Read Car_Nicobarese YERIMIĀ 32 Bible Online

YERIMIĀ 32 - Car_Nicobarese bible

YERIMIĀ 32

¹Ngam ṙô yamih nö in Yarimiā nö ṙeū-eung im Mā Tēv ik sinöm samyeūheu Sētikiā rācha aṅ Yūtā ngam hinëvhöt sīön samyeūheu Nēpukatnēsar.

²Hē e yik kumyung aṅ in öp rācha Pēpilön nö havīlen Yērusalem, öpikūö inrē ök pròfĕt Yaremiā nö el ök chūök amahti el chūök amahati ök el patī ök rācha aṅ Yūtā.

³Pò Sētīkiā ök rācha aṅ Yūtā nö kalong höt ò,nö ngö ṙô, Kūöyòh ömeh ve-eny öm ngö ṙô, Ngö ṙô an ngam Mā Tēv: Yĕh meuk kētö ngih elpanem chin eltī öp rācha aṅ Pēpilön, ngaich anga-aṅ min nö kē-ĕ e;

⁴Hö-ö öp min Sētikiā rācha aṅ Yūtā nö hōḵ nö öt kô-òngvah nö rā-ang eltī yip aṅ Kālti, kô-òngvah pöri min nö kētu nö eltī ap rācha aṅ Pēpilön, ngaich vë-ekūö ò min nö havööhenhökūö meūkan inrē nö havööhenhökūö mat;

⁵Ngaich anga-aṅ min nö kēngen Sētikiā nö i Pēpilön, ngaich in e anga-aṅ min hanöng saha chu chöhken ò, ṙô ngam Mā Tēv; pòrô yī-ö min kiyung lā-al yip aṅ Kālti, öthō yī-ö kiyung lā-al yip aṅ Kālti, öthō yī-ö min kô?

⁶Ngaich ngö ṙö Yarimiā, Yih an ngam ṙô ngam Mā Tēv nö in chu:

⁷Yĕh meuk, yih ap min Hanāmel öp kikōnyö kūön Salūm kōinyyöng meh nö in meh nö ngö ṙô, Havah ap panô-òṅ chu man öp i Anatòt, öm me-eṅ mahavah e hòṅ chu huveū-en havānö e nö ṙāyu invānö.

⁸Ngaich ang Hanāmel kūön hol mameukyöng chu, nö yihtöre nö in chu nö el patī amahāti, nö asā ök ṙô ngam Mā Tēv, ngaich ngö ṙô tö chu, Havah ap panô-òṅ chu man i Anatòt i panam Penyamin tön me-eṅ man tö rònglen amīnu tö e tö invānö invaha e inrē; havah e nö me-eṅ meh. Ngaich akahlōn chū-ö tö e nö ṙô ngam Mā Tēv.

⁹Ngaich chū-ö havah ök panô-òn i Anatòt nö ṙā-ang in Hanāmel ök kūön hanöng kisānö yöng chu, ngaich kala lumngan nuk rupīö tökētu nö in ò, sat sīön siköl nuk nö rupīö.

¹⁰Kūich tö minë-enyre chū-ö ngaich ik kinlēḵngô, ngaich hapanngökūö e, kē mameuk, ngaich kalah lumngan nuk rupīö nö el chūök kinlaha.

¹¹Ngaich chū-ö kē ök tö hapantu mat kinlēḵngô vine-eny invaha e, tö-aṅhav mat tö nup tökūichi inlahen invah ngö e, tö ök töt öpikūö insā mat e;

¹²Ngaich chū-ö kētök kinlēḵngô invaha in Pārök ök kikōnyö kūön Nērīyā ök kikōnyö kūön Maasāya, i kūö Hanāmel ök kūön hanöng kisānö yöng chu, i kūö yik mameuk yik kamūich tö minë-eyre nö i mat ök kinlēḵngô invaha, I kūö yik Yahūti inrē nö ṙòkhöre yik amūichhaka nö el ök chūök amahati.

¹³Ngaich kētö chöngö Pārök chū-ö i kūö cha, öich ngö ṙô,

¹⁴Ngö ṙô an ngam Mā Tēv yip tömaṙôgö, ngam Tēv Israel: Kē në kinlēḵngô invaha tö ngih töthapānikūö inrē chaphöt u el hanrī, hòṅ u nö marô-òten nö ngöh.

¹⁵Tön ngö ṙô an ngam Mā Tēv yip tömaṙôngö, ngam Tēv Israel: Patī, panô-òṅ, panô-òṅ vāin inrē min nö hēk nö havaha nö i ngih panam.

¹⁶Unôichrit tī chu kētö ök kinlēḵngô invahal in Pārök ök kikōnyö kūön Nērīya, Vē-ekūö ngam Mā Tēv chū-ö ngaich, öich ngö ṙô:

¹⁷Mah Mā Tēv! Me-eṅ Man vamīlö minë halīöngö tumlat inrē lökten im yöng kanô-òṅ Meh ane inrē lökten im töhateutnyu kël Meh! Öt hĕng tökihngen nö in Meh,

¹⁸Öm mahameuktö tököp hanāngenlōn re i tö köṅnyu, mahavahal tökööl yik yöng pöri in yip kūön cha unôichrit cha, Ō tökiröng Tēv inrē tömihôiṅ töminënyu tö ngam Mā Tēv yip tömaṙôngö,

¹⁹Tökiröng i inlēnö tömihôiṅ inrē i la-en; tömātuvö tö töluvë-akkūö nö i në tatöökö tarik, rameushö tarik öm asā talöökö ò ṙòng nup la-en ò inrē;

²⁰Mahameuk tö minkahngö pinngangkūö inrē i panam Aikup, i ngih sakāmö inrē in Israel i taṙòkhöre inrē tarik, vīlö mine-eny re me-eṅ inrē, nö sā e töngamuh.

²¹Ngaich me-eṅ kēnyö vē tarik re Israel nö ṙā-ang panam Aikup hol tö minkahngö pinngangkūö inrē, aṅtī tö tökalēḵ kël töteuthak inrē kël, holtö Yöng pinhë-eṅkūö inrē;

²²Ngaich kē-ĕkūö cha tö ngih panam; öm chūökuṙô i yik yöng cha öm kētö e in cha panam töhëmö aṅkūö tö aṅteh hönī inrē;

²³Kuhēhötre cha-a nö kē-ĕ e nö amin cha. Hö-ö pöri cha-a nö hangṙô Meh hēk lök chöngö Meh; öt hēngö kahëken tö nup tinölô cha tö meh nö la-evṙen. Lökten Meh vīten në töt löök nö yih nö i kui cha.

²⁴Yĕh meuk, fônglö an nö ngaich nö im elpanam ngam chūök kinyūngö nö kē-ĕ e, kūö sanët inrē min, inyāchö invah tölëngökūö inrē ngam elpanam min nö kētu nö eltī yip aṅ Kālti yip kumyung nö lā-al e. Teungtökūö an nö ngaich ngam ṙô Meh yĕh meuk, meūkö e man ngaich.

²⁵Ō Mā Tēv, ngaich sön pöri me-eṅ ngö ṙô tö chu, Havah ngam panô-òṅ nö ṙāi tö rupīö kēḵ mameuk inrē-pòrô ngam elpanam nö kētu nö eltī yip aṅ Kālti.

²⁶Ngaich yih ngam ṙô ngam Mā Tēv nö in Yeremīa:

²⁷Yĕh meuk, chū-ö Mā Tēv taṙòkhöre tarik; hĕng hòng tökihngen nö in chu?

²⁸Lökten, ngö ṙô an ngam Mā Tēv: Yĕh meuk, kētö ngih elpanam chin eltī yip aṅ Kāltī eltī Nepūkatnēsör inrē rāchā aṅ Pēpilön, ngaich anga-aṅ min nö kē-ĕ e.

²⁹Yih yip min aṅ Kālti yip kumyung ngih elpanam ngaich föngtökūö ngih elpanam tö tameūyö,haṙāpngö e inrē, kumngöre tī tö nup patī tö-aṅhav uk tö nup tötahūsa tökētu nö in Pē-al tö-ôkö inrē tökētū töṙöstu nö I tahëng tēv nö inrunnyö tanāyö chu.

³⁰Kūö yip kūön Israel yip kūön Yūtā inrē nö öt vahī-ivṙen tö yô-òv höng ngam tötlöök mi-ikūö chu löktökūö nyinī-öṅ cha; öt la-evṙen yip Israel tö yô-òv höng ngam inrunnyö tanāyö chu tökūö vahīṙen nup kuntī cha, ṙô ngam Mā Tēv.

³¹Hachohlö tanānyö chu ön ngih elpanam lanīnö chu inrē löktökūö ök sakāmö vinī-il e söl ing töngamuh, lökten chu min kēngö e ṙā-ang i kūö chu

³²Kūö nup tötlöök aṅ in yip kūön Israel aṅ in yip kūön Yūtā inrē nup tī cha nö harunnyö tanānyö chu yip rācha in cha tö yip kūön rācha inrē in cha tö yip kūönṙô pròfĕt inrē incha, tö yip tarik aṅ Yūtā yip aṅ Yērusalem inrē.

³³Havöötö ukre yip nö in chu öt havöötökūöre; pòrô chū-ö haköpten cha mileūchen, hö-ö cha-a nö hang nö kēḵ inköptöre.

³⁴El patī re tī cha-a tö nup sin-òkkūö nup tökaheūkö minë-eny tö minë-eny chu, nö hachōchngö e.

³⁵Vīlö nup chūök Pē-al cha-a nö lātulöng el achāṙö öp kūön HInôm, nö kētö yip kūön re kikānö inrē nö in Mōlek, pòrô chu-ö öt tölṙô cha, öt rēhĕn angū-ö nö meuthöt nö ellōn chu, töp lökten cha nö la-evṙen tö ngih sin-òkkūö, nö vīten Yūtā nö köölö fālen.

³⁶Yĕh lökten an ngam Tēv nö ngö ṙô, ngam Tēv Israel, tö inlahen ngih elpanam ngam ṙô yīö tö ngö, Kētu an nö eltī öp rācha aṅ Pēpilön i kūö sanët, i inyāchö i tölelngökūö invah inrē:

³⁷Yĕh meuk hamūlö cha chin min löktökūö nup panam chūök cha nö ahōṙi tö chu i tanānyö chu lanīnö chu inrē im tökiröng lanīnö inrē: havanten cha chin min nö i ngih chūökö, vīten cha chin min nö öt pinlānguṙen nö iyöng.

³⁸Ngaich cha-a min nö tarik chu, ngaich chū-ö min Tēv cha.

³⁹Kētö ellōn cha chin min tö töhĕng, hĕng talöökö inrē, hòṅ cha nö örheūheu nö pa-ekūö tö chu, hòn löök nö in cha, löök inrē in yip kūön cha unôichrit cha.

⁴⁰Vīten kinlēḵngô chin min in cha nö töt chanūhuvṙen, hòṅ chu öt havööngökūöre tö tölöök la-en in cha; kēhĕt ellōn cha chin min inrē tö pinhë-eṅkūö cha tö chu, hòṅ cha nö öt havööngökūöre tö chu.

⁴¹Ṙāmölōn chin min öich la-evṙen tö tölöök in cha, teūichö cha chin min inrē i ngih panam öich kô-en, hol tö ellōn re holtö nômö re inrē.

⁴²Pòn ngö rô ngam Mā Tēv: Sā chu kētö ngih tökröng tötlöök i kui vē tarik, ngatī chu-ö min kētö tölöök i kui cha öp ṙô chu kilēḵngôre in cha.

⁴³Havāhah nup min panô-òṅ i ngih nup ṙô yīö ngö ṙô, Öt aṅhavkūö ana, öt tarīku hēk öt töṙeūlavö; kētu an nö eltī yip aṅ Kālti.

⁴⁴Havāha nup min panô-òṅ nö ṙāi tö rupīö, kūichtu min minënyö nö i mat kinlēḵngô invahal, hapāni kūö, mameūku inrē, i panam Penyamin, i nup chūökö mahavīlen Yērusalem, i në elpanam Yūta inrē, i në elpanam i kui rung panam, i nup elpanam Sefelah, I nup elpanam Nēkep inrē; pò chu min havantö nup kanôlò cha, ṙô ngam Mā Tēv.