Read Car_Nicobarese YERIMIĀ 22 Bible Online

YERIMIĀ 22 - Car_Nicobarese bible

YERIMIĀ 22

¹Ngö ṙô An ngam Mā Tēv: Kuṙòh kiröönngöre i patī ap rācha aṅ Yūtā, umuh ṙôtö ngih ṙô,

²Ngö ṙô, Hang ngam ṙô ngam Mā Tēv, Ō rācha aṅ Yūtā, amūchhak el kantēra Tāvit, me-eṅ, yip tarik meh inrē, yip kumhēthötre inrē tömaṙôngö tarik meh nö lökhöt në inkūp.

³Ngö ṙô an ngam Mā Tēv: Kahôka im töt michūṙen kinṙôka lanöökö inrē, ṙānyö eltī ngam mahakihten ò ngam tö ulāyiṙen. Un la-evṙen tö töchōich hēk chanökhuṙen im töt aṅ panam meh, i kūön yōich, i tafiösī inrē, un rēhĕn kitaknyö mahām töt akahaṙa i ngih chūökö.

⁴Pò meh yē meh kô-en hang ngih ṙô chu min, ngaich lökhöt i në inkup ngih patī rācha min nö kuhēthötre öp amūichlöre nö el kantēra Tāvit, el inröl i uk kōra inrē, cha-a tö yip tarik cha, yip tömaṙôngö tarik cha inrē.

⁵Yē meh pöri min öt hòṅ hang në ṙô, chūöku ṙô chin in re, ṙô ngam Mā Tēv, tö ngih patī min nö vītöre nö öt aṅhaṅvkūö.

⁶Pòn ngö ṙô ngam Mā Tēv tö inlahen ngam patī ngam rācha Yūtā: Sā ṙēngen Kilīöt man in chu, sā chalòng kui Lëpanön, vīngen meh pori chū-ö öthō öm öt kuyāyö tönyalnyi, elpanam töt aṅhavkūö.

⁷Halēn yip famëlhanga chin min nö lā-al meh, kö aṅ-havtī tö nyahatīre; ngaich cha-a min nö kūöltö nup atöllö meh sītör chōn, ngaich kavalhöt u nö i kūö tameūyö.

⁸Ṙōl yip min pumnāmö tarik chamööḵngö ngih elpanam, ngaich kö ngö ṙô min tarik töholre, Kūöyòh öng ngam Mā Tēv nö ngatī tī tö ngih tökiröng elpanam?

⁹Ngö ṙô min cha-a nö sapṙô, Pò cha nö ṙāngö ngam kinlēḵngô ngam Mā Tēv ngam Tēv cha, ngaich vë-ekūö tahëng tēv lök la-en u inrē.

¹⁰Un peūinyö an ngam tökapah un rēhĕn haṙivhen ò: kalē-ĕṙô pöri peūinyö ò ngam kumröönngöre, tön öt hētu an min nö havan nö meuk öp panam chūök finötnyö ò.

¹¹Pòn ngö ṙô ngam Mā Tēv tö inlahen Sālum öp kikōnyö kūön Yôsayā, rācha aṅ Yūtā ök mahayöng nö ṙënngen Yôsāya ök kikōnyö yöng ò, ök ṙamā-ang ngih chūökö nöng paneuinyngöre: Öthētu ap min nö havan nö ihih.

¹²Ip chūökö pöri chūök tī cha nö kēngen ò nö hakövö, in e anga-aṅ min nö kapah, öt hētu min anga-aṅ inrē nö meuk ngih panam nö hēk.

¹³Tötkôlò ap anga-aṅ ap ma-mānlö patī re nö lökten i michūḵṙen, nup urôhò ò lātulöng inrē nö lökten i michūṙen kinṙôka; öp vamīten holre nö kūönkūö ò nöng öt ṙāyu, hö-ö inrē nö kētö raneushö ò;

¹⁴Öp tö ngö ṙô, Mānlö patī re chin min tö tökiröng nö pōiti ël nup lātulöng urôhò ṙat nup inkūp e inrē lökhöt kuföt, afāha e tö sītör chōn hatīnö e inrē tö tösā el mat manūlö.

¹⁵Rācha öm tö lōnre nö pò meh kasal i sitör chōn? Röh ök yöng yīö nö nyā òk inrē ngaich la-evṙen tö kinṙôka töt michūḵṙen lanöökö inrē? Ngaich angū-ö nö lööken nö in ò.

¹⁶Akah fālen yāich anga-aṅ töhāṅten inrē; ngaich lööken angū-ö. Röh öng angū-ö nö mikahkūö tö chu? ṙô ngam Mā Tēv.

¹⁷Höng mātu pöri me-eṅ fanöinyluvö inrē nöng tö chööḵnyö tö michūḵṙen tö taneūngen, chööḵnyö tö kintaknyö mahām tötakahaṙa, chööḵnyö tö inrūnöre i inkihten chanökhuṙen inrē.

¹⁸Lökten an ngam Mā Tēv nö ngö ṙô tö inlahen Yēhōyakim ök kikōnyö kūön Yôsayā, rācha aṅ Yūtā; Rö-ö yip min nö harāman, nö ngö ṙô, Aōla mëm chu! Hēk Aōla kanānö chu! rö-ö yip min nö harāman, nö ngö ṙô, Aōla mā chu? hēk Aōla ök rācha!

¹⁹Anòngngö inulngö köttö min anga-aṅ nö lāpi, fiṙëchö kavāli ngaich nö havāngngö kui inkūp Yērusalem.

²⁰Kuṙòh kiröönngöre i Lëpanön pōitô hū-a, hachônglöṙôre i Pasān; peuny löknyö i Aparim, tön ṙòkngöre vah yik hanāngenlōn meh nö fëliyö.

²¹Vë-ekūö meh chin misī ik hē meh kôlò, ngö ṙô pöri me-eṅ, Hö-ö chin hòṅ hang. Angū-ö an misī talöökö meh löktökūö nyinī-öṅ meh, öm öt hangṙô chu.

²²Hachōkūö yip yōm pököre meh an min ngam kuföt, yip hanāngenlōn meh inrē min nö kiröönngöre nö im inkövö: ngaich sirōngkūö min me-eṅ kalūöchöre elkui inrē tö kūö nuk öt lanöökö meh.

²³Ō yī-ö aṅ Lëpanön mumtīlöre i nup sītör chōn, yöng inluhu yīö min yĕn yih ap chanökö nö i kui yīö sā chanökö kikānö kamyôḵ!

²⁴Sā chu tö-aṅ, ṙô ngam Mā Tēv, pòrô Kônayā ök kikōnyö kūön Yēhōyakim, rācha aṅ Yūtā nö kinlong minā-aṅ nö lahāmö chu, sönngenre chū-ö öre öich silötnyen meh.

²⁵Ngaich kēngen meh eltī cha yip chamöh nômö meh, öm eltī cha yip pinhë-eṅkūö meh, eltī Nēpukatrēsör rācha aṅ Pēpīlön eltī yip aṅ Kālti inrē.

²⁶Kavalngen meh chin min tö kikānö yöng meh inrē ap kamyôḵnyen meh öich i tahëng panam, öp töt chūök meh fötnyu, ngaich in e me-eṅ min kapah.

²⁷Ip panam pöri chūök lōn cha nö hòṅ havan, öt havan cha-a nö in e.

²⁸Ngòh ang tarik Kônayā töha-āchiṙen tölakuk tanīöyö, chūökṙen nö tö hakūökaṙen? Kūöyòh aich më kūön ò nö hateūyi nö kavāli nö ip panam töt mikahkūö cha?

²⁹Ō panam, panam, panam hang ngam ṙô ngam Mā Tēv!!

³⁰Ngö ṙô an ngam Mā Tēv, Kūichngö ngòh tarik nö tötkūönu, tarik tötteunglen min i nup sakāmö ò; pòn öt hĕng tak min kūön ò töteunglö nö ūichlöre nö el kantēra Tāvit, nö hēk nö hayöng nö i Yūtā.