Read Car_Nicobarese YERIMIĀ 30 Bible Online

YERIMIĀ 30 - Car_Nicobarese bible

YERIMIĀ 30

¹Yih ngam ṙô nö in Yarimiā nö ṙā-ang im Mā Tēv:

²Ngö ṙô an ngam Mā Tēv ngam Tēv Israel: Kūich nup ṙô nö ṙòkhöre nö i mat līpöre nup ṙô chu in meh.

³Yĕh meuk, pò nup sakāmö nö yih, ṙô ngam Mā Tēv hē chu min havantö nup kanôlò vē tarik chu, Israel Yūtā inrē, ṙô ngam Mā Tēv, ngaich chū-ö min havanten cha ip panam kahëtö chu nö in yik yöng cha, ngaich cha-a min nö kē-ĕ e nö amin re.

⁴Në ṙô ngam Mā Tēv inlahen Israel Yūtā inrē:

⁵Ngö ṙô an ngam Mā Tēv, Hangṙô öp pinhë-eṅkūö in, pinhë-eṅkūö, rö-ö nö lanāmö.

⁶Hatön töngamuh, ngëicha inrē, kô ang ngòh kikōnyö nö kayôḵnyö nyīö? Asuh ṙöng ap maheuk chu i vē tarik nö kö tipṙat re sā inlahen kikānö kamyôḵ? Kūöyòh ön minë kūö nö vī-ingre nö lunyī?

⁷Aōla! Kiröng ap angū-ö sakāmö öt asā-av ap; ṙētak kanihngen ap nö in Yāköp; sön anga-aṅ min nö ṙa-ang in e nö hayöökaṙen.

⁸Ngaich ngö inlahen min angū-ö ip sakāmö angū-ö, ṙô ngam Mā Tēv yip tömaṙôngö, tö chu min likölngö ap kaneun ṙā-ang i likeun cha, litòknyö nup nyanëk cha min inrē, ngaich öt sāre min yip aṅ tahëng nö vīten cha nö kūön alahare.

⁹Lök la-en ngam Mā Tēv pöri min cha-a ngam rācha cha inrē Tāvit, ap hachohlö chu min nö in cha.

¹⁰Ngaich ui pa-ekūö, Ō Yāköp tarik chu, ṙô ngam Mā Tēv, Ui rēhĕn ngangngökūö, Ō Israel; yĕh meuk, hayööken yīö chin min ṙā-ang i tömarôvat, yip kūön yīö inrē ṙā-ang im panam chūök inkövö cha. Havantöre öp min Yāköp ngaich chēvhakṙen öt pinhë-eṅvkūö inrē, öt hĕng tak min pumnëken cha.

¹¹Pò chu in yīö öich hayööken yīö, ṙô ngam Mā Tēv; keuheūtngörit yip pumnāmö tarik chin min yip chūök yīö pirātiyö tö chu, hö-ö pöri yī-ö keuheūtirit tö chu. Chökṙen yīö chin min öich löökö tī, öthō min inrē ṙāngen yīö öi öt sācha.

¹²Pòn ngö ṙô ngam Mā Tēv: Öt hanlinken an ngam pinlāngen meh, pōyen ngam nyaha meh inrē.

¹³Ōt hĕng tak mahalātöre nö in meh, öt lane-evṙen an ngam nyāha meh, hö-ö man inpētu vah.

¹⁴Ṙòkhöre yik töhāngenlōn tö meh nö vaichngen meh; hö-ö yip nö kūö tenre tö meh: pò chu sā tī tökunyah elmat öich in meh, sā sācha öp töt aṙē-ĕlōn tökunyaha elmat, pò ngam fālen meh nö kiröng, kūö minë tökööl meh nö pachāla elmat.

¹⁵Kūöyòh öm peuiny pinlāngenre? Öt lane-evṙen ap chanökö meh. Pò ngam fālen meh nö kiröng pò minë tökööl meh nö pachāla elmat, öich ngatī tī tö në in meh.

¹⁶Lökten yip kamāngen meh min nö kā-ayö, ṙòkhöre inrē yip lā-al meh, kö i tumtak cha min nö chuh el inkövö; cha-a yip maha-āichngen meh min nö ha-āichiṙen, ṙòkhöre yip kamāngen meh min inrē nö vītuṙen nö kā-ayö.

¹⁷Pò chu min havantö lanööken in meh, hapēt nup nyaha meh chin min inrē, ṙô ngam Mā Tēv, pò cha nö havëken meh aṅ el kahôyö: Ngam Sīyôn an, töt hakūökaṙen tö töhĕng tak!

¹⁸Ngö ṙô an ngam Mā Tēv: Yĕh meuk havantö nup kanôlò nup rūkui Yāköp chin min aṙē-ĕvlōn inrē tö nup elyöngö ò; mānlöng an ngam elpanam min nö hēk nö i kui ngam rung e, ap patī rācha min inrē nö sökhaka nö ip töha-eh chūökre.

¹⁹Löknyö in u min nup nöinyö tinkökö, nup ṙô yip vamī ṙānāmölōn inrē. Ṙūölö ṙôngö cha chin min, hö-ö yip min nö kūöṅnen; vīten cha chin min nö eū-eu, hö-ö yip min nö kūöṅnö.

²⁰Sā re tö misī min yip kūön cha, i kūö chu min yip ṙôngö cha inrē nö köp; sācha tī chin min inrē tö yip mahakihten cha.

²¹In cha min ap kūön rācha, löknyö el ṙôngö cha min nö yih öp mahayöngö cha; vīten ò chin min nö haröhtöre, ngaich yihtöre anga-aṅ min nö in chu, achīö ap tökô nö yihtöre nö in chu? ṙô ngam Mā Tēv.

²²Ngaich yī-ö min tarik chu, ngaich chū-ö min Tēv yīö.

²³Yĕh meuk, ngam chanôich panam an im Mā Tēv! Kiröönngöre ök nö ngaich lanīnö, öp töchavīṙa chanôchö panam; larukköṅny kūö ap min nö i kui tötlöök.

²⁴Öt havanritre an min ngam tökiröng tanānyö ngam Mā Tēv hanöng saha ò nö hateungngö nup lōn kuilōn ò. Akaha elmat man min i nup lā-unôich sakāmö tö e.