Read Car_Nicobarese YERIMIĀ 28 Bible Online

YERIMIĀ 28 - Car_Nicobarese bible

YERIMIĀ 28

¹Im hē e angū-ö samyeūheu, i ranehten Sētikia rācha aṅ Yūtā nö hayöng, im tinneūyö chingëṅt im finënö samyeūheu, Hānania ök kikōnyö kūön Assör, ök pròfĕt aṅ Kīpiön, nö vë-ekūö chu nö el patī ngam Mā Tēv, i kūö yik kūönṙô yik tarik inrē nö ṙòkhöre, nö ngö ṙô,

²Ngö ṙô an ngam Mā Tēv yip tömaṙôngö, ngam Tēv Israel: Ngaich tī chin likölngö ök kaneun aṅ ip rācha aṅ Pēpilön.

³I ël tönët samyeūheu chin min havantö nup chūökṙen aṅ el patī ngam Mā Tēv i ngih chūökö, nup tökē-ĕyö nö ṙā-ang i ngih chūökö nö halāyi nö i Pēpilön tö Nēpukatnēsar rācha aṅ Pēpilön.

⁴Kēten Yekôniah chin min inrē i ngih chūökö öp kikōnyö kūön Yehōyakim, rācha aṅ Yūtā ṙòkhöre inrē yip tö-ahöti nö ṙā-ang Yūtā yik tö ngaich nö chuh Pēpilön, ṙô ngam Mā Tēv, pò chu min likölngö öp kaneun aṅ in ap rācha aṅ Pēpilön.

⁵Ngaich ök pròfĕt Yarimiā nö vë-ekūö Hanania öp pròfĕt nö i kūö yip kūönṙô i kūö yik tarik inrē nö ṙòkhöre töng sökhakaṙen nö el patī ngam Mā Tēv:

⁶Ngaich ngö ṙô ök pròfĕt Yarimiā Āmen! Ngatī tī an yēḵ ṙô ngam Mā Tēv; vīten nup ṙô an yēḵ ngam Mā Tēv nö teungtökūö nup vahë-eny meh, kēten nup chūökṙen aṅ el patī ngam Mā Tēv nö havantu nö i ngih chūökö nö ṙā-ang Pēpilön yip tö-ahötiyö inrē.

⁷Sönen yēḵ hang ngih ṙô ngih ṙô chu öich hāngô tö yīö ngih ṙòkhöre.

⁸Yip pròfĕt mu-urēhĕkūö meh urēhĕkūö chu inrē löktökūö misī nö vë-eny kinyūngö, inyāichö, invah tölëlngökūö nö ṙōlkang chūök tö nup panam tökiröng pūlngö inrē.

⁹Ngaich ngòh pöri pròfĕt ngòh vame-eny lanāmö yēḵ, ngam ṙô ngam pròfĕt nö teūngtökūö, ngaich akahalōn min tö e tö ngam Mā Tēv nö kô-en nö tīnten ngam pròfĕt.

¹⁰Ngaich ök pròfĕt Hanānia nö kēngö ök keneun nö ṙā-ang i likeun ök pròfĕt Yerimiā, ngaich likölngö u.

¹¹Ngaich i kūö yik tarik nö ṙòkhöre ang Hanānia nö ṙô-òv, nö ngö ṙô, Ngö ṙô an ngam Mā Tēv: Ngatī tī chin min likölngö ap kaneun aṅ in Nēpukatnēsar rācha aṅ Pēpilön nö ṙā-ang i likeun yip pumnāmö tarik i ël tönët samyeūheu. Kiröönngöre pöri ngaich ök pròfĕt Yarimiā.

¹²Rĕh rô-angen ök pròfĕt Hanāniā nö likölngö nuk keneun nö ṙā-ang i likeun ök pròfĕt Yarimiā, yih ngaich ngam ṙô ngam Mā Tēv nö in Yarimiā:

¹³Kuṙòh, ve-eny nang Hanānia, ngö ṙô ngam Mā Tēv: Höng likölngö chōn man kālkūö, i chūök u pöri min chū-ö vīlö vët nö kālkūö.

¹⁴Pòn ngö ṙô ngam Mā Tēv yip tömaṙôngö, ngam Tēv Israel; Hakeunlö likeun yip pumnāmö tarik chin tö vët kaneun inkövö in Nēpukatnēsar rācha aṅ Pēpilön, ngaich cha-a min nö kūön alaha ò, pò chu kē-ĕkūö ò tö në töṙeūla el ngam kahôyö inrē,

¹⁵Ngaich ngö ṙô ök pròfĕt Yerimiā tö ök pròfĕt Hananiā, Hang man, Hananiā, Hö-ö an ngam Mā Tēv nö tīnten meh, ngaich man vīten vē tarik nö hayönglenre nö i minyôiny-aṅ.

¹⁶Lökten an ngam Mā Tēv nö ngö ṙô: Yĕh meuk, kēngen meh chin min ṙā-ang i kūö ngih tumlat, Kapah man min i ngih samyeūheu, pò meh ṙôtö inhôngen ök lā-al ngam Mā Tēv.

¹⁷Ngaich im angū-ö samyeūheu, im sinātö chingëṅt, ök pròfĕt Hanaiā nö kapah.