Read Car_Nicobarese YERIMIĀ 26 Bible Online

YERIMIĀ 26 - Car_Nicobarese bible

YERIMIĀ 26

¹In ranehten Yēhōyakim nö hayöng ök kikōnyö kūön Yôsaya, rācha aṅ Yūtā, yih ngih ṙô nö ṙā-ang im Mā Tēv,

²Ngö ṙô an ngam Mā Tēv: Söklöre el milūkö ngam patī ngam Mā Tēv, vë-ekūö nup elpanam Yūtā nö ṙòkhöre yip yamih nö vë-ekūö-tēv nö el ngam patī ngam Mā Tēv tönup ṙô tinölô meh tö chu öm ṙô-òv in cha; um hēngö ma-iṅka tö ṙô.

³Lohten yip min nö hangihtöre, ngaich kö havööngökūöre nö ṙā-ang im tötlöök talöököre, hòṅ chu ṙā-al lōn re tö ngam tötlöök ngam lōn chu tī chu in cha kūö nup tötlöök la-en cha.

⁴Ngö ṙô pòmchö tö cha, Ngö ṙô an ngam Mā Tēv: Yē yīö min öt hangṙô chu, öi lök im chöngö chu ngam ṙahātö chu i kūö yīö,

⁵Kūötenre inrē tö minë ṙô yip tarik chu pròfĕt yip tahīntö chu in yīö öich mileūchen, pòrô yī-ö öt hakūötenre,

⁶Ngaich chū-ö min vīlö ngih patī nö sā Sailō, ngaich chū-ö inrē min vīten ngih elpanam nö tö rūtiṙen tö vē pumnāmötarik ngih tumlat.

⁷Ngaich yip kūönṙô tö yik pròfĕt inrē ṙòkhöre inrē yik tarik nö hang ṙô Yarimiā tö në ṙô nö el patī ngam Mā Tēv.

⁸Ngaich hē Yarimiā nö keuheūtö ṙô tö në nö ṙòkhöre tinölô ò tö ngam Mā Tēv, nö vë-ekūö yik tarik nö ṙòkhöre, ngaich yik kūönṙô tö yik pròfĕt ṙòkhöre inrē yik tarik nö kētö tīre nö in ò, nö ngö ṙô, Kapah man min!

⁹Kūöyòh öm vë-eny mu-unôich i minë-eny ngam Mā Tēv, öm ngö ṙô, Sā Sailō ön min ngih patī, ngih panam inrē ngih min nö piyāyiyö, nö öt aṅhavkūö? Ṙòkhöre ngaich yik tarik nö hamūlöre nö in Yarimiā nö elngam patī ngam Mā Tēv.

¹⁰Hē yik kūön rācha aṅ Yutā nö hang në, yih cha-a ngaich nö ṙā-ang patī ök rācha nö el ök patī ngam Mā Tēv ūichngöre ngaich nö ik lökhöt ök Tufömngöre Inkūp ök patī ngam Mā Tēv.

¹¹Ngaich yik kūönṙô tö yik pròfĕt nö ngö ṙô nö in yik kūön rācha in yik tarik inrē nö ṙòkhöre, Töhòṅ sācha tö kinpaha ön ngòh tarik, pò ò nö chōchöṙô nö i ngih elpanam, sā ahang minë elnang yīö ngaich.

¹²Ngaich Yarimiā nö vë-ekūö yik kūön rācha tö yik tarik inrē nö ṙòkhöre, nö ngö ṙô, Tīnten chu an ngam Mā Tēv öich vë-eny töchōich i ngih patī i ngih elpanam inrē tö minë ṙô ahang yīö ngaich.

¹³Lökten yin töngamuh halööktit nup talöököre tö nup la-en yīö inrē, ngaich hangṙô ngam Mā Tēv ngam Tēv yīö ngaich ṙā-allōnre min ngam Mā Tēv töp tötlöök öp ṙô ò nö ngaich nö lā-al yīö.

¹⁴Yĕh meuk, eltī yīö pöri chū-ö. Kahanglōnre yin tö chu sā öp tölöök lōn yīö töhuveū inrē in yiö.

¹⁵Höng akahalōn tö yīö yē yīö kumpaha chu, kētö kui re min yī-ö tö mahām tötakahaṙa tarik i kui ngih elpanam inrē tö yip aṅ e, pò ngam Mā Tēv nö kô-en nö tīnten chu vë-eny në ṙô elnang yīö.

¹⁶Ngaich ngö ṙô yik kūön rācha yik tarik inrē nö ṙòkhöre nö in yik kūönṙô in yik pròfĕt inrē, Hö-ö ön ngòh tarik nö töhòṅ sācha tö kinpahangvah, pò ò nö ṙô-òv nö in hī nö i minë-eny ngam Mā Tēv ngam Tēv hī.

¹⁷Ngaich rīkre yik mā aṅ impanam chamôhòlre ngaich vë-ekūö yik tömūl tömaṙôngö tarik, nö ngö ṙô,

¹⁸Vë-eny mu-unôch tö yīhih ök misī Maika ök aṅ Mōrēset hē nuk sakāmö Hēsikaya rācha aṅ Yūtā, nö ngö ṙô tö yik tarik i Yūtā: Ngö ṙô an ngam Mā Tēv yip tömaṙôngö, Kuköhö an min Siyôn nö sā panô-òṅ, fônghak min Yērusalem nö taṙöli, ngam rôngö ngam patī inrē nö chūök chōn nö i kui e.

¹⁹Ngaich kumpahangvah ò hòng ang Hēsikaya ök rācha aṅ Yūtā, ṙòkhöre inrē yik aṅ Yūtā? Röh ök nö pa-ekūö tö ngam Mā Tēv ngaich havëkö inṙē-ĕlre nö i ngam Mā Tēv, ngaich röh hòng ngam Mā Tēv nö ṙā-al lōnre tök tötlöök ök ṙô ò nö lā-al cha? Ngaich pöri ayī-ö hòṅ kētö tökiröng tötlöök i kui re.

²⁰Tahëng ök inrē umuh tarik misī vamë-eny mu-unôich nö i minë-eny ngam Mā Tēv, ang Yurayā ök kikōnyö kūön Sēmaya an Kiriyatyerim. Vë-eny mu-unôich anga-aṅ nö lā-al ngih elpanam lā-al ngih panam inrē nöng sā nuk ṙô Yarimiā.

²¹Ngaich hē ök rācha Yēhoyakim, hol re tö yik kumyung in ò ṙòkhöre inrē yik kūön rācha, nö hang nuk ṙô ò, lukkenre ngaich ök rācha nö hòṅ kumpahan; hē Yurayā pöri nö hāngö e, pa-ekūö ngaich anga-aṅ falngöre ngaich nö i Aikup ngaich öt kô-òngvah.

²²Ngaich ök rācha Yēhoyakim nö tīnngö tarik hĕng tak nö i Aikup, ang Ĕlnātan ök kikōnyö kūön Akpōr holu anga-aṅ tö tahëng,

²³Ngaich cha-a nö kē-ĕren Yurayā nö ṙā-ang Aikup ngaich kēten ò nö ik rācha Yēhoyakim, ök famëlngen ò nö aṅtī tö sanët kavalngö ök alaha ò ngaich nö i chūök lināpngö töng tarīkaṙa.

²⁴Holṙen Yarimiā pöri ök kël Ahikam ök kikōnyö kūön Sāfan lökten ò nö öt kētu nö in yik tarik nö kumpahaivah.