Read Car_Nicobarese YERIMIĀ 31 Bible Online

YERIMIĀ 31 - Car_Nicobarese bible

YERIMIĀ 31

¹Hē e, ṙô ngam Mā Tēv, öich Tēv taṙòkhöre mupīhö Israel min ngaich cha-a min nö tarik chu.

²Ngö ṙô an ngam Mā Tēv: Yip tarik töt kô-òngvah tökūö sanët kôtökūö tö inkôlò nö el inchōn; Israel, nö chöh haneūheu.

³Meūkö ngam Mā Tēv tö ò nö marôvat, hāngenlōn chin tö meh tö ngam töt chanūhuvṙen hanāngenlōn, lökten öich iṙuhen tö ngam kanô-en chu in Meh.

⁴Hēk chin min mānlen meh, ngaich me-eṅ min mānlöngö, Ō rēlö aṅ Israel! Ngaich hēk min me-eṅ hanyöṅtöre tö timpröl, ngaich kiröönngöre min me-eṅ i kinṙīömö in yip vamī ṙanāmölōn.

⁵Hēk min me-eṅ teūich panô-òṅ vāin i kui minë rôngö Samariā; teūichhöti min yip tameūch, ngaich cha-a min nö kumchikngen re tö nup ṙòng.

⁶Pòn sakāmö min öp umuh hē yip amahati min nö hū-a nö i kui rung panam Ifrēm: Chōholre, töi kiröönngöre chuh Sīyôn, im Mā Tēv ngam Tēv hī.

⁷Tön ngö ṙô an ngam Mā Tēv: Pōitô tikökṙôre holtö ṙanāmölōn re in Yāköp, ṙūölö ṙôktôre in öp mākūö pumnāmö tarik; ahānga, ha-öiny, ngö ṙô inrē, Hayööken vē tarik re an ngam Mā Tēv, yip chööḵṙen Israel.

⁸Yĕh meuk, kēten cha chin min nö ṙeū-eung im lā kapā panam, hamūlö cha inrē nö ṙeū-eung im tömarôvat alaha ngam tumlat, in cha yip tötmeuk tö karòk inrē, kikānö puyōsö anga-aṅ inrē öp mahalöiyöre nö hòṅ kayôḵ, nö hol re; maṙôngö, cha-a min nö havan nö i hih.

⁹Yih yip min nö holtö pineūnyö, holtö inṙamlōn inrē min chū-ö hachōḵten, cha hēk, vīten cha chin min nö lök ël töhëm mak, ip töchip talöökö ël e min cha-a nö öt kavē-ĕre; pò chu öich yöng Israel, Ifrēm inrē lanòh nö kūon chu.

¹⁰Hang ngam ṙô ngam Mā Tēv, Ō yī-ö pumnāmö tarik, ve-eny e inrē i nup tömarôvat lākūö mai panam; ngö ṙô, Anga-aṅ ngam pumrātngen Israel hamūlan min, sā yōm pököre min anga-aṅ nö aṅten ò.

¹¹Pò ngam Mā Tēv nö ngaich nö havaha Yāköp, ṙānyen ò inrē ṙā-ang eltī öp töyahlö kumlēḵ tö ò.

¹²Yih yip min ngaich pōitô nö tiköṙôre nö i kui rung Sīyôn, yanghukūö yip min inrē tö lanöökö ngam Mā Tēv, i kui nup sāiny, vāin, tavī-i inre, i kui tö-ayal inrē pököre sīṅp inrē öp nômö cha min nö sā panô-òṅ töṙösö, hö-ö yip min inrē nö lëvngö.

¹³Ngaich min yip kikānö nö ṙāmölōn nö i kinṙīömö, yip ṙāl tarik inrē tö yip tököiny min nö haṙamlōn, Havāngtö öp miṙivlōn cha chin min nö ṙanāmölōn, haṙamlōn cha chin min, kētö ṙanāmölōn cha inrē nö ṙëngen miṙivlōn.

¹⁴Hā-aṅlö nômö yip kūönṙô chin min tö töpōyen, tööḵngen min inrē yip tarik chu tö lanöökö chu, ṙô ngam Mā Tēv.

¹⁵Ngö ṙô an ngam Mā Tēv: Hĕng öp ṙô i Rāma töhangö, inrāmöre pineūnyö inrē tökalēḵ. Peuiny öp Rākēl tö kūö yik kūön ò; sōḵ apa nö haṙāmölōn tökūö yik kūön re, pò cha nö rö-övö.

¹⁶Ngö ṙô an ngam Mā Tēv: Ṙāngôre man peuiny, ṙāngö makmat re inrē i mat re; tön reushu ap min la-en meh, ṙô ngam Mā Tēv, ngaich cha-a min nö havantöre nö ṙā-ang i panam yip tökunyaha elmat.

¹⁷Maheūkku man ip lā-unôich, ṙô ngam Mā Tēv, ngaich yip kūön meh min nö havantöre nö im panam cha.

¹⁸Hang ṙô Ifrēm chin nö peuiny miṙivlōn re, Chöken chin ngaich tö meh, ngaich öich chöken, sā öp kun nuā tö-öl nö harūnö; havanten chu hēk hòṅ chu halööktuṙen, tön me-eṅ Man Mā Tēv öm Tēv chu.

¹⁹Pò chu ṙā-al ellōn re unôichrit chu havööngökūöre; unôichrit chu inrē haköptuvö, fatah ṙòng takeunre chū-ö; sirōngkūö chū-ö ngaich, kalūöchöre elkui inrē, pò chu īnu tö minṙēngö inyālöre.

²⁰Hanāngenlōn ang Ifrēm nö kūön chu? Tölngö hanāngenlōn chu ang nö nyīö? Pò chu i tum heuh chu lā-alkūö ò, ṙòngmöng köpölōn chū-ö tö ò. Lökten ap ellōn chu nö meūkkenre nö in ò; kô-en chin min aṙē-ĕlōn tö ò, ṙô ngam Mā Tēv.

²¹Asöklö nup minkahngö talöököre man, vītö nup minkahngö inchōkūö man; ngëichkö ngam tökiröng talöökö milētmat, ngam talöökö lökngö meh ngaich kiröönngöre, Ō rēlö Israel, havan man, havantöre i në elpanam meh.

²²Irô-òten öm min katöngaṙen, Ō me-eṅ kikānö kūön tötkô-en? Pò ngam Mā Tēv nö vīlö tufömngöre nö im tumlat: aṅtö kikōnyö an ngam kikānö.

²³Ngö ṙô an ngam Mā Tēv yip tömaṙôngö, ngam Tēv Israel: Hĕng töre heuh yip min nö ṙôtö në ṙô nö i panam Yūtā el nup elpanam e inrē, hē chu halöökten nup kanôlò cha: Hakôlò meh an ngam Mā Tēv, me-eṅ an im lanöökö, Ō töhet rung!

²⁴Holre min tö Yūtā tö nup elpanam e inrē nö iyöng nö mūl,tö yip tameūch, tö yip mahavöt nö holtö nup sīṅp re inrē.

²⁵Pò chu min hatööḵngen töcheingö, hatööḵlöngö inrē yip tölëvngö ellōn.

²⁶Hē e chū-ö ngaich aṅhen, ngaich ngëicha, kuchik inrē ngam inṙôhò nö in chu.

²⁷Yĕh meuk, yih nup sakāmö, ṙô ngam Mā Tēv, hē chu min teūichtö el patī Israel el patī Yūtā inrē tö kulöl tarik kulöl töṙeūla inrē.

²⁸Ngaich ngö inlahen min angū-ö hē chu aṅten cha öich teukhölö likölhanga inrē, kavalhanga, tiṙōlhanga, kētö tötlöök inrē, ngatī chū-ö min aṅten cha öich mānhölö teūichhöti inrē, ṙô ngam Mā Tēv.

²⁹I nup sakāmö anū-ö min cha-a nö öt ngöhöre ṙô nö ngö: Nyā angkūr yik yöng ih töhikīölhu, ngaich yik kūön nö hikīölhu kui kanap.

³⁰Kö kapah pöri min tökūö tökööl re; öp tarik nyamā angkūr töhikīölhu, hikīöhu kui min nup kanap ò.

³¹Yĕh meuk, yih nup sakāmö ṙô ngam Mā Tēv, hē chu min vī tufömngöre kinlēḵngô i patī Yūtā inrē,

³²Öt sā ngam kinlēḵngô tī chu in yik yöng cha hē chu sarōk kël cha öich kēnyen cha ṙā-ang ip panam Aikup, ngam kinlēḵngô chu töfilāli tö cha, pòrô chū-ö öich pīhö cha, ṙô ngam Mā Tēv.

³³Ngih pöri kinlēḵngô tövī-i tö chu i patī Israel unôichrit nup sakāmö, ṙô ngam Mā Tēv: Ellōn cha tī chin min chaphöt ngam chöngöre kūchhöt e chin min nö ellōn cha; ngaich chū-ö min Tēv cha, ngaich cha-a min nö tarik chu.

³⁴Öt ngöhöre ṙô min tarik nö kö haköptö holre, mak alaha re inrē, nö ngö ṙô, Akahakūö yin tö ngam Mā Tēv, pò cha min nö akahakūö tö chu, löktökūö in yip tökūöṅnö tö cha söl i tökiröng, ṙô ngam Mā Tēv; pò chu min aṙēlö nup tökööl fālen cha, ane inrē öt köpölōn min chū-ö tö tökööl cha öich hēk.

³⁵Ngö ṙô an ngam Mā Tēv, ngam kamëtö ngam tavūöi nö ëāṅvö tö sakāmö ane inrē ngam tököp chöngö ngam chingëṅt tö minë taneūsömat nö ëāṅvö ngam hatööm, ngam pumyavlö ngam mai lökten nup mahūvö e nö ṙënuṙô-Mā Tēv yip tömaṙôngö an ngam minë-eny ò:

³⁶Yē ngih töhaköpi chöngö nö kē-ĕngre nö ṙā-ang i kūö chu, ṙô ngam Mā Tēv, ngaich yip kūön Israel min nö ṙāngenre nö pumnāmö tarik nö ṙā-ang i kūö chu nö örheūheu.

³⁷Ngö ṙô an ngam Mā Tēv: Yē minë halīöngö öre lātulöng nö kô nö kalaha ṙôkö, ane inrē nup röönti ngam tumlat lātaṙeū nö chanööhen, ngaich chū-ö min kavalngö yip kūön Israel nö ṙòkhöre tökūö nup fālen cha, ṙô ngam Mā Tēv.

³⁸Yĕh meuk, yih nup sakāmö ṙô ngam Mā Tēv hē ngam elpanam min nö mānlöngo nö chūök ngam Mā Tēv löktökūö im Hanānel ngam chūök chamônga söl im Inkūp i Sinkeukngö.

³⁹Ngaich öp tökuvaha kinlaha rôta min nö vāngnyikūö, chipta nö im rung Kārĕp, havöötu kūö inrē min nö i Kō-ah.

⁴⁰Keuheūtlöre ngam achāṙö chūök kupah tö nup tisum, ṙòkhöre inrē minë töngāṅ nö tölngö im kun töhëm mak Kitròn, söl im sinkeungö ngam Inkūp Kōra kū-ö tö lā chuhöt, nö töhet min nö im Mā Tēv. Öt hēka min nö teuklöng hēk öt tiṙōliyö, höng örheūheu.