Read Car_Nicobarese YERIMIĀ 23 Bible Online

YERIMIĀ 23 - Car_Nicobarese bible

YERIMIĀ 23

¹Tötkôlò yip yōm pököre yip famël hang ane inrē pumrātngö nup sīṅp nö ṙā-ang el öp chūök u nö nyā-aṅvkūö! Ṙô ngam Mā Tēv.

²Lökten an ngam Mā Tēv nö ngö ṙô, ngam Tēv Israel, tö inlahen yip yōm pököre yip mahayōm vē tarik chu: Paratī nuk pököre chu tö yīö, ngaich marôvat tī öi ahōngö u, ngaich hö-ö yī-ö in u. Yĕh meuk, hòṅ in yīö chin chū-ö tökūö nup tötlöök la-en yīö, ṙô ngam Mā Tēv.

³Ngaich chū-ö min hamūl nup chööḵṙen nup pököre chu ṙā-ang i nup panam i chūök tī chu ahōngen u, ngaich havanten u min chū-ö ip chūök u nö mūl, ngaich anū-ö min nö kūönu ngaich ṙūölöre ṙôken.

⁴Ṙātö yōm pököre chin min i kui u, yip töṙūötökūö min tö u, ngaich anū-ö min nö ötngöhören nö pa-ekūö, öt rēhĕn nö ngang-ngökūö, öt rēhĕn min nö hĕng hang nòng töchatngen, ṙô ngam Mā Tēv.

⁵Yĕh meuk, yih nup sakāmö ṙô ngam Mā Tēv, hē chu min hachohlö öp tölöök Pak in Tāvit, ngaich sā rācha min anga-aṅ nö hayöng nö huveū-eutī inrē, kahôka min inrē im öt michūṙen kinṙôka lanöökö inrē im panam.

⁶Hayöökaṙen min Yūtā i nup sakāmö ò, iyöng min inrē Israel nö köp. Ngih öp min minënyö ò nö havëka: Ngam Mā Tēv an lanöökö hī.

⁷Lökten yĕh meuk, yih nup sakāmö ṙô ngam Mā Tēv, hē tarik min nö öt ngöhören nö ngö ṙô, Sā ngam Mā Tēv nö tö-aṅ ngam kamënyö yip tarik chu Israel nö ṙā-ang ap panam Aikup.

⁸Ngö ṙô pöri, Sā ngam Mā Tēv nö tö-aṅ ngam kamënyö ane inrē mahachōḵnyö yip kūön aṅ patī Israel nö ṙā-ang i nup panam inrē chūök tī ò nö ahōngen cha. Ngaich cha-a min nö iyöng panam re takô.

⁹I inlahen yip pròfĕt: lakūki ap ellōn chu nö lātuhēt, ṙòkhöre nup tangëḵ chu nö kichëyöre; sā tarik chin mihīyōi, sā tarik tötkô tökūö vāīn, kūön ngam Mā Tēv kūö minë töhet ṙô ò inrē.

¹⁰Pò ngam panam nö tööḵlö töma-asĕha; kūö ngam rinūtngövah ngam panam nö haṙivlōn, ngaich nup kiyôp nö nyangngö el ngam el inchōn tönyalnyi. Tötlöök ap talöökö cha, öt töhuveū inrē ngam kumlēḵ.

¹¹Pròfĕt kūönṙô inrē nët re nö ötlöök; uroh chin el patī re kôtökūö tö öt lanöökö cha, ṙô ngam Mā Tēv.

¹²Lökten ap talöökö cha min nö in cha nö sā tötaleūcha kanröönö el sinngūlö, ip chūök cha min nö ahōṙiyö ngaich fukngö; pò chu min kētö tötlöök i kui cha ip samyeūheu cha nö sācha, ṙô ngam Mā Tēv.

¹³In yip pròfĕt i Samariā hĕng öp maheuṅk chu tökunyah: lökten Pē-al yip nö vë-eny ṙô ngaich nö hachōngö yip tarik Israel nö lō-ongkūö.

¹⁴In yip pròfĕt pöri i Yērusalem öich meuk pinhë-eṅkūö: asĕha yip lök i minyôny-aṅ inrē; hangëḵlö kël yip tötlöökö la-en cha-a, lökten nö öthĕng tak mahavööngökūöre töngam öt lanöökö ò; ṙòkhöre yip nö vītöre nö sā Sôtöm nö in chu, yip aṅ e inrē sā Kômòra.

¹⁵Lökten ngam Mā Tēv tömaṙôngö nö ngö ṙô tö inlahen yip pròfĕt: Yĕh meuk, ha-aṅlen cha chin min tö tö-angū-öṅvö chōn, kētö òk cha inrē tö mak kinpahangvah; pòn löktö in yip pròfĕt i Yērusalem öt lanöökö nö ngaich nö kirööngöre im panam nö ṙòkhöre.

¹⁶Ngö ṙô an ngam Mā Tēv yip tömaṙôngö: Uh yin hang nup ṙô yik pròfĕt yip vame-eny ṙô nö in yīö, hatööḵngen yīö tö töngtöl tömeūkka; höng ve-eny maheuṅk nup ellōn re yip, rö-ö nö ṙāmā-ang elvāng ngam Mā Tēv.

¹⁷Höng iṙūöhö ṙô yip tö cha yip töt chumkūöṙen tö ṙô ngam Mā Tēv, nö ngö, Lööken an min nö in yīö; in ò inrē ap töthanvööken kūö nö tömrit lōnre, ngö rô cha-a, Öthō yin teunghukui tö tötlöök.

¹⁸Achīö ap in cha ṙöng samökhaka nö im inlēnö aṅ im Mā Tēv mameuk hang ṙô ò inrē hēk achīö ap töchumkūöṙen nö hangihtöre tö ṙô ò?

¹⁹Yĕh meuk, ngam chanôchö panam aṅ i ngam Mā Tēv! Ngaich ök lanīnö nö kiröön-ngöröönre, chanôchö lamfeui kuföt; lakukköṅny ap min nö i kui tötlöök.

²⁰Öt havanritre an min ngam tanānyö ngam Mā Tēv hanöng saha ò nö keuheūtö tī nö hateungngö ap chööḵnyö ellōn re. In öp unôichngöre sakāmö yī-ö min löökö mikah elmat tö e.

²¹Hö-ö chin tīntö yip pròfĕt, ngaich sön cha-a nöng fal; hö-ö chin vë-ekuö cha, ngaich sön cha-a nöng vë-eny ṙô.

²²Yē cha pöri nö sökhaka nö ip inlēnö tö chu, ngaich cha-a öre nö ahangkö në ṙô chu nö i vē tarik chu, ngaich öre cha-a nö havööngökūö cha nö ṙā-ang im tötlöök talöökö la-en cha inrē.

²³Tēv öich chū-ö töröhta, ṙô ngam Mā Tēv, hö-ö öich Tēv tömarôvat?

²⁴Kô ang ngòh tarik nö hayunngöre nö i tönyatngö chūökö hòṅ chu ötkô meūkan? ṙô ngam Mā Tēv. Rö-ö öichu tööḵlö tī tö ngam halīöngö tumlat inrē? ṙô ngam Mā Tēv.

²⁵Hang ṙô yip pròfĕt chin yik vamë-eny töminyôinyaṅ ṙô nö i minë-eny chu ngö ṙô, Heūv chin, heūv chin!

²⁶I rô-òten ap min minyôiny-aṅ nö ellōn yip pròfĕt yip vamë-eny minyôiny, yip vamë-eny inchīlö aṅ ellōn re inrē,

²⁷Yip tölōn tö yip tarik chu nö vaichngö minë-eny chu tökūö nup heūvö cha tövënyu tö cha nö in höö, sā yik yöng cha nö vaichngö minë-eny chu tökūö Pē-al?

²⁸Hökngen ap pròfĕt hameūv nö vë-eny heūvöre hökngen ò pöri öp tö-aṅhav-in tö ngam ṙô chu nö ṙô-òv tö ngam ṙô chu nö kô-en. Asuh ön në rōi kiyôp nö sāta nö i sāiny? ṙô ngam Mā Tēv.

²⁹Röh öng ngam ṙô chu nö sā tameūyö, ṙô ngam Mā Tēv, sā mūngöre inrē öp lumkuk ihong nö kaṙöp?

³⁰Lökten, yĕh meuk, lā-al yip pròfĕt chin, ṙô ngam Mā Tēv, yip mī-i litāk re nö ngö ṙô, Ṙô ngam Mā Tēv, yip mī-in höö nö ulāingen ngam ṙô chu.

³¹Yĕh meuk, lā-al yip pròfĕt chin ṙô ngam Mā Tēv, yip mī-i litāk re nö ngö ṙô, Ṙô ngam Mā Tēv.

³²Yĕh meuk, lā-al cha chin yip vamë-eny töminyôiny-aṅ heūvö, ṙô ngam Mā Tēv, yip vamë-eny nang cha inrē mahachōngö yip tarik chu inrē nö lō-ongkūö tökūö minyôiny-aṅ cha ane inrē kūö öt pinhë-eṅkūö cha tö pinlāngen, hē chu rö-ö tīnten cha hēk tölṙô cha; lökngen cha nö öt kanôluṙô tī tö vē tarik, ṙô ngam Mā Tēv.

³³Hē öp töhĕng tak aṅ in vē tarik, hēk hĕng tak pròfĕt, hēk hĕng tak kūönṙô mahatönö meh, Suh ap tölangan aṅ im Mā Tēv? Ngaich ngö ṙô min me-eṅ tö cha, Yī-ö yin lumngan, kavalngen yīö chin min, ṙô ngam Mā Tēv.

³⁴In öp pròfĕt pöri, kūönṙô, hēk töhĕng tak aṅ in yip tarik öp tö ngö ṙô, Ngam lumngam aṅ im Mā Tēv, sācha tī chin min töp tarik anga-aṅ tö yip aṅ patī ò inrē.

³⁵Ngaich ngö ṙô min me-eṅ, kö i holre kö i mak alahare inrē, Asuh ap sanapṙô ngam Mā Tēv? Hēk asuh ap ṙô ngam Mā Tēv?

³⁶Un kakka pöri nö hēk tö meh ngam lumngan aṅ im Mā Tēv, pò ngam lumngan nöng kö ṙô töhĕng tak tarik, ngaich me-eṅ inrē hachōichngen minë ṙô ngam tö-aṅ Tēv Mā Tēv tömaṙôngö, ngam Tēv hī.

³⁷Ngö ṙô min me-eṅ töp pròfĕt, Sitih ṙô min me-eṅ töp pròfĕt, Sitih ṙô ang ngam Mā Tēv nö sapṙô meh? Hēk sitih ṙô ang ngam Mā Tēv?

³⁸Yē meh pöri ngö ṙô, Ngam lumngan aṅ im Mā Tēv, ngö rô an ngam Mā Tēv, Pò meh ṙôtö në ṙô, ngam lumngan aṅ im Mā Tēv, hē chu söömhöti in meh, öich ngö ṙô, Uh man ngö ṙô, Ngam lumngam aṅ im Mā Tēv,

³⁹Lökten, yĕh meuk, kô-òti chin min chātlen meh kavalngen meh inrē ṙā-ang i kūö chu, me-eṅ töm elpanam inrē ngam kahëtö chu in meh in yik yöng meh inrē.

⁴⁰Kētö kui meh chin min inrē tö ngam minṙēngö töt chanūhuvṙen ngam tö öt heumköre inrē sinrōngkūö, ngam törö-öv min nö vāichiṙen.