Read Car_Nicobarese YERIMIĀ 25 Bible Online

YERIMIĀ 25 - Car_Nicobarese bible

YERIMIĀ 25

¹Ngam ṙô yamih nö in Yarimiā inlahen yik tarik Yūtā nö ṙòkhöre, im finën samyeūheu Yēhōyakim ök kikōnyö kūön Yôsayā, rācha aṅ Yūtā (Angū-ö ök raneh samyeūheu Nēpukatnēsar rācha aṅ Pēpilön),

²Ngam ṙô ngam pròfĕt Yerimīā nö in yik tarik aṅ Yūtā nö ṙòkhöre yik aṅ Yērusalem inrē nö ṙòkhöre:

³Nët anāi lūöi samyeūheu rô-òten löktökūö ik linūöi sīön samyeūheu Yôsayā ök kikōnyö kūö Amön, rācha aṅ Yūtā, söl i ngih sakāmö, ngam ṙô ngam Mā Tēv nö yih nö in chu, Ngaich chū-ö öt ṙākôre öich ṙô-òv in yīö, hö-ö pöri yī-ö hang.

⁴Rö-ö yin rēhĕn hang öt rēhĕn asītö elnang re öi hang, pòrô ngam Mā Tēv nö öt ṙākenre nö tīntö yip tarik re pròfĕt nö in yīö,

⁵Nö ngö ṙô, Köhavööngökūöre yin, ṙā-ang i tötlöök talöököre i tövaich inrē la-enre, iyöng im panam inrē ngam kahëtö ngam Mā Tēv nö in yīö in yik yöng yīö inrē löktökūö misī höng örheūheu;

⁶ui tömrit tahëng tēv öi lök la-en u vë-ekūö u inrē, hēk harunnyö tanānyö chu i nup vahīṙen minë kuntī yīö. Ngaich chū-ö min öt chökhutī tö yīö.

⁷Sönngenre yī-ö öt hangihtöre tö ṙô chu, ṙô ngam Mā Tēv, pò yīö hòṅ harunnyö tanānyö chu i nup vahīṙen kuntī yīö öi hachököre.

⁸Lökten an ngam Mā Tēv yip tömaṙôngö nö ngö ṙô: Pò yīö öt hang në ṙôchu,

⁹Yĕh meuk, tīnngö lamukkö yip miyöngö tarik chin aṅ lā kapā, ṙô ngam Mā Tēv, lamukken Nēpukatnēsar rācha aṅ Pēpilön tarik chu, kēten cha chin min nö lā-al ngih panam tö yip aṅkūö e inrē, lā-al vē pumnāmö tarik i chīṙö; ahatngen cha chin min, vīten cha inrē nö pinhë-eṅkūö, töhīsi, töt chanūhuvṙen inrē nö minṙēngö.

¹⁰Hēk inrē, ahōngö nīölö chin min ṙā-ang in cha ṙô ṙānāmölōn inrē, ṙô töhapīhö kikōnyö, ṙô töhapīhö kikānö inrē, ṙô nup kinṙīöt ihong yanāngökūö ëāṅvö inrē.

¹¹Keuheūtngöre min ngih panam nö payāyi öt aṅhavkūö inrē sat anāi samyeūheu yin min vē tarik nö kūön öp rācha aṅ Pēpīlön.

¹²Keuheūthëṙen minë tösat anāi samyeūheu, sācha tī min chū-ö ngaich töp rācha aṅ Pēpilön ap pumnāmö tarik inrē ap panam yip aṅ Kālti, kūö nup öt lanöökö cha, ṙô ngam Mā Tēv, nö vīngen ngam panam nö örheūheu nö öt aṅhavkūö.

¹³Kētö kui ap panam chin min angū-ö tö nup ṙô chu nö ṙòkhöre nup kahaknyö chu öich lā-al e, nup tökūchiyö nö i mat ngih līpöre,nup vahë-eny Yarimiā nö lā-al vē pumnāmö tarik.

¹⁴Pòn maṙôngö yip pumnāmö tarik tökiröng rācha inrē nö vīten cha min nö töhakövö; ngaich chū-ö min havahlö nup tösā la-en cha nup vahīṙen nup kuntī cha.

¹⁵Pòn ngö ṙô ngam Mā Tēv tö chu ngam Tēv Israel; Kē ngam kulah vāin lanīnö nö ṙā-ang eltī chu, vīten yip pumnāmö tarik nö ṙòkhöre yip chūök yīö tīntu tö chu nö ôkö e.

¹⁶Òk yip min ngaich latēvi katūöyaṙen inrē tökūö ngam sanët ngam tötīntu tö chu nö in cha.

¹⁷Ngaich chū-ö kē ök kulah ṙā-ang eltī ngam Mā Tēv, ngaich vīten yip pumnāmö tarik yip chūök chu tīntu tö ngam Mā Tēv nö ôkö e.

¹⁸Yērūsalem tö nup elpanam Yūtā, yip rācha e kūön rācha inrē, öich vīten cha nö töpayāyi tötaṅhavkūö inrē, töhīsi törūtivah inrē, sā e i ngih sakāmö;

¹⁹Fërō rācha aṅ Aikup,yip tarik alaha ò, kūön rācha, ṙòkhöre yip tarik ò,

²⁰ṙòkhöre inrē yip aṅ tahëng in cha; ṙòkhöre yip rācha ap panam Ūs ṙòkhöre inrē yip rācha ngam panam Filistain (Eskēlòn, Kāsa, Ĕkròn, yip chööḵṙen Astòt inrē);

²¹Ētöm. Mō-ap, yip kikōnyö inrē kūön Amön:

²²ṙòkhöre yip rācha aṅ Tūrös, ṙòkhöre yip rācha aṅ Sītōn tö yip rācha aṅ panam lākūö mai lāmuh tö ngam mai;

²³Tētān, Tēma, Pus, ṙòkhöre inrē yip kammöplö taseū kuire;

²⁴ṙòkhöre rācha aṅ Arēpiā; ṙòkhöre inrē rācha yip tökalūöchöre miyöngö tarik mi-iyöng el tönyalnyi kuyāyö;

²⁵ṙòkhöre rācha aṅ Simrī, ṙòkhöre rācha aṅ Ēlam, ṙòkhöre inrē rācha aṅ Mītiā;

²⁶ṙòkhöre rācha aṅ lā kapā, marôvat röhta inrē, kö unôichrit höö, ṙòkhöre inrē nup pūlngö ngam panam nup mī-ikūö ngam tumlat. Unôich tö cha ngam rācha aṅ Pēpilön nö òk min.

²⁷Ngaich ngö ṙô min me-eṅ tö cha, Ngö ṙô an ngam Mā Tēv yip tömaṙôngö, ngam Tēv Israel; Òk, hiyōi yēḵ, kuvav inrē, fukngö un chōholre nö hēk, kūö ngam sanët ngam tahīntö chu in yīö.

²⁸Ngaich yē cha nö sōḵtö ngam kulah nö ṙā-ang eltī meh nö òk, ngaich ngö ṙô me-eṅ min tö cha, Ngö ṙô an ngam Mā Tēv yip tömaṙôngö: Ötkô yin öt ôkö e?

²⁹Yĕh meukl pò chu rultöre la-evṙen tö tötlöök i ngam elpanam ngam töhavëka tö minë-eny chu, hòṅ kiröönngöre ṙöng öm öt sācha? Hö-ö man kiröönngöre öt sācha pò chu havëtö sanët lā-al yip aṅngih tumlat, ṙô ngam Mā Tēv yip aṅ ngih tumlat, ṙô ngam Mā Tēv yip tömaṙôngö.

³⁰Lökten man, lā-al cha vë-eny në ṙô,ngö ṙô inrē tö cha; Pôti ṙô aṅ min ngam Mā Tēv nö löktö lātulöng ṙā-ang im töhet elyöngöre inrē nö kaknyö ṙôre; kalē-ĕṙô ap min nö pōitô nö lā-al nup pököre ò, hū-a inrē, sā yip ramöönnyö ṙòng angkūr, lā-al yip aṅkūö ngih tumlat nö ṙòkhöre.

³¹Sölngö ap min pööinyṙô nö i manā-angkūö ngam tumlat, pò ngam Mā Tēv nö vë-eny fālen yip pumnāmö; kuhēthötre an nö ngaich nö el chūök inkaha fālen nö holtö taṙòkhöre tarik, sāpi min inrē tö sanët öp tötlöök, ṙô ngam Mā Tēv.

³²Ngö ṙô an ngam Mā Tēv yip tömaṙôngö: Yĕh meuk, ngaich ök tötlöök nö kiröönngöre nö löktökūö ngam pumnāmö tarik nö im pumnāmö tarik, ngaich öp chanôichö panam nö kalēḵ löktökūö im tömarôvat alaha ngam tumlat!

³³Yip töfëli tö tī ngam Mā Tēv ik sakāmö angū-ö min nö löktökūö im töhĕng manā-ang-kūö ngam tumlat söl im tahëng. Hö-ö yip min nö harāmö, hēk hamūlö, hēk lāpi; höng sā sôḵ nuā yip min nö ikūö ngam tumlat.

³⁴Harāmöre, yī-ö yōm pököre, peuiny inrē, pilönöre el tisum, yī-ö mākūö nup pököre, tön yih nup sakāmö finëlngö yīö pinrātngö yīö inrē, ngaich yī-ö min fukngö sā nup tö-atöllöng kūön sīṅp.

³⁵Öt ōtre min innyatlö yip yōm pököre öt rēhĕn nö chūöku nö öt kô-òngvah yip mākūö nup pököre.

³⁶Hangihtöre, tö ṙô yip yōm pököre nö peuiny, tö ṙô yip mākūö pököre inrē nö harāmöre! Pò ngam Mā Tēv nö öt hakôlò ngam kiyôp cha,

³⁷Ngaich nup töchēvhakṙen pököre nö ahātiyö, tö ngam tökalēḵ tanānyö ngam Mā Tēv.

³⁸Sā lāyön an nö ṙāngö ngam chūök innyangö ò, pò ngam panam cha nö ngaich nö öt aṅhavkūö tökūö sanët ngam mahakihten ane inrē kūö ngam tökalēḵ tanānyö ò.