Read Car_Nicobarese YERIMIĀ 29 Bible Online

YERIMIĀ 29 - Car_Nicobarese bible

YERIMIĀ 29

¹Në nun ṙô ök tökuichö līpöre ök sahöömngö ök pròfĕt Yarimiā nö ṙā-ang Yērusalem nö in yik mā tö-ahötiyö, in yik kūönṙô inrē, in yik pròfĕt, yik tarik inrē nö ṙòkhöre, yik tökē-ĕyö tö Nēpukatnēsar nö ahötī nö ṙā-ang Yērusalem nö i Pēpilön.

²Unôichrit ök Rācha Yakôniā an angū-ö, tök rāni yöngnyīö tö yik kumkantöre, tö yik kūön rācha aṅ Yūtā Yērusalem inrē, tö yik tarik vamī chehen, yik ramöm vët inrē tö ngaich nö ṙā-ang Yērusalem.

³Löktö elti Ĕlāsah ök līpöre tökūichö nö söömi ök kikōnyö kūön Safān Kemarīa inrē ök kikōnyö Hilkia, ök tötīni tö Sētikia rācha aṅ Yūtā nö i Pēpilön in Nēpukatnāsar rācha aṅ Pēpilön. Ngö ṙô angū-ö:

⁴Ngö ṙô an ngam Mā Tēv yip tömaṙôngö, ngam Tēv Israel, nö in yip tö-ahöti nö ṙòkhöre yip tahīnngö chu nö ahötī nö ṙā-ang Yērusalem nö i Pēpilön;

⁵Mānlö patī yin iyöng ël u inrē; teūichtö aṅ panô-òṅ nyā nup aṅ u inrē.

⁶Kē pīhöre hakūöntö nyīö kikōnyö kikānö inrē; kē pīhö yip kūön re kikōnyö, kēngö yip kūön re kikānö inrē nö hapīhö, hòṅ cha nö kūönu tö kikōnyö kikānö inrē; ṙūöhöl ṙôken re umuh, ui hakūönngöre.

⁷Chöh kanôlò ap elpanam ap chūök yīö tīni tö chu öi ahöti, vë-elkui e inrē im Mā Tēv, tön ip kanôlò e yin min kôtökūö tö kanôlòre.

⁸Tön ngö ṙô an ngam Mā Tēv yip tömaṙôngö, ngam Tēv Israel: Un hökiṙen yip pròfĕt yīö tö yip chamòng alaha in yīö inrē nö hachīlö yīö, un hāngö ṙô nup heūvö aheūv cha.

⁹Tön minyôiny-aṅ an ngam ṙô cha tö yīö nö i minë-eny chu; hö-ö chin tīnten cha, ṙô ngam Mā Tēv.

¹⁰Pòn ngö ṙô ngam Mā Tēv: Yĕn keuheūten nup tösat anāi samyeūheu nö in Pēpilön, chöhken yīö chū-ö min, ngaich hateungngö ngam kinlēḵngôre in yīö öich kēten yīö hēk i ngih chūökö.

¹¹Pò chu akahalōn töp töhalēniṙen in yīö tö chu, ṙô ngam Mā Tēv, inlēnlö tökôlò rö-ö nö tötlöök, öich kē-ĕkūö yīö tö lamā unôich mineūka inrē.

¹²Ngaich yī-ö min havëken chu yih inrē ngaich vë-ekūö chu, ngaich hangṙô yīö chū-ö min.

¹³Chöhö chu yin min ngaich kôtökūö tö chu; yē yīö holtö ellōn re chöhö chu,

¹⁴Kôti chin min tö tī yīö, ṙô ngam Mā Tēv, ngaich chū-ö min havantö nup kanôlò yīö, hamūlö yīö inrē löktökūö i yip pumnāmö tarik keuheūtngöre chūök i chūök tī chu ahōngen yīö, ṙô ngam Mā Tēv, ngaich chū-ö min kēten yīö hēk ip chūökö ṙeūngö yīö tīniyö tö chu öi ahöti.

¹⁵Pò yīö ngö ṙô, Hachohlö pròfĕt an ngam Mā Tēv nö in ih i Pēpilön,

¹⁶Ngö ṙô an ngam Mā Tēv tö inlahen ap rācha ap amūichhaka nö el kantēra Tāvit, inlahen yip tarik inrē yip mī-iyöng nö ël ngih elpanam, yip mak alaha meh yip tötkumröönngöre nö hol meh nö ahötiyö:

¹⁷Ngö ṙô an ngam Mā Tēv yip tömaṙôngö, Yĕh meuk, tīntö kui cha chin tö sanët, inyāichö, invah tölëngökūö inrē, vīten cha chin min inrē nö sā tötkôlò anychīr nup töchahū-uyö töt nyanā-en tö cha.

¹⁸Lū-u cha chin min aṅtī tö sanët, inyāichö, invah tölëlngökūö inrē, ngaich vīten cha chū-ö min nö pinhe-eṅkūö nup pūlngö ngam panam, rinūtngen, töyahlö nö pinhe-eṅ-kūö töhīsiyö, minṙēngö inrē in vē pumnāmö tarik chūök tī chu ahōngen cha,

¹⁹Pò cha nö öt kūöngenre tö minë ṙô chu, ṙô ngam Mā Tēv, nup töt ṙāka sinöömti nö in yīö tö yip tarik chu pròfĕt, sōḵ pöri yī-ö hang, ṙô ngam Mā Tēv.

²⁰Hang ngih ṙô ngam Mā Tēv, ṙòkhöre yī-ö tö-ahöti tahīnngö chu ṙā-ang Yērusalem öi i Pēpilön:

²¹Ngö ṙô an ngam Mā Tēv yip tömaṙôngö, ngam Tēv Israel, tö inlahen Ahap ök kikōnyö kūön Kōlayā. Sētikiā inrē ök kikōnyö kūön Ma-asāya, vamë-eny minyôiny-aṅ nö in yīö nö i minë-eny chu: Yĕh meuk, kēten cha chin min eltī Nēpukatnēsar rācha aṅ Pēpilön, ngaich anga-aṅ min nö fëlngen cha nö hameukhömat yīö.

²²Kūö cha ngih öt linëkô min nö kakka tö yip tö-ahöti nö ṙā-ang Yūtā nö i Pēpilön: Vītuṙen man min tö ngam Mā Tēv sā Sētikiā Ahap inrē, nak töharāngö nö i kūö tameūyö tök rācha aṅ Pēpilön,

²³Pò cha nö kēken kumlō-ov nö i Israel, asĕha nap nö i pīhö holre, ṙô-òv inrē cha-a nö i minë-eny chu töminyôny-aṅ nup töt tinölô cha tö chu. Höng chū-ö chin tö-akahalōn, chū-ö inrē mameuk, ṙô ngam Mā Tēv.

²⁴Löö in Sēmayā öp aṅ Nemelam ngö ṙô me-eṅ:

²⁵Ngö ṙô an ngam Mā Tēv yip tömaṙôngö, ngam Tēv Israel: ngaich man Söömngö nuk tökūichö līpöre i minë-enyre in yip tarik nö ṙòkhöre mi-i Yērusalem, in Safaniā inrē öp kikōnyö kūön Ma-asayā ap kūönṙô, in yip kūönṙô inrē nö ṙòkhöre, ngö ṙô,

²⁶Vīlöng man tö ngam Mā Tēv öm kūönṙô ṙënngen Yēhōyatā ök kūönṙô, öm hayōm ngih patī ngam Mā Tēv öm lātulöng tö yip tökatūöyaṙen tarik yip vamë-eny, nö hōten ò nö halökhötvö halöki likeun inrē.

²⁷Sitih öm töngamuh öt vëken Yarimiā öp aṅ Anatòt öp vamë-eny nö in meh?

²⁸Pò ò yih nö söömhöti nö in hī i Pēpilön, nö ngö ṙô, Marô-òten an min ngam inhatngö yīö; mānlö patī re yin ngaich iyöng ël u, teūichtö aṅ panô-òṅ re yin ngaich nyā-aṅvkūö tö nup aṅ u.

²⁹Vë-ekūö ök tökūichö līpöre ang Safaniā ök kūöṅṙô nö hāngöṙô tö Yarimiā ök pròfĕt.

³⁰Ngaich yih ngam ṙô ngam Mā Tēv nö in Yarimia:

³¹Löö in yip tö tö-ahötī nö ṙòkhöre söömhöti, ngö ṙô, Ngö ṙô an ngam Mā Tēv tö inlahen Sēmayā öp aṅ Nëhelam: Pò Semayā nö vë-eny nö in yīö yē ò nö öt tīni tö chu, ngaich vīten yīö hayönglen re i minyôiny-aṅ,

³²Lökten an ngam Mā Tēv nö ngö ṙô: Yĕh meuk, sācha tī chin min tö Sēmayā öp Nehelam tö yik kūön ò inrē; öt hĕng tak aṅ in öp min tö tö-aṅ nö in vē tarik nö meuk nup tölöök tī chu min in vē tarik chu, ṙô ngam Mā Tēv, pò ò nö ṙô tö inhôngen nö lā-al ngam mā Tēv.