Read Car_Nicobarese YERIMIĀ 27 Bible Online

YERIMIĀ 27 - Car_Nicobarese bible

YERIMIĀ 27

¹Ik ranehten Sētikiā nö hayöng ök kikōnyö kūön Yōsayā, rācha aṅ Yūtā, ngih ṙô yamih nö in Yarimiā nö ṙā-ang im Mā Tēv.

²Ngö ṙô an ngam Mā Tēv tö chu, Vī chehen re man tö uk kinpòk kaneun nuā inrē, hakeunlö u pömchö i likeun re.

³Söömngö ṙô ip rācha aṅ Ētöm ip rācha aṅ Mô-ap, ip rācha yip kikōnyö kūön Amön, ip rācha aṅ Tūrös, ip rācha inrē aṅ Sitōn löktö eltī yip kūönṙô rācha ip yamih nö i Yērusalem nö in Sētikiā rācha aṅ Yūtā.

⁴Kētö ngih chöngö in yip mā cha: Ngö ṙô an ngam Mā Tēv yip tömaṙôngö, ngam Tēv Israel: Ngih ön min ṙô yīö i yip mā yīö:

⁵Chū-ö chin vamīlö ngam tumlat aṅtī tö ngam minhôiṅyö ngam töteuthaka kël chu, nö hol re tö tarik töṙeūla inrē. I kui ngih tumlat, ngaich kētö e chū-ö in ò öp tö huveū-en tö lōn chu.

⁶Ngaich chin töngamuh kēten në panam eltī Napukātnēsör rācha aṅ Pēpilön ök kūön alaha chu, ngaich chin inrē kē-ekūö ò tö në töṙeūla el ngam kahôyö nö meukṙen ò.

⁷Ṙòkhöre vē pumnāmö tarik min nö kūön alaha ò kikōnyö kūön ò kikōnyö inrē yōm ò, hanöng saha öp ṙētak öp panam ò nö yih; ngaich maṙôngö pumnāmö tarik min tökiröng rācha inrē nö vīten ò min nö töhakövö tö cha.

⁸Yē öp pumnāmö tarik pöri hēk öp pūlngö min nö öt kūönkūö ngòh Nepukatnēsar rācha aṅ Pēpilön, nö hakeunlö likeunre tö ngam kaneun öp rācha aṅ Pēpīlön, sācha tī chin min töp pumnāmö tarik aṅtī tö sanët, inyāichö, tölëlngö kūö invah inrē ṙô ngam Mā Tēv, hanöng saha chu min keuheūtngen e löktö eltī ò.

⁹Lökten yin ui hang ṙô yip pròfĕt re, yip chamòng alaha in yīö,yip hameūv in yīö, yip vamë-eny mu-unôich in yīö, hēk yip tömilūönö in yīö, yip tö ngö ṙô tö yīö, Hö-ö yin hō kūön alaha öp rācha aṅ Pēpilön.

¹⁰Pò e nö minyôiny-aṅ ngam ṙô cha nö ve-eny nö in yīö, ngam lökngen yīö min kē-ĕyö marôvat ṙā-ang im panam yīö, ahōnyen yīö chū-ö min inrē, ngaich yī-ö min lëlngö.

¹¹Öt pumnāmö tarik pöri öp mahakeunlö likeun re min tö ngam kaneun ngam rācha aṅ Pēpilön ngaich kūön alaha ò, ṙāten e chū-ö min nö i panam re, nö ūlö e iyöng in e inrē, ṙô ngam Mā Tēv.

¹²Löö in Sētikiā öp rācha aṅ Yūtā öich ngatī ṙô ngaich: Kētö likeun re man elkatòh ngam kaneun ngam rācha aṅ Pēpilön, kūön alaha ò tö yip tarik ò inrē, ngaich höngngöh.

¹³Kūöyòh ṙöng öi min kapah tö yip tarik meh inrē tökūö sanët, kūö inyāichö, kūö invah tölëngökūö inrē, sā ṙô ngam Mā Tēv nö ngaich tö inlahen öp pumnāmö tarik öp tösōḵ nö kūön alaha ap rācha aṅ Pēpilön?

¹⁴Uh yin hang ṙô yip pròfĕt yip tö ngö ṙô tö yīö, Hö-ö yin hō kūön alaha ap rācha aṅ Pēpilön, tön minyôiny-aṅ angū-ö ngam ṙô cha nö in yīö.

¹⁵Hö-ö chin chū-ö tīnten cha, ṙô ngam Mā Tēv, minyôiny-aṅ ṙô pöri cha-a nö i minë-eny chu, töp lökten chu ahōnyen yīö ngaich lëlngö min yī-ö, yī-ö tö yip pròfĕt yip vamë-eny nö in yīö.

¹⁶Ngaich vë-ekūö yip kūönṙô chū-ö tö yik tarik inrē nö ṙòkhöre, öich ngö ṙô, Ngö ṙô An ngam Mā Tēv: Uh yin hang nup ṙô yip pròfĕt yīö yip vamë-eny nö in yīö nö ngö ṙô, Yĕh meuk ngaich nup min chūökṙen aṅ ngam patī ngam Mā Tēv nö öt rô-òtuṙen nö havantu nö ṙā-ang Pēpilön, tön minyôiny-aṅ an angū-ö ngam vahë-eny cha nö in yīö.

¹⁷Uh yin hagṙô cha; kūön alaha ap rācha yin aṅ Pēpilön ngaich höngngöh. Kūöyòh ṙöng öng min ngih elpanam nö ahātiṙen?

¹⁸Yē cha nö pròfĕt, ane inrē yē ngam ṙô ngam Mā Tēv nö in cha, ngaich hökngen cha nö vë-el-kui nö im Mā Tēv yip tömaṙôngö, hòṅ nup chūökṙen nup tö ōtren nö el patī ngam Mā Tēv, el patī ap rācha aṅ Yūtā inrē, i Yērusalem inrē hòṅ u nö öt chuh Pēpilön.

¹⁹Tön ngö ṙô an ngam Mā Tēv yip tömaṙôngö tö inlahen nup machööḵlö, ap mai, nup tanööngö, nup chööḵṙen nup chūökṙen nup tö-ōtre nö i ngih elpanam,

²⁰nup tötkē-ĕ tö Nēpukatnēsar rācha aṅ Pēpilön, hē ò nö kēngen Yakôniah ök kikōnyö kūön Yēhoyakim rācha aṅ Yūtā, ṙòkhöre inrē yik mā i Yūtā Yērusalem inrē nö ahötiyö nö ṙā-ang Yērusalem nö i Pēpilön

²¹Ngö ṙô an ngam Mā Tēv yip tömaṙôgö, ngam Tēv Israel, tö inlahen nup chūökṙen nup tö ōtren el patī ngam Mā Tēv, el patī ap rācha aṅ Yūtā, i Yērusalem inrē:

²²Kē-ĕyö nup min nö i Pēpilön nö umuh hanöngen öp sakāmö hē chu fēken u, ṙô ngam Mā Tēv. Ngaich möl chū-ö hēk kēten u havanten u inrē nö i ngih chūökö.