tarik, töṙeūla inrē; kapah yip min tökūö öp yöng tölëlngökūö invah.

⁷Ngaich unôich, ṙô ngam Mā Tēv, öich kēten Sētikia rācha aṅ Yūtā, tö yip tarik ò, tö yip tömaṙôngö inrē i ngih elpanam yip töt kapah tökūö ök invah tölëlngö kūö, tökūö sanët, kūö inyāichö inrē nö eltī Nëpukatrēsör rācha aṅ Pēpilön eltī yip lā-al cha inrē, eltī cha yip chamöh nômö cha. Fëlö cha min anga-aṅ nö aṅtī tö taseūkūö sanët; Öt aṙē-ĕlōn ap min tö cha, hēk öt ṙālen cha, hēk öt miṙē-ĕvlōn:

⁸Ngö ṙô me-eṅ min tö vē tarik: Ngö ṙô an ngam Mā Tēv: Yĕh meuk, i kūö meh tī chin ṙātö talöökö kinpaha inrē.

⁹Anga-aṅ öp mahangöhngöre nö i ngih elpanam kapah min tökūö sanët, kūö inyāichö, kūö invah tölëlngökūö inrē; anga-aṅ pöri öp kumnyī-inyre nö hökngenre nö kē-ĕ tö aṅ Kālti yip mahavīlen yīö, aṅ min ngaich teūngen min tö nômö re nö raneushö kinyūngö.

¹⁰Pò chu kētö kūö re lā-al ngih elpanam kūö tötlöök rö-ö nö tölöök ṙô ngam Mā Tēv: kētu an min nö eltī öp rācha aṅ Pēpīlön ngaich föngngö e min anga-aṅ tö tameūyö.

¹¹Ip patī öp rācha inrē aṅ Yūtā ngö ṙô, Hang ngam ṙô ngam Mā Tēv,

¹²Ō patī Tāvit! Ngö ṙô an ngam Mā Tēv: Kahôka i töt michūṙen kinṙôka tö peuheū, ṙānyö eltī ngam mahakihten tö ò ngam tö-ulāyiṙen, hòṅ ngam lanīnö chu nö öt kiröönngöre nö sā tameūyö, ngaich öt hĕng tak mahanyangngökūö e yĕn hūkūö nup tötlöök la-en yīö.

¹³Yĕh meuk lā-al yīö chin, Ō yī-ö aṅ el achāṙö, Ō ihong ngam töṙā-akūö panam, ṙô ngam Mā Tēv; yī-ö tö ngö ṙô, Achīö ap min yamih nö lā-al ih, hēk achīö ap min kumhēthötre nö ing elyöngö hī?

¹⁴Sācha tī chin min tö meh asā ṙòng nup la-en meh, ṙô ngam Mā Tēv,; tōttökūö tameūiyö ngam el inchōn meh chin min, ngaich angū-ö min nö ṙāpngökūö tö nup mahavīlen ò.