Read Car_Nicobarese YERIMIĀ 24 Bible Online

YERIMIĀ 24 - Car_Nicobarese bible

YERIMIĀ 24

¹Unôichrit Nēpukatnēsar ök rācha aṅ Pēpīlön nö kēngen Yakôniah nö ahöti nö ṙā-ang Yērusalem ök kikōnyö kūön Yēhōyakim, rācha aṅ Yūtā, holre tö yik tarik vamī chehen, ramöm vët inrē ngaich kētu cha-a tö ò nö i Pēpilön, ngaich ngam Mā Tēv nö hameukhömat chu tö ngih tömeūkö: Yĕh meuk, nët nup kuvôkö anychīr töṙātu nö i kūö ök patī ngam Mā Tēv.

²Hĕng ök kuvôkö tö aṅtö tökôlò anychīr, sā raneh töngāṅv anychīr, ngaich pöri ök tahëng kuvôkö nö aṅtö tötkôlò anychīr chahū-ui takô lökten u nö öt nyanā-en.

³Ngaich ngö ṙô ngam Mā Tēv tö chu, Yarimiā, asuh ap maheuṅk meh? Ngaich ngö ṙô chū-ö, Anychīr, tökôlò takô anychīr, tötkôlò anychīr inrē, chahū-ui takô lökten u nö öt nyanā-en.

⁴Ngaich ngam ṙô ngam Mā Tēv nö yih nö in chu:

⁵Ngö ṙô an ngam Mā Tēv, ngam Tēv Israel: Sā në tökôlò anychīr, ngatī lanöökölōn min chū-ö tö ngam inhötngö nö ṙā-ang Yūtā, yip tahīnngö chu nö ṙā-ang i ngih chūökö nö ip panam yip aṅ Kālti.

⁶In cha min në mat chu nö i tölöök, havanten cha chū-ö min inrē nö i ngih panam. Mānlen cha chin min, nö tiṙölngen cha teūichten cha min, öt teuklen cha.

⁷Kētö ellōn cha chin min nö akahakūö tö chu öich chū-ö Mā Tēv; ngaich acha-a min nö tarik chu ngaich chū-ö min inrē Tēv cha, pò cha min nö havantöre nö in chu nö keuheūttö ellōn re.

⁸Ngö ṙô pöri ngam Mā Tēv: Sā nup tötkôlò anychīr nup töyahngö chinhūngö nö tötnya-nā-eṅ, ngatī inlahen tī chin min tö Sētikia öp rācha aṅ Yūtā, yip kūön rācha ò, yip chööḵṙen i Yērusalem yip tö-ōtre nö i ngih panam, cha-a inrē yip mī-iyöng ngam panam Aikup.

⁹Vīten cha chin min nö pinhë-eṅkūö in nup pūlngö ngih tumlat nö ṙòkhöre,nö minṙēngö, inchō-oṙô, inkeūlô, rinūtngövah inrē, i nup chūökö nö ṙòkhöre chūök cha nö ahōṙi tö chu min.

¹⁰Tīntö sanët chin min, inyāichö, invah tölëlngökūö inrē, nö i kui cha, hanöng saha cha min nö hatngö nö kapah nö ṙā-ang i kūö ngam panam ngam kahëtö chu in cha in yik yöng cha inrē.